Read Rongmei Naga EZEKIEL 39 Bible Online

EZEKIEL 39 - Rongmei Naga bible

EZEKIEL 39

¹Kauh Liangmei RINGHPOUC rui sa e, “Maansei nacle, Mesek khatni Tubal tuang guangc daihmei Gog khou ai hei kata zauczihmei e twna sa tio.

²Ai rui kata kabiak akhat thangc zaylou puni kumna duhmei dihpy kandic thangc rui Isarael tuang chyngbut guay nganv zay guang tangclou puni.

³Ai rui katuang saucpai ta kabaandau khatni katuang pailu ta kabaanzat khou rui dap ganclou puni.

⁴Gog, katuang ricmei nunc khatni kabiak lianghmei guay tei Isarael tuang chyng guay khou theiclou puni. Kaniw tuang pumc guay tei nruay thauruay khatni nwmbangc khouringc taek tisw puni.

⁵Kumna kaniw phouc tei ramvpuk khou theicna ganclou puni. Kauh Liangmei RINGHPOUC ai rui sa the.

⁶Ai rui Magog tuang ramv khatni suc-rih ping makna duipui paengc khou lungc bammei nunc ruc khou mai tii key puni. Khou kiu ai hei RINGHPOUC e twmei meic kathuicna rui thay puni.

⁷Nthanmei azanc hei amei Isaraelmei khou tithay nthanlou puni, kumna azanc hei tiswkasic dat lak khe. RINGHPOUC ai hei Isaraelmei tuang nthanmei Racguangc e twmei zaatc guay rui thay puni.”

⁸Kauh Liangmei RINGHPOUC rui sa e, “Ai rui sa bammei tingmik hei suai makna guang puni.

⁹Isarael tuang kaidai guay khou lungc bammei nunc rui kaniw tuang gancloumei rih na guay tei thing khang pat khuaic puni. Nggih, sauhpai, pailu, buy, khatni thingdangv rui mai sw puni kumna hei tei tingkwm chanei dik biuc nai puni.

¹⁰Kaniw rui nwmbangc gutna thing riam dat lak khe khatni thing khang ngouh thingbang guay gai dat lak khe, kalam thu ganclou duhmei rih na tei rui dik khang nai puni the. Kaniw ta kwamlaamei nunc tuang tei kaniw kwamlaa dat puni the.” Kauh Liangmei RINGHPOUC rui sa the.

¹¹RINGHPOUC rui sa the, “Mi ganv kiu guang pwkhou ai rui Gog khang Isarael kandic khou Theihmei duipui tuang neihpat khou naimei nggin tatmei nunc tuang Nzaengc khou tei tarou bam khang tii puni. Gog khatni: katuang ricmei nunc ta khou tei phuplou puni, kumna mi nzaengc tei ‘Gog tuang Rihmei nunc tuang Nzaengc’ twna kaw puni.

¹²Isaraelmei nunc rui mi theihmei guay ta tei phup lana mi bamv tei sw nthan pat dat khang bw chanei gut puni.

¹³Mi kandic khou bammei meic kathuicna rui kaniw ta phup nkhav puni kumna atuang rih ngammei tingmik khou kaniw ta mi khang rui chakhwang swlou puni. Kauh Liangmei RINGHPOUC ai rui sa the.

¹⁴Mi bw chanei tei luai pwkhou, mi kandic tei sw nthan pat dat khang meic gaanvsaekc ta kadah patlouna kaniw rui mi kandic kapwm khou tei ruan likna phouh guay ta phuna phup tat puni the.

¹⁵Kaniw rui kumna tat key tat ngangh bam khou maansei rou ariwmei kathuic khou kaniw rui madanhmei tuang daanclou puni the. Tarou chaumei nunc rui hei tei how lana hei tei Gog tuang ricmei nunc tuang Nzaengc khou phuplou tuang e.

¹⁶(Rihmei nunc twna phuakloumei kaidai mi daeng khou tei nai puni.) Kumna kandih tei sw nthan dat puni.”

¹⁷Kauh Liangmei RINGHPOUC rui akhou sa e, “Maansei nacle, ai rui nruay- thauruay khatni khouringh guay khang katpatloumei zanc tei tu khang mi guay ta tei kabangc karuc, kaphai kadung khou rui guang khang kaw tho. Hei tei kaniw Isarael tuang chyng guay khou tu dai tu khang the, hei khou tei kaniw zei zangv puni the khatni zanh tu puni the.

¹⁸Lauziuchic, lauziunac, ziuh khatni guaichic kamei gaymei nunc ta dow key kumc dow luailoumei rihmei nunc zanc tu khang khatni kandih guangc nunc tuang zei zangv khang e.

¹⁹Ai rui mi nunc ti hei khaengmei khouringc nunc ta kumc dow luailou pwkhou nruay thauruay khatni khouringh nunc rui kaniw thav tei tu diu saanv tu khang e khatni kaniw zei tei zangv mba mak saanv zangv khang e.

²⁰Kaniw rui takuanh nunc, takuanh ricmei nunc, rihmei nunc khatni rihphyan nunc zanc tei ai rui kasiamhloumei kuak bamv khou tu diu saanv tu khang e. Kauh Liangmei RINGHPOUC ai rui sa the.”

²¹RINGHPOUC rui sa the, “Ai rui zaatc nunc khou ahym tihow puni khatni atuang nchumhmei ta tei taancpat khang akumhna angamv sinsw bu cho twmei lyanlou puni.

²²Khoutei rui thau lana Isaraelmei nunc tei RINGHPOUC ai hei kaniw tuang Racguangc dyng e twmei thay puni the.

²³Isaraelmei nunc tei kaniw rui aruc khou paapc taanhpui zaeng rui meicbangc bam tatmei tuang e twmei zaatc nunc rui thay puni the. Ai rui kaniw ta ganclou tina kaniw ta zauczihmei rui kaniw ta ngamna rih bamv khou swluai kanmei tuang e.

²⁴Kaniw tuang tanacmei khatni simei khang tei biuhmei dandi tiina kaniw khou rui tatpatmei tuang e.”

²⁵Kauh Liangmei RINGHPOUC rui sa e, “Ntaw thu Jakob kikta Isaraelmei ta ai rui zauc nzianlou puni kumna kaniw ta tilungcgay chingkhiuhlou dat puni. Ai rui atuang nthanmei zanc ta gaek puni.

²⁶Kaniw tei suc-rih maekna, meic gaanv khat na rui sini tipingmei tuang maekna kaniw tuang kandic khou lungc bam dat pwkhou kiu kaniw rui ata guatna lunghpui zaeng rui kaniw adih zawsina lungc kan tu cho twmei amuc ngam puni.

²⁷Ai hei nthanmei e twmei mi zaatc mpeyna khou tei lyan khang ai rui amei nunc ta kaniw ta zauczihmei nunc kandic khou rui phungc guang dat puni.

²⁸Khou kiu ai hei RINGHPOUC kaniw Racguangc e twmei amei nunc rui thay puni. Kaniw rui hei tei thay nimei kiu thu ai rui kaniw ta meicbangc swna thouc pat the kumna ntaw thu kaniw guay ta tei khuam kaduai datna meic gaanv khat na ta sini ganclou duh makna phungc guanglou dat puni.

²⁹Ai rui Isaraelmei nunc ruc khou atuang bumaengc bun keylou puni kumna kaniw khou rui tatpat dat lak khe. Kauh Liangmei RINGHPOUC ai rui sa the.”