Read Rongmei Naga EZEKIEL 32 Bible Online

EZEKIEL 32 - Rongmei Naga bible

EZEKIEL 32

¹Aniu meicbangc bam tatmei tuang 12mei kwm bw 12mei tuang reymei tingmik nungc RINGHPOUC rui akhou sa the,

²“Maansei nacle, Izipmei guangc khou kamei ramh thay kan khang mi lat hei nthukna salou o. Mi alat hei kakhou kumna sa o: Nang hei zaatc pang khou kamangliangpui kumcna sw kan the, tiki nang hei duithuak khou tei kaguatc phum phumna bammei guali kumc ranv the. Nang taanv rui bihdui kaguatc thauna duithuak tei swtangnouh the.

³Zaatc nunc mpeyna guang kaduai pwkhou kiu, ai rui nang ta atuang chiakc khou nym lana dui paengc thangc sat pat puni.

⁴Ai rui nang ta kandih khou kaliang patlou puni, kumna kandih namv ruc khou naimei nruay khatni khouringh guay ta kaw guangna nang zanc titu puni.

⁵Nang taam rui chyngbut guay khatni nzaengc guay padik puni.

⁶Nang zei tei luanghbut guay zin lik mak saanv, duithuak guay luangc padik mak saanv bun pat puni.

⁷Ai rui nang ta swmutpui nungc kiu ai rui tingpuk gumliam puni khatni gaanchuangcna guay thutmaan puni. Neihmik muangh thei thangc nkamh kan puni the, khatni bw ni kariw pat dat lak khe.

⁸Tingpuk tuang gaanhmei guay ti hei ai rui tizingc kan puni the khatni nang tuang kandic hei zinghmei khou ganclou puni the. Kauh Liangmei RINGHPOUC ai rui sa the.

⁹“Nang rui chu zat makmei kandic guay khou nang ta swmaanmei chamv tei ai rui dinc lik pat pwkhou zaatc mpeyna lungh katuakc puni the.

¹⁰Ai rui nang ruc khou taancloumei taanv hei rui zaatc mpeyna ta tikatuakc puni the. Ai rui atuang baengsaeng kahai pat pwkhou guangh nunc pingna kadunh puni the. Nang bow key pui nungc kiu kaniw guay tei theih khang pingna kadunh puni the.”

¹¹Kauh Liangmei RINGHPOUC rui Izipmei guangc khou sa e, “Babilonmei guangc tuang baengsaeng nang ruc khou guang puni the.

¹²Nang tuang mei nunc ta dowluai khang ai rui meic nzimei nunc ta thouclou puni the. Nang tuang meic guay khatni nang rui gaengh swna bammei baih baihmei puat guay tei ni swmaan kan puni the.

¹³Ai rui nang tuang kiruai guay ta duithuak daeng khou swluailou puni the. Dui tei sw tangnouh dat nimei khouringc ni, maansei ni nai dat lak khe.

¹⁴Ai rui nang tuang dui ta tei ti nchwnglouna hei tei aling dat puni the; khatni nang tuang duithuak guay tei luangc nuaih nuaina luangc dat puni the. Kauh Liangmei RINGHPOUC ai rui sa the.

¹⁵Ai rui Izip ta ntouc tazik chikhlou pwkhou khatni mi khou tei bammei katana ta swmaanlou pwkhou, ai hei RINGHPOUC e twmei kaniw thay puni.

¹⁶Mi ramh thay diu khang samei lat hei theihlu sw puni the. Zaatc nunc tuang aluh guay rui mi hei Izip kandic khatni Izipmei ta latlumei lu Sw puni the. Kauh Liangmei RINGHPOUC ai rui sa the.”

¹⁷Aniu meicbangc bam tatmei tuang 12mei kwm reymei bw tuang zaeng panguh puineic RINGHPOUC rui akhou sa the,

¹⁸“Maansei nacle,” “Izipmei nunc khang rui latluna kap tho. Kaniw ta tei baihmei ngamv naimei zaat nunc lev twna taruaih thangc thouc key tho.

¹⁹Kaniw khou tei sa tho: “Nangniw hei meic baih baihmei suangc gay e twna ningna cho? Nangniw taruaih thangc key puni the, khou tei ravning makmei nunc lev zip nchamc bam puni the.

²⁰“Suc-rih bamv khou theihmei pang khou tei Izipmei ni bow kazauh puni the. Kaniw ta swluai khang baengsaeng sat pat kan the.

²¹Tancbauhmei nunc khatni Izipmei biak liangcna adow kanmei nunc tei Izipmei ta taruaih thangc nkhwanna bam the. ‘Rav ta thay makmei suc-rih khou swluailoumei nunc tei khou hei keyna zip bam the!’ twna kaniw rui kauc the.

²²“Asiria ni khou tei bam e, katuang ricmei tarou guay khou tei nai padik bam e. Kaniw guay tei rih bamv khou theihmei nunc e.

²³Kaniw tuang tarou tei kandih bangc thangc taruaih thangc nai e. Katuang ricmei guay tei rih bamv khou theic kan the, kumna mi nunc tarou tei rui katuang tarou ta bam nkuay bam e. Kaniw tei kaganv akhat khou ringhmei kandic ta tiping kanmei nunc e.

²⁴“Elam kandic ni mi khou tei katuang ricmei nunc tarou chung khou bam e. Kaniw guayna tei rih bamv khou rui theicna kaniw tei gih ruamh makna taruaih thangc key the. Ringc bam khou kaniw rui meic nunc ta tiping bam khwan e, tiki ntaw thu kaniw tei zakna key kan the.

²⁵Elam kandic ni rih bamv khou theihmei pang khou zip bam the, khatni katuang ricmei nunc tarou rui kata bam nkuayna bam the. Kaniw guayna tei gih ruamh makmei nunc, rih bamv khou theihmei nunc e. Ringc bam khou kaniw rui meic nunc ta tiping bam khwan e, tiki ntaw thu theicna, zakna zip bam the, rih bamv khou theihmei nunc lev kadam nchamc the.

²⁶“Mesek lev Tubal ni khou tei kaniw tuang ricmei nunc tuang tarou rui bam nkuayna bam muay the. Kaniw guay tei kagic ruamh makmei rih bamv khou theic khwan e. Tiki kaniw rui ringhmei nunc ta tipinglou khwan e.

²⁷Rihpwan piu ntangh lana, kaniw tuang baengsaeng rui kaniw pyban swna kaniw tuang nggic rui kaniw pumc gumlouna chingkhiuhmei ram mbei mbeihlou kanmei reynungc tancbauhmei nunc ta kumc kaniw ta mbeihlou mak khwan e. Mi kumhmei tancbauhmei nunc hei kaganv akhat khou ringc bammei nunc ta tipingna lungc khwan e.

²⁸“Hei tei kumcna Izipmei nunc ni gih ruamh makmei rih bamv khou theihmei pang khou tei zip bam muay puni.

²⁹“Edom ni khou tei kaguangc guay lev katuang dihsinpouc guay kazauhna hei khou tei bam e. Kaniw tei tancbauhmei rihmei nunc khwan e, tiki ntaw thu kaniw tei gih ruamh makmei ric bamv khou theihmei nunc lev taruaih khou zip bam the.

³⁰“Dihpy ramv thangc mei guangh nac guay khou tei bam e, Sidonmei nunc ni bam e. Kaganv akhat khou kaniw tuang ngamv ta meicping bam khwan e; tiki ntaw thu rih bamv khou theihmei nunc lev zawsina key kan the, kumna gih ruamh makna nzilou bam the. Taruaih key kan nimei nunc tei lev zakmei dam laa nchamc the.

³¹“Mi ric bamv khou theihmei nunc ta tei how pwkhou Izipmei guangc khatni karicmei nunc tei kaniw rana kaniw ta swmlou puni e,” twna Kauh Liangmei RINGHPOUC rui sa the.

³²“Ai rui Izipmei guangc ta ringhmei nunc ta tiping khang swlou khwan sini kamei lev katuang ricmei nunc ta tei swluai puni kumna gih ruamh makmei rih bamv khou theihmei nunc tei lev zip nchamc bam puni,” Kauh Liangmei RINGHPOUC rui sa the.