Read Rongmei Naga EZEKIEL 29 Bible Online

EZEKIEL 29 - Rongmei Naga bible

EZEKIEL 29

¹Aniu meicbangc bam tatmei tuang ruhmei kwm tuang ruhmei bw khou zaeng 12 puineic RINGHPOUC rui akhou sa the,

²“Maansei nacle, Izip biak nang zaw puanc karihna kaguangc khou, ai rui samei hei sa tho. Kata khatni Izip kandic kapwm ta akumhna dandi tii puni cho twmei kakhou sa kasuakclou ti tho.

³Kauh Liangmei RINGHPOUC rui sa e twna Izipmei guangc khou kumna sa o: Dui khou bammei thaanngangcle, nang hei ai rui zauczihmei e, Nail duithuak hei nang tuang e, mi hei nang rui nang khang damcloumei tuang e twna nang rui sa e.

⁴Ai rui nang khacbaeng khou tei khavkhuay goulou puni the khatni nang tuang duithuak tuang khav nang khou naplou puni the.

⁵Ai rui nang ta khatni mi khav guay ta tei tazikramv khou phaiclou puni. Nang pumc tei kandih khou ganclou puni the kumna mbeihlou makna ganclou puni the. Ai rui hei tei nruay khatni khouringh taek khang ganclou puni the.

⁶Khou kiu ai hei RINGHPOUC e twmei Izipmei kathuicna rui thay puni.” RINGHPOUC rui sa e, “Izipmei nangniw khou Isaraelmei rui ngangvlou e, tiki nang hei ntummei builwang de.

⁷Kaniw rui nang khou nsun key pwkhou nang hei bauna kaniw zakbangc huiphou the khatni kaniw nam tung raek the.

⁸Kumhpui zaeng rui Kauh Liangmei RINGHPOUC rui sa e: Ai rui nangniw ruc khou suc-rih tiguang puni the kumna hei tei rui maansei khatni khouringh khounah guay na ta swluai puni the.

⁹Izip hei karaengramv mbaih puni the. Ai hei RINGHPOUC e twmei khou kiu nangniw thay puni the. “Nail duithuak hei nang tuang e, mi hei nang rui kasiamhloumei tuang e twna nang rui samei zaeng rui,

¹⁰nang hei ai rui zauczihmei di the khatni Nail duithuak hei ai rui zauczihmei di the. Ai rui Izip kandic kapwm hei, dihpy thangc Migdol khou rui dihba thangc Aswan nganv, Sudanmei ramvrei nganv ramkaengv ramv tiswlou puni the.

¹¹Khoutei maansei ni khouringh ni tat ruanlou dat pw lak khe. Khoutei tingkwm 40 ramhkhat na sini bam dat pw lak khe.

¹²Izip kandic hei mi kandic nam ruc khou tazik chik liangmei kandic tiswlou puni the. Tingkwm 40 Izip tuang kaidai guay hei sw kasic karoucna, sw kasic karoucloumei baih baihmei kaidai guay suangc sini si liangna ganclou puni the. Ai rui Izipmei ta kakai kalau maekna kandih kathuicna khou zinliklou puni the kumna zaatc baih baihmei pang khou tilungclou puni the.”

¹³Kauh Liangmei RINGHPOUC rui sa e, “Ai rui Izipmei nunc ti hei tingkwm 40 tangv kaniw ta zinphakloumei kandic guay khou rui phungc guanglou datna,

¹⁴kaniw tuang kandic Izip tuang dihba ramv khou tei tilungclou dat puni. Khoutei kaniw nsuanmei guanghdic akhat swna bam puni.

¹⁵Suan liangmei akhat swna guanghdic swna kaniw zaatc baihmei ta sin dat ngam lak khe. Ai rui kaniw ta heidikamv ti-ana keylouna zaatc baihmei ruc khou tikauhlou dat lak khe.

¹⁶Isaraelmei rui kakhou ngangvlou dat lak khe, tiki Izipmei khou kaniw rui ngangvloumei tei adih nkhuaimei taanv cho twmei Izipmei ruc khou patloumei tei rui Isaraelmei ta tiningtow bam puni. Ai hei Kauh Liangmei RINGHPOUC e twmei khou kiu Isarael rui thay puni.”

¹⁷Aniu meicbangc bam tatmei tuang 27mei kwm reymei bw tuang reymei tingmik nungc RINGHPOUC rui akhou sa the,

¹⁸“Maansei nacle, Babilonmei guangc Nebukadnezar rui Tur kaidai ta adow kan the. Kamei rui karihmei nunc ta heidikamv ranvna ti-adowna kaniw py sapky ngamna, khatni kaniw bou karu tac ngamna adow khwan sini guangh tei ni, rihmei nunc tei ni Tur khou rui ramhkhat na sini laatow kan mak ge.

¹⁹Kumhpui zaeng rui Kauh Liangmei RINGHPOUC ai rui samei kiu mi hei e: Ai rui Izip kandic hei guangh Nebukadnezar khang tii puni the. Kamei rui Izip kandic tei nuam laana Izip kandic tuang lanv guay tei katuang ricmei nunc taanvphy swna phungc tat puni the.

²⁰Ai rui Izip ti hei katuang taanvphy swna tii puni the, kalam thu katuang ricmei rui akhang taanclou the. Kauh Liangmei RINGHPOUC ai rui sa the.

²¹“Mi ganv kiu ai rui Isaraelmei ta titanclou puni, kumna ai hei RINGHPOUC e twmei kaniw thay diu khang meic kathuicna rui nang lat chu nuhmei bamv khou Ezekiel nang ta ai rui tisalou puni.”