Read Rongmei Naga EZEKIEL 41 Bible Online

EZEKIEL 41 - Rongmei Naga bible

EZEKIEL 41

¹Mi tangv tei kamei rui ata kachungmei kailangv, Nthanmei Bamv khou nduangh gut the. Mi khou tei gutmei chaeng tei kamei ndat the: hei tei chowbuk charuk nthuk ge,

²khatni chowbuk ruh daic e; khatni kanaek kanei tei chowbuk panguh nsumei ngaengsaengc nai suak ge. Kamei rui mi kailangv tei ndat the: hei tei chowbuk 40 saengc e, khatni chowbuk 20 daic e.

³Mi tangv tei kamei kalungc liangmei kailangv thangc gut the. Mi khou tei gutmei chaeng tei kamei rui ndat the: Hei tei chowbuk kanei nthuk ge khatni chowbuk charuk daic e, khatni kadaeng kanei tei chowbuk chanei nsumei ngaengsaengc nai suak ge.

⁴Kamei rui mi kailangv tei ni ndat the, hei tei kasaeng kadai chowbuk 20 e. “Mi hei Nthan Liangmei Bamv the,” twna kamei rui akhou sa the.

⁵Mipu tei rui Ravkai tuang kalungcmei ngaengsaengc tuang nsumei tei ndat the, kumna hei tei chowbuk charuk ge. Mi tuang ngaengsaengc khou tei chowbuk padeihmei kailangv lau launa rui Ravkai tei sw ngguilou e.

⁶Mi kailangv guay hei kathaek kathumh e kumna kathaek akhat khou kailangv tamruc tamruc nai e. Kailangv guay tei ngaengsaengc khou lylou khang Ravkai tuang kapaengcmei ngaengsaengc tei kai thaek kathuic khou tei kabangcmei kai thaek khang tei suangc mpu e.

⁷Kumna Ravkai tuang ngaengsaengc tei, kapaengc thangc rui zauc pwkhou, katwan nganvna kasu nchamc kumna howlou the. Ravkai tuang kapaengc biak ngaengsaengc khou tei, kailangv guay paengc khou tei phaykhuat daihmei kanei swlou e, kumna mi khou tei rui kabangcmei thaek khou rui nchungmei thaek khou khatni karucmei thaek khou ku nuh khang e.

⁸Ravkai daeng guay tei kaisangh nai nggui e, mi daeng khou kailangv guay tuang kabamv tei chowbuk charuk charuk saengc e.

⁹Kailangv tuang kapaengcmei ngaengsaengc nsumei tei chowbuk panguh e.

¹⁰Kailangv nunc khatni amuh nunc tuang kailangv khupzulou makmei kaikak chowbuk 20 Ravkai daeng nai suak ge.

¹¹Khupzulou makmei kaisangh biak khou rui dihpy lev dihba biak thangc kaimun kanei nai e. Mi kaimun kanei kak tei chowbuk panguh nsa ramv nai e.

¹²Mi kaimav nsa ramv tin khou Ravkai tuang neihkey biak thangc chowbuk 90 saenghmei chowbuk 70 daihmei kai akhat nai e; mi tuang ngaengsaengc tei chowbuk panguh nsu e.

¹³Mipu tei rui Ravkai tei ndat the, kumna hei tei chowbuk 100 saengc e. Ravkai kaithei khou rui nsa ramv tei twan patna neihkey biak thangc Ravkai tin tei nganvna chowbuk 100 saengc e.

¹⁴Ravkai kaimav saenghmei tei, baanzat baandau khou naimei nsa ramv tei kazauhna chowbuk 100 muay e.

¹⁵Kamei rui Ravkai saanvsaengh tei, baanzat baandau khou naimei kaimav tei kazauhna neihkey biak thangc ndat key the, kumna hei tei chowbuk 100 re. Ravkai, Nthanmei Bamv, khatni Nthan Liangmei Bamv gut nimei kailangv guay tei

¹⁶kandih khou rui kailat langv tei thingpaek rui daengc e. Mi kailat guay hei mbangh nuh e.

¹⁷Ravkai tuang kalungcmei ngaengsaengc, kaimun kauh tei ramh maengc nai e.

¹⁸Tadanv bang khatni kerubim nunc maengc nai e. Kailangv kapwm khou tei kamaengc kanei tei hylou tarina nai e. Kerubim kathuic tei kazaw kanei kanei nai e:

¹⁹Maansei zaw tei rui tadanvbang akhat biak thangc karih e khatni kamangliangpui zaw kumhmei akhat rui tadanv bang biak tei karih e. Hei tei kumcna ngaengsaengc kaguay khou tei nai suak the.

²⁰Kandih khou rui thauna kaimun py nganv hei tei kumna nai suak ge. Hei tei chowbuk ruh kumna swlou the.

²¹Nthanmei Bamv tuang tiangh guay tei kasu padeih tei nchamh e. Nthan Liangmei Bamv gut nimei kaimun daeng khou

²²thing tuang ravchapaeng akhat nai e. Hei tei chowbuk kathumh kauh e khatni chowbuk kanei daic e. Mi tuang kakwn tiangc guay, mi tuang bamv, khatni kadaeng guay tei thing e. Mipu tei rui akhou sa e, “Mi hei RINGHPOUC hu khou naimei paeng e.”

²³Nthanmei Bamv khou gut nimei chaeng twan khou kaimun akhat nai e khatni Nthan Liangmei Bamv khou gut nimei chaeng twan khou tei ni kaimun akhat nai muay e.

²⁴Mi kaikhamv kanei tei nchung khou laanc ntamvmei kaikhamv nai e.

²⁵Ngaengsaengc khou hiakloumei tei kumcna Nthanmei Bamv khou gut nimei kaikhamv nei khou tei ni tadanv bang maengc lev Kerubim maengc hiaklou e. Kaimun khou tei kaizaengc biak thangc thing tuang kaikhamv nai e.

²⁶Mi kailangv guay tuang naek guay khou tei kailat nai e, kumna ngaengsaengc guay tei tadanv bang maengc rana hylou e.