Read Rongmei Naga EZEKIEL 3 Bible Online

EZEKIEL 3 - Rongmei Naga bible

EZEKIEL 3

¹Ravguangc rui sa the, “Maansei nacle, mi latrikzy hei tu lana Isaraelmei nunc khou tatna sa tho.”

²Khoutei ai amwang hah pat the, kumna mi latrikzy tei tu khang tii the.

³Kamei rui sa the, “Maansei nacle, ai rui tiimei latrikzy hei tu o; kumna mi hei rui nang bung tipadik tho.” Hei tei ai tu the, hei tei nkhuaihdui kumc ndeih gay e.

⁴Khoutei Ravguangc rui sa the, “Maansei nacle, nang Isaraelmei nunc khou tei tatna ai rui sa o twna sa samei tei salou ti tho.

⁵Ai rui nang ta thoucloumei hei thay makmei zaatc baihmei lat samei nunc khou thoucloumei tuang hamh e, tiki Isaraelmei khou thoucloumei tuang de.

⁶Ai rui nang ta nang rui kaniw lat thay makmei zaatc daihmei nunc khou thouclou ti thei kaniw nang lat chulou kan nimei tuang de.

⁷Tiki Isaraelmei gaanv khat na rui sini nang lat chu nii ni tuang hamh the; kaniw alat nganvna nking ni tuang hamh e. Kaniw hei kaniw lung ni kaniw nu ni tanc the.

⁸Ntaw thu ai rui nang ta kaniw kumcna lungning tanh khang swlou puni the.

⁹Ai rui nang ta ntauh kumc ti-ntipclou puni the, kamanv kunghmei tauc kumc titanclou puni the; mi meicliammei nunc ti hei ping riu.”

¹⁰Ravguangc rui sa dat re, “Maansei nacle, lungh gutna nking o, kumna ai rui samei guay hei ningtow o.

¹¹Kumhpui zaeng rui, nking ny nking mak ny thay mak ge, meic bangc bam tat kanmei Isaraelmei nunc bamv thangc tei tatna Kauh Liangmei RINGHPOUC ai rui kaniw khang samei lat hei kaniw khou sa ti tho.”

¹²Hei tangv tei bumaengh tei rui ata puanc thau the, kumna “Tingkauh thangc bammei RINGHPOUC hym ta thuanc o!” twna khwan ranvna kauc patmei khwan athei khou chu the.

¹³Khouringh nunc tuang swkaeng guay tei kalaapc patna mpwan khou kapyangmei khwan khatni ramh haengv guay khwan tei baengla zaymei ra kumc ranvna chu the.

¹⁴RINGHPOUC tuang ngamv tei pumtan kazauhna akhou guanglou the, kumna katuang bumaengc rui ata phungc tat pwkhou akhou nkhucmei khatni lungpuamhmei pat the.

¹⁵Kumna Tel Abib khou, Isaraelmei nunc bammei Kebar duithuak daeng khou guang the. Ai ramh sw thau sw guang khang thay makna khou tei zaeng chanei bamlou the.

¹⁶Zaeng chanei tangv tei RINGHPOUC rui akhou sa dat the.

¹⁷Kamei rui sa the, “Maansei nacle,” “Ai rui nang ta Isaraelmei tuang rigaanvpouc khang thouclou the. Kumna kaniw ramh thay khang ai rui samei lat guay tei kaniw khou nang rui salou nina e.

¹⁸Meicsimei gaanv khat tei theic puni the twna ai rui sa pwkhou, kamei tei lunghlaicna ringc dat nuh khang nang rui kakhou tei salou ti makmei zaeng rui kamei tei paapcmei swna theic e thei, kamei theihmei tei nang ruc khou keylou puni.

¹⁹Meicsimeipu khou tei nang rui salou tina kamei rui paapc tei taanc taan mak ge thei kamei tei paapcmei swna theic puni, tiki nang thu kuak the.

²⁰“Meicgaymei gaanv khat tei rui simei taanv taanc datna ai rui kata tei theic nuhmei lwnlung khou lou pwkhou, nang rui kakhou tei salou ti mak ge thei kamei theic puni the. Kamei tei kapaap zaeng rui theic puni—kamei rui taancloumei gaymei taanv guay tei ai ningtow lak ge. Kamei theihmei tei nang ruc khou keylou puni.

²¹Meicgaymeipu ta tei paapc taanc mak khang nang rui sa tina kamei chulouna paapc taanh mak ge thei kamei theih mak puni, kumna nang panty ni duak the.”

²²RINGHPOUC tuang tanhmei ngamv akhou kahitow the kumna kamei rui akhou samei chu the, “Nang thauna nzaengc thangc tei pat ro, hei khou tei ai nang khou lat salou puni.”

²³Kumna ai nzaengc baek khou tei pat pwki ai RINGHPOUC tuang hym Kebar duithuak paengc khou how kanmei kahak tei hei khou tei how the. Ai kandih khou sow nkhum khuakh khuak key the,

²⁴tiki Ravguangc tuang bumaengc akhou gutlouna ata zay ding thaulou the. RINGHPOUC rui akhou sa the, “Nang kai thangc tatna kaikhamv mbangh binlouna bam o.

²⁵Maansei nacle, nang ta riang rui bangclou puni the, kumna nang charuangc khou pat dat ngam pw lak khe.

²⁶Mi meicliammei nunc khou hei nang rui karei thay khang sa dat mak khang ai rui nang tuang baley tikalunglou taan puni the.

²⁷Ai rui nang khou lat dinclou dat pwkhou khatni lat sa dat khang nang khou pumtan tiilou dat pwkhou, Kauh Liangmei RINGHPOUC ai rui sa bammei hei nang rui kaniw khou salou dat puni. Gaanvsaekc rui nking puni, gaanvsaekc rui thouh swlou pw lak ge, kalam thu kaniw hei meicliammei zaat re.”