Read Rongmei Naga EZEKIEL 47 Bible Online

EZEKIEL 47 - Rongmei Naga bible

EZEKIEL 47

¹Mipu tei rui ata Ravkai chaengmun thangc tei nduangh pat dat the. Chaengmun bangc khou tei rui dui luangc patna Ravkai kaimav karihmei neihpat biak tei luangc pat the. Ravkai tuang dihba biak tei rui luangc keyna ravchapaeng tuang dihba biak tei luangc kaan key the.

²Mi tangv tei mipu tei rui Ravkai ramv lungc khou tei rui dihpy raengcmun khou rui nduangh pat datna neihpat biak karihmei raengcmun khou nduangh guanglou the. Mi raengcmun tuang dihba biak tei rui duithuak launa luangc pat re.

³Katuang ndathmei thing rui mi duithuak tei neihpat biak chowbuk 1,000 ndat key the kumna ata mi duithuak khou tei ruan key khang sa the. Mi dui tei phaytyang kamv na khwan e.

⁴Mi tangv tei mipu tei rui chowbuk 1,000 ndat key dat the, hei tei khubut kamv na khwan e. Mi tangv tei chowbuk 1,000 ndat key dat re, hei tei asian langv nthuk khwan e.

⁵Mi tangv tei chowbuk 1,000 ndat key dat re, hei khou tei dui nthuk langvna ai tat dat ngam mak khe. Hei tei zaek makna kaan dat ngam mak khe.

⁶Kamei rui akhou sa e, “Maansei nacle, mi guay hei thay chuyna thaylou tho.” Mi tangv tei mipu tei rui ata mi duithuak paengc khou tei nduangh guanglou dat the,

⁷Kumna ai khou tei guang tangc pwkhou mi duithuak paengc kanei khou tei thingbang mpeyna nai bammei ta ai how the.

⁸Kamei rui akhou sa the, “Mi duithuak hei neihpat biak thangc mi kandic khou tei luangc suak keyna Jordan Nzaengc khou luangc keyna Theihmei duipui khou luangclou the. Hei tei Theihmei duipui khou luangclou pwkhou mi zeic khou naimei ntey dui tei luangc gancna duithan gaymei chungclynlou the.

⁹Mi duithuak tei luangclou lou khou khouringh khounah khatni khav-ga zaatc guayna nai puni. Mi duithuak tei rui Theihmei duipui dui ta duithan tiguanhlou puni, kumna hei tei luangclou loumei bamv khou hei tei rui ringhmei phungc guang puni.

¹⁰Engedi khou rui Eneglaim nganv duipui tin khou tei khav nymmei nunc bam puni, kumna khou tei kaniw tuang chiakc phauc padiklou puni. Mediterranean duipui khou naimei khav zaat azuh khou tei nai puni.

¹¹Tiki duipui paengc khou naimei duidym khatni duibaek guay tei thu duithan tiswlou lak ge. Hei tei ntey patmei bamv khang ganclou puni.

¹²Mi duithuak paengc kanei khou tei ramh thai bang zaat guay thau suak bam puni. Mi bang guay tei kanwang ngguaih dat lak khe khatni kathai nthai nthaekc dat lak khe. Bw pum kathai kathanc kathanc nthai puni kalam thu Ravkai khou rui luangc patmei dui rui makuat the. Kathai rui taektw sw puni, kanwang rui puc sw puni.”

¹³Kauh Liangmei RINGHPOUC rui sa e, “Mi hei Isaraelmei kaikhwang 12 khang, Josep kaikhwang rui kadam kanei laana nzanh nimei ramv langv the.

¹⁴Nangniw tounac nunc rui mi ramv hei laa puni twmei hei atuang nthukmei latdyng the; kumhpui zaeng rui mi hei kaniw pang khou nchamc raph rapna nzanhlou nina e.

¹⁵“Dihpy biak ramvrei hei Mediterranean duipui khou rui thauna neihpat biak karih patna Hethion kaidai khou patlouna, hei khou tei rui Hamat Chaeng, Zadat kaidai,

¹⁶Berotha khatni Sibraim kaidai (mi nei hei Damaskas guanghdic lev Hamat guanghdic ramvrei kak khou nai e), khou patlouna Tikon kaidai (Hauran guanghdic ramvrei khou e) patlou the.

¹⁷Heikumna dihpy biak ramvrei hei Mediterranean duipui khou rui neihpat biak suic patna Damaskas lev Hamat kak khou patna Enon kaidai khou keylou the.

¹⁸“Neihpat ramvrei hei Damaskas lev Hauran tuang ramvrei khou rui dihba biak Jordan duithuak suic keyna Theihmei duipui khou naimei Tamar khou suiclou e.

¹⁹“Dihba biak ramvrei hei Tamar khou rui Kades khou patlouna Izip ramvrei khou key alamvlouna Mediterranean duipui khou suiclou the.

²⁰“Neihkey biak ramvrei hei Mediterranean duipui tei suic nganghna Hamat Chaeng tuang neihkey biak khou naimei bamv akhat khou sowlou the.

²¹“Mi ramv guay hei Isaraelmei kaikhwang guay khang nzanh tho;

²²mi hei nangniw tuang ramv sw nzut nina the. Ramv tei nzanh pwkhou nangniw pang khou lungc bammei zaatc baihmei nunc khatni khou hei kaniw nac puancloumei nunc khang ni kaniw dam naina nzanhlou nina e. Kaniw ta tei ni Isaraelmei kumcna kakhanhlouna Isaraelmei lev nchamcna kaniw san zaucna kadah nchamc muay nina e.

²³Zaatc baihmei nunc tei ni kaniw rui lungc bam bammei bamv khou tei kaniw ramv khang ni tiilou nina e. Kauh Liangmei RINGHPOUC ai rui sa the.”