Read Rongmei Naga EZEKIEL 37 Bible Online

EZEKIEL 37 - Rongmei Naga bible

EZEKIEL 37

¹RINGHPOUC tuang pumtan aruc khou keylouna katuang bumaengc rui ata zay thau lana maansei rouruc rui padikmei nzaengc baek akhat khou ata mpat keylou the.

²Kamei rui ata mi nzaengc tei zay nkuayna tizauc pwkhou mi khou tei kangc phui thiw thiumei maansei rouruc mpeyna ganc padiklou bammei ta how the.

³Kamei rui akhou sa the, “Maansei nacle, mi rou guay hei ringc dat puni dai cho?” “Kauh Liangmei RINGHPOUC, Hei tei nang na rui thay e!” twna ai mundaw the.

⁴Kamei rui sa the, “Mi rou guay khou tei ai rui samei hei dinclou o. Mi rou guay tei ai rui samei nking o twna sa ti tho.

⁵Kauh Liangmei RINGHPOUC ai rui sa e twna kumna sa ti tho: Ai rui nangniw khou thiu tiilou dat puni kumna tiringclou dat puni.

⁶Ai rui nangniw khou thuriang khatni zanhtei tiilou datna gih rui duam binlou dat puni. Ai rui nangniw khou thiu tiilou datna tiringclou dat puni. Khou kiu ai hei RINGHPOUC e twmei nangniw thay puni.”

⁷RINGHPOUC rui samei lat tei ai dinc the. Ai rui sana bam khou mi rou nunc tei kalung thaumei khwan chu the kumna mi rou guay tei guangc kariu thau dat the.

⁸Ai rui zaucna bam khou mi rou guay khou tei thuriang, zanhtei khatni gih rui duamliam kan the. Tiki mi pumc guay khou tei thiu thu maek he.

⁹Ravguangc rui akhou sa the, “Maansei nacle, mpwan khou tei alat hei dinc tho; maansei nacle, RINGHPOUC rui sa e twna kumna sa o: kabangc karuc, kaphai kadung thangc tuang mpwan guay guang tho; kumna mi pumc guay hei ringc dat khang thiu tiilou tho.”

¹⁰Akhou samei kumcna ai sa the. Mi pumc guay khou tei thiu gutlouna mi guay tei ringc thau datna ding thau the. Hei tei rihmei kang akhat sw the.

¹¹Ravguangc rui akhou sa the, “Maansei nacle, Isaraelmei hei mi rou guay kumc the. Kaniw hei kangc the, thei thangc gaymei guang dat nimei tuang agwnmei tuang maek khe twna kaniw rui sa the.

¹²Kauh Liangmei RINGHPOUC ai rui Isaraelmei tuang tarou guay laanclou dat puni the twna RINGHPOUC rui sa e twna kaniw khou sa ti tho. Ai rui kaniw ta laa pat dat puni the kumna Isaraelmei kandic khou phungc guanglou dat puni the.

¹³Amei nunc tuang tarou guay tei ai rui laanc pat datna kaniw ta laa pat dat pwkhou, ai hei RINGHPOUC dyng e twmei kaniw thay puni the.

¹⁴Ai rui kaniw khou atuang bumaengc tiilou datna tiringclou dat lana kaniw tuang kandic khou tilungclou dat puni. Kum pwkhou ai hei RINGHPOUC dyng e twmei kaniw thay puni. Mi hei taanclou puni twna ai rui nrianhloumei tuang the-ai taanclou puni. RINGHPOUC ai rui sa the.”

¹⁵RINGHPOUC rui akhou sa dat re,

¹⁶“Maansei nacle,” “Thingchiang akhat laana khou tei ‘Juda tuang guangcdic’ twna hylou o. Thingchiang baihmei akhat ni laa lana ‘Isarael tuang guangcdic’ twna khou tei hylou o.

¹⁷Mi thingchiang kanei tei katwan kanei sow kariulouna thingchiang akhat na kumh khang sin tho.

¹⁸Hei tei tabui kabac cho twna meic nunc rui thanv pw e thei,

¹⁹Kauh Liangmei RINGHPOUC ai rui thingchiang akhat tei Isaraelmei swna laa puni the, kumna mi chiang tei Juda tuang chiang khou nsuklou puni the. Mi kanei tei rui thingchiang akhat na swna abaanc khou sin puni the twna RINGHPOUC rui sa e twna daw tio.

²⁰“Nang baanc khou mi thingchiang kanei tei sinna meic nunc khou lyan o.

²¹Kumna Kauh Liangmei RINGHPOUC rui sa e twna kumna sa tio: Amei nunc ta tei kaniw rui tat kanmei bamv bamv khou tei rui laa pat dat puni, kumna kaniw guay ta tei khuam kaduaina kaniw ta kaniw tuang kandic khou phungc guanglou dat puni.

²²Ai rui kaniw ta Isarael tuang chyngbut khou zaatc akhat na tiswlou dat puni. Kaniw tei guangh akhat na bangc khou bam dat puni the, kaniw tei guanghdih kanei khang baic baicna bam dat lak khe.

²³Kaniw rana kaniw ta chanymei ravmaengc nunc rui swtanac dat lak khe, paapc rui ni sw mphuam dat lak khe. Kaniw rui paapc taancna ata guatna bammei panty khou rui kaniw ta tiduaklou puni. Ai rui kaniw ta sw nthanlou puni; kaniw amei nunc sw puni khatni ai rui kaniw tuang Racguangc sw puni.

²⁴Abangc David kumhmei guangc akhat rui kaniw tuang guangc sw puni. Kaniw tei guangh akhat bangc khou kariu puni the kumna kaniw atuang latdanv guay piu chuyna piu puni.

²⁵Ai rui abangc Jakob khou tiiloumei, kaniw pupouc nunc rui lunghmei kandic khou tei kaniw lungc puni. Khoutei kaniw tingsaengzaeng lungc puni, kaniw tounac nunc ni khou tei tingsaeng lungc bam puni. Abangc David kumhmei guangh akhat rui tingsaeng kaniw guangc sw puni.

²⁶Kaniw khou tei tingsaengzaeng giuga makna lungh khang ai rui kaniw lev latdyng swlou puni. Ai rui kaniw ta kasiamh thaulou puni kumna kaniw tuang meicsing ti-mbulou puni. Atuang, Ravkai kaniw kandic khou louna khou tei ai tingsaeng bam bam puni.

²⁷Khoutei ai kaniw lev lungc bam puni, ai rui kaniw tuang Racguangc khatni kaniw rui amei nunc swna bam puni.

²⁸Kaniw pang khou tingsaengzaeng nai bam khang khou tei atuang Ravkai swlou pwkhou ai RINGHPOUC e, Isarael ta amei nunc khang kadahlou the twmei zaatc nunc rui thay puni.”