Read Rongmei Naga EZEKIEL 30 Bible Online

EZEKIEL 30 - Rongmei Naga bible

EZEKIEL 30

¹RINGHPOUC rui sa e,

²“Maansei nacle,” “RINGHPOUC rui sa e twna sa o. Mi lat hei nang kauc nina e: Meicpingmei tingmik guang pw the!

³RINGHPOUC rui taanv sw nimei tingmik, zaatc guay khang muangh zinghmei khatni ryanramei tingmik guang zaic puni the.

⁴Izip khou rih guang puni the, khatni Sudan khou ryanra daihmei guang puni the. Izip khou meic mpeyna dowluai puni the; mi kandic ta tei nuam laa puni the, kumna sw kasic karoucna ganclou puni the.

⁵“Sudan, Lidia, Libia, Arabi, Kub khou rui kaw guangmei rihmei nunc ni theic kazauh puni the, Isaraelmei ni theic kazauh puni.”

⁶Kauh Liangmei RINGHPOUC rui sa e, “Dihpy thangc Migdol khou rui dihba thangc Aswan nganv Izip ta machuang bammei guay tei rih bamv khou swluai puni. Izip rui kagaengh swna bammei rihmei guay ta tei swmutlou puni the. Kauh Liangmei RINGHPOUC ai rui sa the.

⁷Mi kandic tei kandih nam ruc khou karim liangmei kandic sw puni the, khatni katuang kaidai guay tei sw kasic karoucna ganclou puni the.

⁸Ai rui Izip ta mailouna kata gaek bammei guay ta swluai ngam kan pwkhou ai hei RINGHPOUC e twmei kaniw thay puni.

⁹“Mi tingmik kiu guangna Izip ta swkamut kamailou pwkhou lwmsimei maekmei Sudanmei ta tikaluanglou khang ai rui rungh khou rui latdiumei nunc thouc pat puni, khou kiu kaniw ping puni the. Mi tingmik kiu guang pw the!”

¹⁰Kauh Liangmei RINGHPOUC rui sa e, “Ai rui Babilonmei guangc Nebukadnezar ta piuna Izip kandic tuang lanv tei timutlou puni the.

¹¹Kamei khatni katuang mei nzimei rihmei nunc guangna mi kandic tei sw kasic karouclou puni the. Kaniw rui Izip ti hei baengsaeng rui dow key puni the kumna mi kandic tei phouh rui padik puni the.

¹²Ai rui Nail duithuak ta tithip puni the khatni Izip ta meicgay makmei nunc baanc bangc khou lou puni the. Ginramcdicmei guangna mi kandic kapwm ti hei sw kasic karouclou puni the.” RINGHPOUC ai rui sa the.

¹³Kauh Liangmei RINGHPOUC rui sa e, “Ai rui Memphis kaidai tuang ravmaengc guay khatni nchumh makmei rav guay tei swkamut kamailou puni. Izip kandic ta sin nimei meic nai lak khe, kumna ai rui meic nunc ta tei tiping puni the.

¹⁴Ai rui Izip dihba ramv ta nsaramv tiswlou puni the khatni dihpy thangc Zoan kaidai mailou puni the. Guanghdic kaidai Thebis ta dandi tii puni.

¹⁵Izip tuang rihpan daihmei Pelusium ruc khou, alungpuam bun key puni. Ai rui Thebis tuang lanv guay swmaan puni.

¹⁶Ai rui Izip ta mailou puni, khatni Pelusium ryanra puni the. Thebis tuang raengc guay swra key puni khatni mi kaidai tei duithum puni.

¹⁷Heliopolis khatni Bubastis tuang nggaanv nunc suc-rih bamv khou theic puni, baihmei guay ta rui kangmei swna zay tat puni.

¹⁸Ai rui Izip tuang ngamv khatni kaniw rui gaengh sw bammei kaniw tuang pumtan tei Sw bau pwkhou Tahpanhes tei zingc puni. Izip ta muangh guamliam puni, kumna katuang kaidai guay khou lungc bammei nunc ta tei kangmei swna zay tat puni.

¹⁹Ai rui heikumna Izip ta dandi tii pwkhou, ai hei RINGHPOUC e twmei kaniw thay puni.”

²⁰Aniu meicbangc bam tatmei tuang 11mei kwm reymei bw tuang zaeng chaneipui neic RINGHPOUC rui akhou sa the,

²¹“Maansei nacle,” “Ai rui Izipmei guangc tuang baancpwam riambau kan the. Buy-baeng sin dat ngam nuh khang hei tei meic gaanv khat na rui sini thing thuapna duamlou dat kan mak khe.

²²Kumhpui zaeng rui Kauh Liangmei RINGHPOUC ai rui sa e: Izipmei guangc hei ai zauczihmei e. Ai rui kabaanc kanei tei gaymei akhat tei ni, riambau rey kanmei tei ni riambau ngamparylou puni. Khou kiu kabaanc khou rui baengsaeng tei taek key puni, the.

²³Ai rui Izipmei ta kandih kabamv kathuicna khou zinphaklou puni the.

²⁴Khou kiu ai rui Babilonmei guangc baancpwam titanclou puni kumna atuang baengsaeng kabaanc khou nsinlou puni; tiki Izipmei guangc baancpwam thu ai rui riambaulou puni, kumna kamei tei kata zauczihmei hu khou kalangh kahimhna theic puni.

²⁵Ngguay, ai rui kata tisuan keyna Babilonmei guangc ta titanc thau puni the. Ai rui kakhou atuang baengsaeng tiilou pwkhou, kamei rui hei tei Izipmei ruc khou karik pwkhou, ai hei RINGHPOUC e twmei meic kathuicna rui thay puni.

²⁶Ai rui Izipmei ta kandih kapwm khou zinphaklou puni. Khou kiu ai hei RINGHPOUC e twmei kaniw thay puni.”