Read Rongmei Naga EZEKIEL 5 Bible Online

EZEKIEL 5 - Rongmei Naga bible

EZEKIEL 5

¹RINGHPOUC rui sa the, “Maansei nacle, baengsaeng ntukmei laana nang mwanghiw khatni nang py guat ro. Guat patloumei hiw tei karith nthau lana kaphuam kathumh khang damc pat ro.

²Nang akhaengvmei ganv tei luai pwkhou kaphuam akhat tei kaidai lungc khou ntei tho. Nang rui kaidai paengc khou pat pwkhou kaphuam akhat tei baeng rui dan puat tho. Kaphuam akhat tei rui mpwan khou phaiclou tho, mi ta tei ai baengsaeng sinna nthau puni the.

³Sam asaekc laa patna nang tuang phey tin khou litlou o.

⁴Mi khou tei rui asaekc laa pat datna mai khou phaiclou o, hei tei raw mutsut kan di tho. Khoutei rui mai tei Isaraelmei zaat kapwmna khou chuangc paengv pat puni the.”

⁵Kauh Liangmei RINGHPOUC rui sa the, “Jerusalem ta zauc lo. Ai rui kata kandih chung khou, baih baihmei kandic rui kadaeng nkuayna lou the.

⁶Jerusalem rui alatdanv guay ta liam the, kamei hei baihmei zaat nunc khang suangc sini si e, kadaeng khou nai haengv bammei kandic guay suangc kamei lat piu mak liang e twmei kamei rui lyan the. Jerusalem rui atuang latdanv guay laa mak khe khatni atuang latdyn guay ngaek mak khe.

⁷Kauh Liangmei RINGHPOUC ai rui sa bammei hei nking o, he Jerusalem. Nangniw rui alatdyn piu makna khatni alatdanv guay ngaek makna baih baihmei zaat guay suangc sini sw katuakc geic liang the. Nangniw rui zaatc baihmei nunc thak tei lay luaih the.

⁸Kumhpui zaeng rui ai hei nangniw ta zauczihmei di the twna Kauh Liangmei RINGHPOUC ai rui nangniw khou sa bammei tuang e. Zaatc kaguayna rui how nuhmei bamv khou ai rui nangniw khou latzan keylou puni the.

⁹Ai rui karaengmei tuang taanv tei nangniw taancna bammei zaeng rui, ai rui tii zat zat makmei khatni tii ni tii dat lakmei dandi Jerusalem ruc khou tii puni the.

¹⁰Kum pwkhou Jerusalemmei puipu nunc rui kaniw nac nunc ta tu puni the, kaniw nac nunc rui kaniw puipu ta tu puni the. Ai rui nangniw ta dandi tii puni the kumna theic nsaekcloumei nunc ta tei kabamv kathuicna khou zinphaklou puni.

¹¹“Kumhpui zaeng rui, ai hei ringc bammei Ravguangc swmei hei suai makmei kumcna—mi hei Kauh Liangmei Ravguangc lat re nangniw rui taanc bammei simei khatni chanymei taanv guay rui atuang Ravkaita swtanacloumei zaeng rui zauzian nai dat makna ai rui nangniw ta dow key puni the.

¹²Nangniw phuam thumh patna akhat rui ravpyan khatni nkow-ndaapcmei hu khou kaidai lungc khou theiclou puni the; phuam akhat rui kaidai paengc khou baengsaeng hu khou theic puni the, khatni nkhamhmei phuam tei rui mpwan khou nrou phaklouna baengsaeng rui nthau puni the.

¹³“Alungpuam areic hei pian mak saanv ai rui nangniw ta sw puni the. Mi guay hei pat pwkhou RINGHPOUC ai rui nangniw tuang lwm nuh makmei lwnlung guay zaeng rui lungpuamcna mi guay hei salou changhmei tuang dyng e twmei thay puni the.

¹⁴Nangniw daeng khou lungc haengv bammei zaat nunc rui nangniw ta tat ruanlou pwkhou malana sinnui sinnulou puni the.

¹⁵“Ai rui nangniw ruc khou areic patna khatni alung puamcna dandi tii pwkhou nangniw daeng khou lungc haengv bammei zaat nunc tei ping puni the. Kaniw rui nangniw ta karaengna zauc puni khatni sinnui puni.

¹⁶Nangniw khou nkow-ndaapcmei tiguang puni. Nangniw ta swkamut kamai khang tii guangmei pailu rui biw kumh ndaapcmei tuang ramsu tei nangniw akhaengv puni the.

¹⁷Nangniw nac nunc tei nkow-ndaapcmei khou khatni khouringh khounah hu khou theic puni the, nangniw rui ravpyan, ravrih khatni suc-rih khou theic puni the. RINGHPOUC ai rui sa the.”