Read Rongmei Naga EZEKIEL 6 Bible Online

EZEKIEL 6 - Rongmei Naga bible

EZEKIEL 6

¹RINGHPOUC rui akhou sa the,

²“Maansei nacle,” “Isaraelmei tuang chyngbut guay biak thangc tei zauc karihna kaniw khou tei atuang lat hei sa ti tho.

³Kumna sa ti tho, “He Isaraelmei tuang chyngbut guay, Kauh Liangmei RINGHPOUC tuang lat hei nking o. Kauh Liangmei RINGHPOUC rui chyngbut guay khou, luanghbut guay khou, kabaek guay khou, nzaengc guay khou kumna sa e: meic nunc rui ravmaengc kalum bammei chyng twan guay tei swmutsutlou khang baengsaeng thouc guang puni the.

⁴Ravchabamv guay tei swra key puni the, agaw ravchabamv guay tei sw bak puni the. Khoutei bammei maansei guay ta tei kaniw tuang ravmaengc hu khou swluai puni the.

⁵Ai rui Isaraelmei tuang phouh guay tei nrou zinzalou puni the; kaniw tuang rouruc guay tei ravchabamv daeng daeng khou ganczin ganczalou puni the.

⁶Isaraelmei tuang kaidai guay swkamut kamailou puni the, kaniw tuang agaw ravchabamv guay sw bak paruatlou puni the, khatni kaniw rui kasiamhloumei guay amaan puni the.

⁷Kabamv kathuicna khou meic nunc ta tei swluailou puni the, kumna theic nsaekcloumei nunc rui ai hei RINGHPOUC e twmei thay puni the.

⁸“Ai rui meic gaanvsaekc ta thu kanduaklou puni kumna kaniw ta zaatc nunc ding khou zin phaklou puni.

⁹Khoutei kaniw bangh swna lungc puni. Khoutei kaniw ata ningtow puni the khatni kaniw rui akhou lwmnuh makmei swna ata ganclouna ata suangc ravmaengc ta kahawna tat kanmei zaeng rui kaniw ta riapna tizakcloumei tuang the twmei kaniw thay puni the. Kaniw rui simei taanv khatni chanymei taanv taanclou kanmei khang tei kaniw rana kaniw ta karaeng puni.

¹⁰Ai hei RINGHPOUC e khatni ai rui sa bammei lat guay tei nsa mpin bam tuang hamh e twmei kaniw thay puni.”

¹¹Kauh Liangmei RINGHPOUC rui sa the, “Isaraelmei rui taanclou kanmei simei taanv khatni chanymei taanv guay khang tei nangniw baanc kaphina khatni phay kadymna kap la tho. Kaniw tei suc-rih khou, nkow-ndaapcmei khou khatni ravpyan hu khou theic puni the.

¹²Duh thangc bammei nunc tei ravpyan khou theic puni; kadaeng khou bammei nunc tei suc-rih khou theic puni; theih nsaekcmei nunc tei nkow-ndaapcna theic puni. Kumna alungpuam guay tei kaniw ruc khou keylou puni the.

¹³Luanghbut kauhmei ruc khou, chyng twan chyng twan khou, ndiakcmei mphauhbang bi bi khou, kaniw rui ravkhaengna bammei bamv kathuicna khou phouh nunc tei kaniw tuang ravmaengc nunc khatni ravchabamv guay daeng khou ganc padiklou puni the. Khou kiu ai hei RINGHPOUC dyng e twmei meic kathuicna thay puni the.

¹⁴Ngguay, ai rui abaancpwam ntyng patna kaniw tuang kandic tei swkamut kamailou puni the. Dihba thangc tazikramv khou rui thauna dihpy thangc Ribla kaidai nganv, Isaraelmei lunghmei ramv akhat na sini daekloumei tuang maekna maansei lungh makmei ramv tiguanhlou puni the. Khou kiu ai hei RINGHPOUC dyng the twmei meic kathuicna thay puni.”