Read Rongmei Naga EZEKIEL 33 Bible Online

EZEKIEL 33 - Rongmei Naga bible

EZEKIEL 33

¹RINGHPOUC rui akhou sa e,

²“Maansei nacle,” “Ai rui kandih akhat khou suc-rih tiguang pwkhou tabui sw bu cho twmei nang zaat nunc khou raclou tio. Mi kandic tuang mei nunc tei rui kaniw pang khou gaanv khat ta rigaanvpouc khang kadah the.

³Rigaanvpouc tei rui zauczihmei guangmei ta how pwkhou bianggun amuanna meic nunc khou tithay the.

⁴Thowkumhmei rui hei tei chuna thouhsw makna bam khou zauczihmei tei guangna kata swluai e thei kamei theihmei tei kaman de.

⁵Kamei theihmei tei kakhuay de, kalam thu kamei rui thouhsw mak khou rui theih tu de kamei rui hei tei chulou bam khwan e thei kamei duak kan nimei tuang e.

⁶Tiki zauczihmei guangmei tei rigaanvpouc tei rui how lana bianggun amuan timakna zauczihmei tei guangna mi paapcmei nunc ta tei swluai e thei, mi theihmei nunc zei manv tei rigaanvpouc ruc khou tei keylou puni.

⁷“Maansei nacle, ai rui nang ta Isaraelmei kandic tuang rigaanvpouc khang suamclou the. Kumhpui zaeng rui ramh thay kan khang ai rui samei lat tei nang rui kaniw khou salou nina e.

⁸Meicgay makpui mei gaanv khat tei theic puni the twna ai rui salou tina kamei tei lunglaic datna ringc kan khang nang rui kakhou tei salou timakmei zaeng rui kamei tei paapcmei swna theic the, kum e thei kamei theihmei tei nang ruc khou keylou puni.

⁹Nang rui kakhou tei salou the tiki kamei paapc taanc nthaekc makna kamei paapcmei swna theic e thei nang panty thu duak de.”

¹⁰RINGHPOUC rui akhou sa the, “Maansei nacle,” “Isaraelmei nunc khou kaniw rui sana bammei lat tei kumna sa tio: ‘Aniu tuang paap khatni aniu rui taanc nkhuailoumei tuang puatrith hei aniu phungc tat lak khe. Aniu hei nsuan khith khit key the. Akumhna aniu ringc ngam ni thena cho?’

¹¹Kauh Liangmei RINGHPOUC ai hei ringhmei Racguangc swmei hei suai makmei kumcna suai makmei lat ai rui samei tuang e, paapcmei akhat rui theihmei ta ai zauc bam nii mak ge. Kamei tei paapc taanc nthaekc lana ringc kanmei ta ai how nii e. Isaraelle, simei taanv tei taanc nthaekc tho. Tabui swna nang theic nina cho?

¹²“Kumhpui zaeng rui maansei nacle, Isaraelmei nunc khou tei kumna sa tho twmei thu meicgaymei gaanv khat tei rui paapc taanc dat re thei, kamei rui gaymei taanclou kanmei tei rui kata kanlou ni tuang hamh e. Simei taanhpui mei tei rui simei taanv taanc dat mak ge thei kata dandi tii ni tuang hamh e. Meic gaypui mei tei paapc taanc dat re thei kamei tei ringc ni tuang hamh e.

¹³Meic gaypui mei khou tei kamei ringc puni the twna ai rui, salou bam sini, kamei rui gaymei panty khou lungc kanmei tuang di the twna ningna paapc taanc dat re thei, kamei rui taanclou kanmei gaymei guay tei akhat na sini ai ningtowlou dat lak khe. Kapaap zaeng rui theic puni de.

¹⁴Ai rui meicgay makmei ta kamei theic puni the twna salou nuh e, tiki kamei rui paapc taanc taanna nchumhmei gaymei tei taancna lungc dat re thei twmei thu

¹⁵lat khang, meic nunc rui pousak khou sindaancloumei puat tei hanc dat re thei hamh e thei kamei rui houcloumei puat tei tii dat re thei—kamei rui paapc taanc taanna ringc nimei chaeng tei suicna lungc dat re thei, kamei theic ni tuang hamh e, ringc puni.

¹⁶Kamei rui taanclou kanmei paap guay tei ai rui kuaklou puni, kumna kamei ringc puni. Kalam thu kamei rui nchumhmei khatni gaymei tei taanc dat the.

¹⁷“Ai rui sw nimei hei nchumh mak ge twna nang mei nunc rui sa e. Nchumh makmei kiu kaniw tuang taanv tei the.

¹⁸Ravchaptatpui mei tei rui gaymei taanv taanc taanna simei taanv taanc dat re thei, kamei theic puni de.

¹⁹Meicgay makpui mei tei rui paapc taanv tei mpatlouna nchumhmei gaymei taanc dat re thei kapanty tei kanlou puni de.

²⁰Tiki ai rui sw bammei hei nchumh mak ge twna nangniw sa e. Nangniw ta nangniw tuang taanv theilayna ai rui latzan sw puni the.”

²¹Aniu meicbangc bam tatmei tuang 12mei kwm ruhmei bw tuang zaeng panguhpui neic Jerusalem khou rui pak duak patmei gaanv khat akhou guangna mi kaidai tei lai kan the twna dinclou the.

²²Mipu tei guang pw nimei hu khou tingzyn tei RINGHPOUC baanc tei aruc khou mbaeng key the. Nthuanh thauna mipu tei guangpui ganv khou thu, ai lat sa dat ngam makmei sw mak khe.

²³RINGHPOUC rui akhou sa e,

²⁴“Maansei nacle,” “Isarael kandic tuang swkasic-karoucloumei kandic guay khou lungc bammei nunc rui kumna sa e: ‘Abraham hei gaanv khat na de, tiki mi kandih kapwm tei kakhang tiiloumei tuang the. Aniu thu meic mpeyna the, kumhpui zaeng rui, ntaw thu mi kandic hei aniu tuang di the.’

²⁵“RINGHPOUC ai rui kaniw khou sa e twna kumna sa tio: Zei naimei zanc nangniw tu the. Nangniw ravmaengc kalum the. Nangniw meicdow the. Tabui zaeng rui mi kandic tei nangniw tuang e twna ning bam nina cho?

²⁶Nangniw rui nangniw tuang baengsaeng khou lwmlou e. Nangniw tuang taanv guay tei chanymei tuang taanv rana di the. Meic kathuicna lungcmaanv lungcmow the. Tabui zaeng rui mi kandic hei nangniw tuang e twna ning bam khang naina cho?

²⁷“Kauh Liangmei RINGHPOUC ai hei ringhmei Racguangc swmei hei suai makmei kumcna swkasic-karoucloumei kaidai guay khou lungc bammei nunc ta tei suai makna swluai puni the twna kaniw khou sa ti tho. Namv namv khou lungc bammei guay tei khouringh taek sw puni the. Chyngbut guay khou khatni khowbangc guay khou nkamh bammei nunc tei ravpyan rui theic puni.

²⁸Ai rui mi kandic tei nsa karaeng ramv tiswlou puni the, khatni kaniw gaengh sw bammei ngamv guay tei luai kan puni the. Isarael tuang chyngbut guay tei maansei tat ruanlou dat bauc pw lak khe.

²⁹Ai rui meic nunc ta kaniw tuang paap dandi tiina mi kandic tei nsa karaeng ramv tiswlou pwkhou, ai hei RINGHPOUC e twmei kaniw thay puni e.”

³⁰RINGHPOUC rui sa the, “Maansei nacle, nang pui nac Isaraelmei nunc tei kaidai raengh daeng khou kaniw kai kaimun daeng khou kaniw guang kariuna nang lam khou sa bam the. ‘RINGHPOUC rui, sa guangmei lat aniu nking tat di kho’ twna kaniw khat khat khou sa bam the.

³¹Kumna nang rui samei tei nking khang amei nunc tei guang kaduai the, tiki kaniw tei nang rui samei tei thu taanh mak ge. Kaniw rui nang lat tei kalwnlung chuna kumna laalouna kaniw tuang agaamv agahmei panty tei kumcna lungc dat muay kan de.

³²Kaniw khang thu nang hei nrah downa ntu nggaanv nzianmei lu suan bammei na kumcna laalou the. Kaniw rui nang tuang lat guayna tei thu nking, the tiki kakaeng akhat na sini piuloumei tuang maek ge.

³³Tiki nang tuang lat guay hei guang tangc pwkhou mi guay tei guang tangc puni kumna kaniw pang khou muhzwng bam dyng the twmei kaniw thay puni.”