Read Rongmei Naga EZEKIEL 34 Bible Online

EZEKIEL 34 - Rongmei Naga bible

EZEKIEL 34

¹RINGHPOUC rui akhou sa e,

²“Maansei nacle, ai rui Isaraelmei dihsinpouc nunc ruc khou samei lat hei kaniw khou dinclou tho. Kauh Liangmei RINGHPOUC ai rui sa e twna kumna kaniw khou sa o: Nangniw sansi e dav, Isaraelmei lauziu gaenghpouc nunc! Nangniw hei kara rana khang phu lana lauziu nunc ta thu gaengclou mak khe.

³Nangniw kanoudui zangv the, kahiw tei baanv the, gay liang liangmei tei dow luaina tu the. Tiki lauziu tei thu gaengclou zat mak ge.

⁴Nangniw suanmei nunc ta zauclou mak ge; nnaumei ta tigaylou mak ge, kabiu-kabaengmei ta duamlou mak ge, pak tat kanmei nunc ta nym guang dat mak ge, amaan kanmei nunc ta phu guang dat mak ge. Mi phaan tei, nangniw rui kaniw ta sina sw the.

⁵Gaengcloumei maek tina lauziu nunc tei pak phak ngam the, kumna kaniw tei khouringh taek sw the.

⁶Kum tina alauziu nunc tei kauhmei luangcbut khatni chyngbut guay thangc ruanmaan tat kan the. Kaniw kandih kapwm khou pak phak tat kan the. Meic gaanv khat na rui sini phulou dat mak khe.

⁷“Kumhpui zaeng rui, Kauh Liangmei RINGHPOUC rui samei hei nking o, he lauziu gaenghpouc nuncle.

⁸Ai ringhmei Ravguangc swmei suai makmei kumcna nangniw alat chu loumei rui gay e. Alauziu guay tei nwmbangc khouringc nunc rui akwamna swluai tu ngam the kalam thu gaengcloumei maek khe. Atuang lauziu gaenghmei nunc rui lauziu nunc ta tei phu dat mak khe. Kaniw rui kaniw khang na kaphianhna lauziu nunc khang thu zauclou mak khe.

⁹Kumhpui zaeng rui, he lauziu gaenghmei nunc, ai rui samei hei nking o.

¹⁰Nangniw hei ai rui zauczihmei di the twna Kauh Liangmei RINGHPOUC ai rui sa the. Ai rui atuang lauziu nunc ta nangniw baanc khou rui laa pat kan puni the kumna nangniw ta kaniw tuang gaenghpouc nunc tisw dat lak khe; nangniw ta nangniw rana khang lungc bammei lwnlung khou tei tilungclou dat lak khe. Ai rui atuang lauziu nunc ta nangniw baanc khou rui, kanlou puni the kumna nangniw ta titu dat lak khe.

¹¹“Kauh Liangmei RINGHPOUC ai rui alauziu nunc ta phu puni kumna kaniw ta ai rui zauc puni.

¹²Lauziu gaenghmeipu rui pak phak tat kanmei kalauziu nunc ta phuna gaengc kaduai guang datmei kumcna ai rui alauziu nunc ta phu puni. Mi zinghmei, ryanramei ganv khou tei rui pak phak tat kanmei bamv guay khou tei rui ai rui kaniw ta phu guang dat puni.

¹³Ai rui kaniw ta ginramdic guay thangc tei rui kaw guang kaduai datna kaniw tuang kandic khou phungc guanglou dat puni. Ai rui kaniw ta Isaraelmei tuang luangcbut guay khou khatni duithuak guay khou gaengc guanglou dat lana amaanmei kabin bamv khou ti-mpac bam dat puni.

¹⁴Isaraelmei tuang luangcbut mphuaih ramv, nzaengc baek khatni ndiakcmei byn bamv guay khou kaniw ta ti-mpacna suc-rih ping makna lungc dat puni.

¹⁵Ai kahak rui alauziu nunc ta gaengcna lungc dat puni. Kumna kaniw ta tizaengswna lungc dat puni. Kauh Liangmei RINGHPOUC ai rui sa the.

¹⁶“Amaan kanmei nunc ta ai rui phu guang dat puni, chaeng maanvna ruan duc tat kanmei nunc ta nduangh guang dat puni, zamhmei nunc ta duamlou puni khatni nnaumei nunc ta tigaylou dat puni; tiki kamei gaymei khatni tanhmei guay ta tei ai rui swmaan puni, kalam thu ai; hei nchumhmei taanhmei lauziu gaenghpouc e.

¹⁷“Kumhpui zaeng rui, he alauziu nuncle, Kauh Liangmei RINGHPOUC ai rui nangniw meic kathuihna ta latzan sw puni the kumna simei lev gaymei khatni lauziu lev ziuh khaklangc pat puni the.

¹⁸Nangniw gaanvsaekc thu gaymei mphuaih tuna bammei khou tei pian mak khe; nangniw rui tu makmei langv tei nangniw tan rui niibin the! Nangniw rui nthanmei dui tei zangv lana zangv makmei langv tei sw tangnouh the!

¹⁹Nangniw rui katwan binloumei mphuaih tei alauziu asaekc rui tu the khatni sw tangnouhloumei dui tei zangv the.

²⁰“Kumhpui zaeng rui Kauh Liangmei RINGHPOUC ai rui sa e twmei thu nangniw lauziu tanhmei lev nsuanmei kak khou latzan sw puni the.

²¹Nangniw rui nsuanmei lauziu nunc ta kapaengc khou rui nun ganc the khatni diangc ganc the.

²²Tiki ai rui atuang lauziu nunc ta tei kanpat puni the kumna kaniw ta sina tisw dat lak khe- Ai rui atuang lauziu kathuicna ta latzan sw puni the kumna simei lev gaymei langc pat puni the.

²³Kaniw tuang gaenghpouc akhat na nai khang abangc David kumhmei bangc akhat ai rui tiilou puni the, kumcna kamei rui kaniw ta zauclou puni the.

²⁴RINGHPOUC ai rui kaniw guangc sw puni khatni abangc David kumhmei gaanv khat rui kaniw tuang dihsinpouc sw puni. Ai rui sa the.

²⁵Kaniw ta swkabiu kabaeng dat mak khang ai rui latdyng sw puni the. Alauziu nunc tei laupuk khou, ngouh khou giuga makna zip bam khang nwmbangc khouringc guay ta tei ai rui alay ganc puni the.

²⁶“Ai rui kaniw ta suaihiamlou puni khatni atuang nthanmei chyngbut khou tilungc nkuaylou puni. Ai rui kaniw khang kage naipui ganv khou tei suaihiam ting tiriulou puni.

²⁷Thingbang guay kathai nthai puni, kandih khou nap-bi nthai puni kumna meic kathuicna karamc karamc khou suc-rih maekna lungc puni. Ai rui amei nunc ta kaniw tuang kangriang swtaplouna kaniw ta bangh tisw bammei nunc baanc khou rui mpatlou pwkhou ai hei RINGHPOUC dyng e twmei kaniw thay puni.

²⁸Rav baihmei ta kalummei zaatc nunc rui kaniw tuang kwamlaa dat lak khe, khatni nwmbangc khouringc nunc rui kaniw ta swluai tu bam dat lak khe. Kaniw tei suc-rih ping makna lungc puni the, kumna kaniw ramh pingmei nai dat lak khe.

²⁹Ai rui kaniw khang phunling phunlu tigaylou puni the kumna kaniw khou nkow- ndaapcmei nai dat lak khe. Zaatc baihmei nunc rui kaniw ta sinnui dat lak khe.

³⁰Ai rui Isarael ta gaek bam e kumna Isarael hei amei nunc e twmei meic kathuicna rui thay puni the. Kauh Liangmei RINGHPOUC ai rui sa the.

³¹“Ai rui makuat bammei alauziu pang nangniw hei amei nunc e, kumna ai hei nangniw tuang Racguangc e,” twna Kauh Liangmei RINGHPOUC rui sa e.