Read Rongmei Naga EZEKIEL 38 Bible Online

EZEKIEL 38 - Rongmei Naga bible

EZEKIEL 38

¹RINGHPOUC rui akhou sa the,

²“Maansei nacle,” “Magog kandic tuang Mesek khatni Tubal guanghdic tuang daic liangmei guangh Gog biak thangc nang zaw puanc karihna Ravguangc rui samei lat hei dinc tho.

³Kamei hei daic liangmei RINGHPOUC tuang zauczihmei e twna kakhou sa tio.

⁴Ai rui kata zay kari nggui pat lana, kakhabaeng khou ntanh khuay goulouna kata khatni katuang ricmei guay ta zay tat puni. Katuang ricmei hei, takuanh nunc khatni rih pwan piuna takuanh tuanghmei ricmei hei kasing geic the. Rihmei kathuicna nggih khatni baengsaeng sinpary e.

⁵Persia, Sudan, khatni Libiamei nunc kazauh the, kumna kaniw kaguayna tei nggih khatni rih pyrun runpary e.

⁶Dihpy thangc Gomer khatni Beth Togarma kandic tuang rihphyan nunc ni kazauh the, khatni baih baihmei kandic guay tuang mei nunc ni kazauh the.

⁷Kamei ni chamdaanv khang khatni katuang ricmei guay ni chamdaanv khang latdanv pat tho twna kakhou sa ti tho.

⁸Zaatc mpeyna khou rui phungc guang datna suc-rih ping makna lungc bammei kandic khou rih key khang tingkwm mpeyna tangv ai rui kakhou latdanv tii puni. Kaganv mpeyna lungc taekna ganclou lana ntaw thu meic kathuicna suc-rih maekna lungc bammei Isarael tuang chyngbut guay khou kamei rui rih key puni.

⁹Kamei khatni katuang ricmei nunc khatni kathei laymei zaatc mpeyna lev twna guangna pwanzingh kumcna adow puni the khatni mi kandic tei muangh guam kumc guam liam puni the.”

¹⁰Kauh Liangmei RINGHPOUC rui Gog khou sa e: “Mi ganv kiu guang pwkhou, simei taanh khang nang kakhanh pat puni.

¹¹Raengh maekna, suc-rih ping makna lungc bammei kandic khou rih key khang ding puni the.

¹²Kaganv akhat khou sw kasic karoucna ganclou bam khwanmei kaidai guay khou lungc bammei nunc tuang nang kwamlaa puni. Kaniw ti hei zaatc pang khou rui khuam guangna ntaw kaniw khouringh khounah nruaihna khatni puatchei naina kandih tuang chaeng kariumei bamv khou lungc bammei nunc e.

¹³Sheba khatni Dedanmei nunc khatni Spain kaidai guay tuang lanvguanhmei nunc rui nang khou kumna thanv puni, ‘Nang tuang ricmei nunc ta khuam kaduai lana kwamlaa khang chamdaanv the cho? Daandi, kachaekc syan guay, khatni puatchei guay tei laana phungc tat khang sw bam tu cho?’ ”

¹⁴Kumhpui zaeng rui Gog khou tatna dinc tho twna Kauh Liangmei RINGHPOUC rui kumna sa e: “Mi nungc kiu amei nunc guay rui giuga makna lungc bammei ta tei nang thaylou ni tu hamh e.

¹⁵Rihmei kangdai, zaatc mpeyna khou rui kakhamei pumtan naimei rihmei khang, kaniw guay takuanh tuangcna, nang rui nduanghna dihpy duhmei nang bamv thangc rui guang puni.

¹⁶Nang rui amei nunc ta pwanzingh anuay kumc adow puni. Ai hei thow cho twmei zaatc nunc khou lyanlou khang, nang ta sinswna atuang taanv paan rui ai hei nthanmei e twmei lyanlou khang, kaganv guang tangc pwkhou, atuang kandic khou rih key khang ai rui nang ta thouclou puni.

¹⁷Isaraelmei ta adow khang ai rui meic gaanv khat ta thouc guang puni twna reydouc rui ai rui abangc Isaraelmei muczwng nunc khou sa guangmei tei nang ta the.” Kauh Liangmei RINGHPOUC rui sa the.

¹⁸Kauh Liangmei RINGHPOUC rui sa e, “Gog rui Isarael ruc khou rih key pwkhou kiu, ai alungpuamc thau puni.

¹⁹Ai alungpuam thiu khou sa patmei tuang twmei thu, mi nungc kiu Isarael tuang kandic khou baengla tanhmei kanukc puni.

²⁰Khav khatni nruayna, khouringh daihmei nthyammei katana khatni kandih nam ruc khou lungc bammei maansei katana ata pingna kadunh puni. Chyngbut guay bowkey puni, khow pangv key puni, khatni raengh guay pangv puni.

²¹Ai rui sw kasic karoucmei thiak zaatc guay tiguangna Gog ta tiping puni. Kauh Liangmei RINGHPOUC ai rui sa the. Gog tuang mei nunc tei kaniw nchamc khat khat ta adow dat puni.

²²Zeimiw zeihaeng khatni ravpyan rui ai rui kata dandi tii puni. Karuc khou, katuang ricmei khatni kabiak lianghmei rihmei nunc ruc khou dui bun kumhmei ting, nrihthai, khatni chuanghmei maipu mpat key puni.

²³Kumna ai hei daihmei khatni nthanmeipu e twmei zaatc nunc khou lyanlou puni. Ai hei RINGHPOUC e twmei hei khou kiu kaniw thay puni.”