Read Rongmei Naga EZEKIEL 4 Bible Online

EZEKIEL 4 - Rongmei Naga bible

EZEKIEL 4

¹Ravguangc rui sa the, “Maansei nacle, lai kiaktauc paek laana nang hu khou lou lana mi khou tei Jerusalem kaidai maengc hylou o.

²Hei daeng khou tei rihlyn khunc pang, rihmei nunc zypui, khatni rigaanv kai sw ngguilou tho.

³Ntanh paek akhat laana mi kaidai tei lev nang kak khou raengh swna daengclou tho. Mi tuang kaidai biak tei nang zaw karih lana mi kaidai ta tei kuak nimei lwn nang rui sw o. Mi hei Isaraelmei khang taanv rui lyanloumei tuang e.

⁴“Mi tangv tei nang tuang baandau biak thangc zip key o kum pwkhou Isaraelmei tuang khuay tei nang ruc khou ai rui lou puni.

⁵Nang mi khou tei zaeng 390 kaniw tuang khuay zaeng khou tei rui ryanrana bam puni. Kaniw tuang tingkwm akhat dandi tei nang khou zaeng neih khat tiphungcloumei tuang e.

⁶Hei tei luai pwkhou nang tuang baanzat biak thangc karih pat datna Juda tuang khuay khang rui zaeng 40 ryanra o. Hei tei kaniw tingkwm 40 dandi phungc nimei tuang e.

⁷“Ding bin bammei Jerusalem ta tei zaucna nang baancpwam ntyngna mi ruc khou tei ravmun dinc tho.

⁸Nang baanzat baandau karih nuh mak khang mi akhaengv nimei tingmik tei luai mak saanv ai rui nang ta karakcna lou puni.

⁹“Gehu, sipian, karuc thw, biluai thw, napmalaih, khatni sipian daihmei guay hei laana kani kariuna ntyan kasiamh o. Hei tei nang zaeng 390 baandau biak zipna bammei ganv khou tei tu khang the.

¹⁰Nang zaeng neihkhat khou gram 230 tuang ntyan rui tu biuh nina e, hei tei nthuanh nganvna tu tangc nina e.

¹¹Dui ni karyan kadath na naina, zaeng neihkhat khou chabuangc kanei na zangv nina e.

¹²Maansei bav kang rui mai sw lana mi khou tei nang tuang ntyan tei kabic nina e, kumna hei tei meic geihna howmei bamv khou tu nina e.”

¹³RINGHPOUC rui sa e, “Isaraelmei nunc ti hei ai rui kandih baih baih thangc zinphaklou pwkhou, latdanv khou tu riu twna saloumei kaguay tei tu pw nimei tei mi hei rui lyanmei tuang e.”

¹⁴Tiki ai rui kumna mundaw the, “Kauh Liangmei RINGHPOUC, ai nuh mak ge! Ai ata swtanac zat mak ge. Ai alauc khou rui thauna khouringh karana theihmei zanc, khoumang rui swluaimei zanc nganvna ai tu zat mak ge. Nthan makmei taek akhat na sini ai tu zat mak ge.”

¹⁵Ravguangc rui sa the, “Gay the, maansei bav phaan guaih bav rui piu dat tho, guaih bav tuang mai khou tei nang tuang ntyan raw nina the.”

¹⁶Kamei rui sa dat re, “Maansei nacle, ai rui Jerusalem khou ntyan tiguang taan puni the. Meic nunc tei lunghgeic chwnswna taektw karyan kadath naina tu puni the, dui ni ndatna zangv puni the.

¹⁷Kaniw tei ntyan ni dui ni tu khang, zangv khang maek puni the, kaniw lungh ryanra puni the, kaniw tei kaniw tuang paap zaeng rui kangc key puni the.”