Read Rongmei Naga EZEKIEL 42 Bible Online

EZEKIEL 42 - Rongmei Naga bible

EZEKIEL 42

¹Mi tangv tei mipu tei rui ata kapaengcmei kaimav khou tei nduangh guangna Ravkai tuang dihpy biak thangc naimei kai akhat khou nduangh guanglou the. Mi kai tei Ravkai tuang neihkey biak tin thangc naimei kai khou rui duc sih mak khwan e.

²Mi kai tei chowbuk 100 saengc e khatni chowbuk 50 daic e.

³Mi kai naek akhat tei Ravkai naek khou chowbuk 20 tuang ramv nai suakmei biak tei karih e kumna kanaek akhat tei rui kapaengcmei kaimav tuang ntauh bamcloumei biak tei karih e. Mi kai tei kathaek kathumh swlou e, kabangcmei tei rui karucmei suangc daic maih raph rap be.

⁴Mi kai tuang dihpy biak tei chaeng daic e khatni chowbuk 100 saengc e, kumna mi chaeng biak tei kai khou tat gutmei kaimun nai e.

⁵Karuc liangmei thaek tuang kailangv guay tei nchungmei thaek tuang kailangv guay khang suangc nthyam e kalam thu mi thaek tei nthyam maih gut re.

⁶Mi kai tuang kathaek guay tei kaimav khou naimei kai guay kumcna tiangdaic rui tung mak ge.

⁷Mi kai kabangcmei tuang kapaengcmei ngaengsaengc tei kasaanv kapaek akhat thu chowbuk 50 nsuc e.

⁸Mi langv tei kalungc phou mak ge. Mi ngaengsaengc tuang kapaek akhat chowbuk 50 lungc khou tei thu kailangv nai dat geic e. Karucmei kai thaek khou tei thu mi kai saanvsaengh tei kailangv mpeyna nai suak ge.

⁹Mi kailangv kanei bangc khou kai twan neihpat biak tin khou tei rui ngaengsaengc tei kahouh the, mi khou tei kapaengcmei kaimav thangc pat nimei kaimun tei nai the.

¹⁰Mi Ravkai tuang dihba biak thangc ni mi kai tei lev nchamc raph rapmei kai akhat nai e. Hei tei ni Ravkai tuang neihkey biak tin thangc naimei kai khou tei rui duh mak ge.

¹¹Mi kai kaimav khou tei ni dihpy biakmei kai khou tei kumcna chaeng nai muay e. Mi tuang chaeng saeng kadai, kalwn khatni tat gutmei kaimun tei akhat tei lev nchamc raph rap de.

¹²Mi kai tuang dihba biak thangc kailangv guay bangc khou tei kaimun akhat nai e, hei tei neihpat biak tin ngaengsaengc kahouhmei bamv khou tei e.

¹³Mipu tei rui akhou sa the, “Mi kai kanei hei nthanmei e. Mi kai nei hei RINGHPOUC hu khou guangmei amuh nunc rui nthanmei puatkat tumei bamv e. Mi tuang kailangv guay hei nthanpui zaeng rui nthanmei nap-bi puatkat, paapc khang khaengmei puatkat khatni khangc datmei puatkat guay hei mi kai lungc khou tei lou e.

¹⁴Amuh nunc tei Ravkai lungc khou bam lana kapaengcmei kaimav thangc pat nii e thei kaniw Ravguangc tuang siamruai swmei ganv khou piumei pheybaan guay tei mi kai khou tei ganclou duc nina e. Kaniw rui pwan baihmei piu datna meictin guang kaduai bammei bamv khou tei pat nina e.”

¹⁵Ravkai tuang kalungcmei ramv tei ndat tang pwkhou, kamei rui ata neihpat raengckat khou rui nduangh patna Ravkai tuang kapaengc ramv tei ndat the.

¹⁶Kamei rui ndathmei thing tei sinna neihpat biak tei ndat the, hei tei chowbuk 500 e.

¹⁷Kamei rui dihpy thangc ndathmei chei rui ndat the hei tei chowbuk 500 khwan e.

¹⁸Dihba biak tei kamei ndat the hei tei chowbuk 500 khwan e.

¹⁹Mi tangv tei neihkey biak thangc ndat dat pwkhou chowbuk 500 khwan e.

²⁰Kumna kanaek kathuic khou chowbuk 500 saengc daihmei ramv tei raengh raeng binlou the. Mi raengc tei rui nthanmei lev nthan makmei ta raeng langclou the.