Read Rongmei Naga EZEKIEL 36 Bible Online

EZEKIEL 36 - Rongmei Naga bible

EZEKIEL 36

¹RINGHPOUC rui sa the, “Maansei nacle, ai rui samei hei Isaraelmei tuang chyngbut guay khou tei dinclou o.

²Kauh Liangmei RINGHPOUC rui sa e twna kumna sa o: Isaraelmei ta zauczihmei nunc rui sinnuina sa the, ‘Ntaw thu mi reynungc tuang chyngbut guay tei aniw tuang di the cho!’

³“Kumhpui zaeng rui, Kauh Liangmei RINGHPOUC ai rui sa e twna sa o. Isarael tuang kainingmei zaatc nunc rui Isarael tuang chyngbut guay ta laa gutna kwamlaa the, kumna kaniw guayna rui Isarael ta tizak the.

⁴Kumhpui zaeng rui, Kauh Liangmei RINGHPOUC ai rui Isarael tuang chyngbut guay, duithuak khatni nzaengc guay, sw kasic karoucna gancloumei bamv guay, khatni kainingmei zaatc nunc rui kwamlaana khatni sinnuina gancloumei lungc taekmei kaidai guay nangniw guayna khou samei lat hei nangniw nking o.

⁵“Kauh Liangmei RINGHPOUC ai rui alungpuam thiu khou lungc kuay bammei zaatc nunc khou, nkunna Edom khou sa the. Kaniw rui malana khatni nuicna atuang kandic ta laa the khatni lauziu byn ramv guay laa kan the.

⁶“Kumhpui zaeng rui RINGHPOUC rui sa e twna Isarael kandic khou sa tho. Zaatc nunc rui kaniw ta tizakna sw kanmei khang tei rui alungpuamcna Kauh Liangmei RINGHPOUC ai rui samei lat hei Isarael tuang chyngbut guay, luanghbut guay, duithuak guay, khatni nzaengc guay khou salou o.

⁷Kauh Liangmei RINGHPOUC ai rui abaanc zay thauna Latdyng swna samei tuang e, mi kiu thu lungc nkuay bammei zaatc nunc ti hei tizaklou puni the.

⁸Tiki Isarael tuang chyngbut guay khou thingbang guay tei kanwang buan dat puni the khatni amei Isaraelmei nangniw khang thingbang guay kathai nthai dat puni the. Nangniw katumcna kai guang dat puni the.

⁹Ai rui nangniw khang kadanlouna bam e kumna ai rui nangniw tuang kandic ta lau tisuak datna phunling tilingc key dat puni the.

¹⁰Nangniw meic sing tikingc nkiuclou dat puni the. Nangniw tuang kaidai guay khou tei lungc dat puni the khatni sw kasic karoucna gancloumei guay tei kasiamh thanh dat puni the.

¹¹Ai rui khouringh khounah khatni maansei ta tikingckiuclou dat puni the. Nangniw kahunungc khang suangc meic sing mbu puni the, khatni nangniw nac nunc geic puni the. Ai rui nangniw ta khou tei reynungc lungc bammei tei kumcna tilungclou dat puni the, kumna reynungc suangc tilungcgay chingkhiuhlou puni the. Khou kiu ai hei RINGHPOUC e twmei nangniw thay puni the.

¹²Ai rui Isaraelmei amei nunc nangniw ta mi kandic khou tei lungh khang phungc guanglou dat puni. Hei tei nangniw tuang kandic sw dat puni, kumna nangniw nac nunc ta ti-nkow-ndaapc dat lak khe.

¹³“Kauh Liangmei RINGHPOUC ai rui sa e: Meic nunc rui mi kandic ta tei maansei zanc tumei twna kaw bammei khatni mi rui kandih nac nunc ta swmaan ngam the twna kaniw rui sa bammei hei nchumh the.

¹⁴Tiki mi hei ntaw khou rui thauna nangniw nac nunc swmaanmei maansei zanc tumei sw dat lak khe. Kauh Liangmei RINGHPOUC ai rui sa the.

¹⁵Mi kandic tei zaatc nunc rui sinnuimei tei chu dat lak khe. Mi kandic rui kanac nunc ta swmaan dat lak khe. Kauh Liangmei RINGHPOUC ai rui sa the.”

¹⁶RINGHPOUC rui akhou sa the,

¹⁷“Maansei nacle, Isaraelmei nunc hei kaniw kandic khou lungc bammei douc tei kaniw tuang lwnlung khatni kaniw tuang taanv rui kaniw rui mi kandic ta tei swtanac khwan the. Ntumei bwchaeng tatmei ganv khou kariak khou mphuammei kumc kaniw kheiliak tei akhang mphuam the.

¹⁸Kaniw rui mi kandic khou tei meicbiw meicdowmei zaeng rui khatni kaniw tuang ravmaengc nunc rui kaniw rui mi kandic ti hei swtanacmei zaeng rui ai rui kaniw ruc khou alungpuam tikeylou the.

¹⁹Ai rui kaniw ta kaniw lwnlung khatni kaniw tuang taanv zaeng ganc pat the, kumna kaniw ta zaatc baihmei kandic guay thangc alay ganclou the.

²⁰Kaniw rui tatloupui bamv kathuicna khou kaniw rui nthanmei azanc sw kasic the, kalam thu meic nunc rui ‘Mi nunc hei kaniw khang kaniw tuang Racguangc rui tiiloumei kandic ta mpatlouna tatmei nunc the,’ twna sa the.

²¹Hei tei rui nthanmei azanc sw kasic the, kalam thu Isaraelmei rui tatloupui bamv kathuic khou azanc sw kasic the.

²²“Kumhpui zaeng rui Kauh Liangmei RINGHPOUC ai rui Isaraelmei khang samei lat hei kaniw khou kumna sa ti tho: Ai rui taanc nimei hei Isaraelmei nangniw zaeng khang hamh e; tiki nangniw rui tatloupui bamv kathuicna khou sw zaklou kanmei azanc zaeng khang tei rui e.

²³Nangniw rui zaatc pang khou sw malalou kanmei daihmei azanc tei adih nthan cho twmei ai rui kaniw khou lyanlou pwkhou ai hei RINGHPOUC e twmei kaniw thay puni. Kauh Liangmei RINGHPOUC ai rui sa the. Ai hei nthanmei e twmei zaatc nunc khou lyan khang ai rui nangniw ta piu puni the.

²⁴Ai rui nangniw ta zaatc kathuic khatni kandih kathuic khou rui khuam dat lana nangniw tuang kandic khou phungc guanglou dat puni.

²⁵Ai rui nangniw ruc khou nthanmei dui kazinhlou puni kumna nangniw ta ravmaengc rui khatni baih baihmei rui sw tanacloumei guayna tei sw nthanlou puni.

²⁶Ai rui nangniw khou lungh thanh khatni lungning thanh tiilou puni. Nangniw tuang ntauh kumhmei lung tei nangniw khou rui laa gancna lat piumei lung tiilou dat puni.

²⁷Ai rui abumaengc nangniw lungc khou lou puni, kumna atuang latdyn guay tipiu puni khatni atuang latdanv guay ngaek chuyna ngaek bam khang tiswlou puni.

²⁸Khou kiu ai rui nangniw pupouc nunc khou tiiloumei kandic khou tei nangniw lungc dat puni. Nangniw hei amei nunc sw puni the kumna ai hei nangniw tuang Racguangc sw puni the.

²⁹Nangniw ta sw tanacmei kathuicna khou rui ai rui nangniw ta kanlou puni. Ai rui nangniw khang nap-bi tithuihlou puni the, kumna nangniw khou nap nkowmei nai dat lak khe.

³⁰Nkow-ndaapcmei rui nangniw ta zaatc pang khou tizak dat mak khang nangniw tuang tingthai ti-nthai geiclou puni the khatni nap-bi tithuihlou puni the.

³¹Nangniw tuang simei kheiliak guay taanc maanvloumei guay tei ningtowna nangniw tuang paap khatni khuay guay khang tei rui nangniw rana nangniw ta karaeng puni the.

³²He Isarael, hei guay hei nangniw zaeng khang rui ai taanc bam tuang hamh e twmei nangniw thay kan tu laa nii e. Nangniw tuang taanv khang rui nangniw zak kan tu laa nii e. Kauh Liangmei RINGHPOUC ai rui sa the.”

³³Kauh Liangmei RINGHPOUC rui sa e, “Ai rui nangniw ta nangniw tuang paap guay khou rui sw nthanlou pwkhou, ai rui nangniw tuang kaidai guay khou tilungclou dat puni kumna sw kasic kanmei guay tei tikasiamh thau dat puni.

³⁴Nangniw tuang laupuk guay tei nwmbangc mbaih ngam the twmei tat ruanloumei guay rui how the, tiki ai rui mi guay tei lau titaanc dat puni the.

³⁵Nwmbangc swna bammei bamv tei ntaw thu Eden pikwan mbaih dat the, khatni swra ngamna, asut laa ngamna, khatni sw kasic karoucna ganclou bam khwanmei kaidai tei ntaw thu meic lungc datna raengh raeng dat ngam dyng the twna meic kathuicna rui sa puni the.

³⁶RINGHPOUC ai rui swkasicloumei kaidai guay tei kasiamh thaulou dat the, khatni nsa karaeng ramv guay tei tithau padiklou dat dyng the twmei theic nsaekcloumei kainingmei zaatc nunc rui thay puni. Mi hei ai rui taanc puni twna nrianhloumei tuang the, mi hei ai rui taanc puni.”

³⁷Kauh Liangmei RINGHPOUC rui sa e, “Ai rui Isaraelmei ta akhou tina huayney dat puni, kumna ai rui kaniw ta lauziu pang ta kumc tikingckiuclou puni.

³⁸Khumngai ganv khou khaeng khang laaguangloumei lauziu rui Jerusalem tei padik bammei tei kumcna ntaw hei kasic karoucna ganclou bammei kaidai guay hei mi douc kiu thu maansei rui padik dat puni the. Khou kiu ai hei RINGHPOUC e twmei kaniw thay puni.”