Read Rongmei Naga EZEKIEL 31 Bible Online

EZEKIEL 31 - Rongmei Naga bible

EZEKIEL 31

¹Aniu meicbangc bam tatmei tuang 11mei kwm kathumhmei bw tuang reymei tingmik nungc RINGHPOUC rui akhou sa the,

²“Maansei nacle,” “Izipmei guangc khatni kamei nunc khou tei kumna sa o: Nang hei adih ngamv daihmeipu cho! Nang hei tabui lev kida nina cho?

³Nang hei Lebanon tuang sidar bang kumc e, kaniw kaphaanv geihmei, tingpuk thau tungmei bang tei kumc e.

⁴Mi bang khang tei dui nai khwan e, kandih bangc duiriang guay rui mi ta tei makuat khwan e. Mi bang tei thau bammei bamv khou mi duiriang guay tei rui dui tiguang the, khatni nwmbangc thingbang guay khou duiriang tiipat the.

⁵Dui gay lapui zaeng rui mi bang tei baihmei bang guay suangc kauh mbu the. Kachy guay tei phaan duc the, kachy phuam ni gay the.

⁶Mi chy guay khou tei nruay zaatc kaguayna kabou guang duanc bam khwan e; nwmbangc khouringc nunc ni, mi bang khou tei kanac nkui bam khwan e; kandihmei guay rui mi lym bangc khou zaengsw bam khwan e.

⁷Mi bang tei adih howgay bam khwan cho— kauhna, kachy kaphaanv saengcna. Kamaan tei kandih bangc duiriang zangc tangcna bam khwan e.

⁸Ravguangc tuang pikwan khou thaumei sidar bang akhat na sini, mi ta tei lay tangh mak khwan e. Fir bang akhat na sini mi chy tei zu baanc pat ngam mak khwan e. Alubang akhat na sini mi chy phuam ta tei lay tangh mak ge. Ravguangc tuang pikwan khou thaumei bang khat na sini mi ramgai tei lay tangh mak khwan e.

⁹Ai rui hei tei kachy kaphaanv tisaengclouna heikumna tihow gayloumei tuang e. Mi ta tei Ravguangc tuang pikwan Eden tuang thingbang kathuic rui mamav bam khwan e.

¹⁰“Mi tingpuk thau tangcna bammei thingbang khou hei tabui guang puni cho twmei, Kauh Liangmei RINGHPOUC ai rui nang khou dinclou puni. Mi hei thau kauh la hay kagaengh sw hay hay the;

¹¹kumhpui zaeng rui ai rui mi ti hei ganc pat the kumna hei tei kandih baihmei kaipouc khang tii kan the. Kamei rui mi bang ta tei katuang simei taanv theilayna taanv sw puni the.

¹²Meic nzimei kandih baih thangc mei nunc rui hei tei dow bau keyna ganclou puni the. Mi bang tuang bau keymei chy khatni kanuy phuam guay tei mi kandic tuang chyngbut khatni nzaengc kabamv kathuic khou key liklou puni the. Mi swng khou lungc bammei zaatc guay tei tat kan puni the.

¹³Nruay guay rui guangna mi bowlou bammei bangc khou tei tow puni the, khatni nwmbangc khouringc nunc rui mi chy guay khou tei kaluih puni the.

¹⁴Kumhpui zaeng rui ntaw khou rui thauna thingbang akhat na ta sini, dui adih gayna bam sini, mi bang tei kumna tingpuk thau tungna tithau dat lak khe. Kaniw kaguay theic puni maansei kumna, taruaih thangc key kanmei pang khou lay kazauh muay kan ni de.”

¹⁵Kauh Liangmei RINGHPOUC rui sa e: “Mi thing bang tei taruaih key pui nungc kiu zaengsimei lyanna ai rui mi ta tei kandih bangc dui rui gum binlou puni. Ai rui duiriang guay ta tei khaamlou puni kumna duiriang mpeyna ta tiluangc pat lak ge. Mi thingbang tei theic kanpui zaeng rui, ai rui Lebanon Chyngbut guay ruc khou zinghmei tiguang puni khatni mi ngouc tuang thingbang kaguayna ta tei titheic puni.

¹⁶Ai rui mi ti hei theihmei kandic thangc tii key pui nungc kiu, hei tei bowkeymei khwan rui zaatc kaguayna ta tikadunh puni. Eden thingbang guayna khatni taruaih thangc key kanmei dui zwan chuymei, kadahloumei Lebanon tuang thingbang guay ni mi bang tei bowkeymei ta tei neihla puni.

¹⁷Kaniw tei mi ti hei nduanghna bowkey kanmei pang khou tei kazauh khang taruaih thangc tat puni the. Mi swng bangc khou lungc bammei guay ta tei zaatc pang khou zinphaklou puni.

¹⁸“Mi thingbang tei Izipmei guangc khatni kamei nunc e. Eden tuang thingbang akhat na sini hei tei kumcna kauh kan mak ge khatni daic kanmei maek ge. Tiki ntaw thu, Eden tuang thingbang guay tei kumcna hei tei taruaih thangc key puni the kumna ravning makmei khatni suc-rih bamv khou swluai kanmei pang khou kazauh puni the. Ai rui sa the,” twna Kauh Liangmei RINGHPOUC rui sa the.