Read Rongmei Naga EZEKIEL 35 Bible Online

EZEKIEL 35 - Rongmei Naga bible

EZEKIEL 35

¹RINGHPOUC rui akhou sa the,

²“Maansei nacle,” Edom ruc khou nang zaw puanc kahuhna ai rui samei lat hei sa tho.

³Kauh Liangmei RINGHPOUC ai rui sa e twna kumna sa o: He Edom chingcbut guayle, nang hei ai zauczihmei di the! Ai rui nang ta nsa karaengramv tiswlou puni the.

⁴Ai rui nang tuang kaidai guay swkasic karouclou puni the, nang kandic swkatupc tuaylou puni the; khou kiu ai hei RINGHPOUC dyng e twmei nangniw thay puni.

⁵“Nangniw hei Isaraelmei ta reynungc na rui zauczih guangmei tuang e kumna Isaraelmei ruc khou kanganv tanghmei dandi keylouna ryanra bammei ganv khou tei nangniw rui kaniw ta tina swluai the.

⁶Kumhpui zaeng rui, Kauh Liangmei RINGHPOUC ai hei ringhmei Racguangc swmei hei suai makmei kumcna theihmei hei nangniw khang suai dat mak khe. Nangniw hei tei duak dat ngam lak khe. Nangniw hei meicdowmei khou khuay naipui zaeng rui abiw-adowmei nangniw thei khou lay guang puni the.

⁷Ai rui Edom tuang chyngramv guay nsa karaeng tiswlou puni the kumna khou tei nggin ruanloumei guay ta ni swluai puni the.

⁸Luanghbut guay tei phouh rui padik puni the khatni chyng nzaengc guay tei suc-rih khou phouh rui padik puni the.

⁹Ai rui nang ti hei tingsaengzaeng nsa karaeng ramv tiswlou puni the, kumna nang tuang kaidai guay khou maansei lungc dat lak khe. Khou kiu ai hei RINGHPOUC e twmei nangniw thay puni.

¹⁰“Juda khatni Isarael hei RINGHPOUC ata kaney Racguangc sw bam sini kaney tuang kandic lev kazauhna nang rui kaney ta laa puni twna nang sa kan the.

¹¹Kumhpui zaeng rui, Kauh Liangmei RINGHPOUC ai hei ringhmei Racguangc swmei hei suai makmei kumcna nang rui amei nunc ta lunghpuamhmei, mamavmei khatni karaeng kanmei tuang phy tei tii puni the. Nang rui kaniw khou taancloumei tuang dandi tei nangniw ruc khou keylou bam the twmei kaniw thay puni the.

¹²Isaraelmei chingc guay tei ganc tazik chiklou the, hei tei nang ning swna sinsw key khang di the twna nang rui malana sw kanmei tei RINGHPOUC ai rui chu the twmei khou kiu nang thay puni the.

¹³Nang rui aruc khou gaengh swna ata ramh sak makna sa kanmei tei ai chu the.”

¹⁴Kauh Liangmei RINGHPOUC rui sa e, “Ai rui nang ta tina ganc tazik chikhlou tina nang bowkeymei khou tei kandih kapwm rui neihla puni the.

¹⁵Atuang Isarael ta swkasic-karoucmei ganv khou nang neihlamei kumcna kaniw neihla puni the. Seir tuang chyngbut guay, ngguay, Edom kandic kapwm ganc tazik chikhlou puni the. Khou kiu ai hei RINGHPOUC e twmei meic kathuicna rui thay puni the.”