Read Rongmei Naga EZEKIEL 7 Bible Online

EZEKIEL 7 - Rongmei Naga bible

EZEKIEL 7

¹RINGHPOUC rui akhou sa the,

²“Maansei nacle, Isaraelmei kandih khou Kauh Liangmei RINGHPOUC ai rui sa bammei kiu mi hei e: Mi kandih kapwm tuang nkhamhmei kiu guang pw the!

³“He Isaraelmeile, nkhamhmei ganv kiu guang pw the. Nangniw taanv tei ai latzan swna bam the kumna alungpuam nangniw ruc khou key puni the. Nangniw rui taanc kanmei chanymei taanv guay tuang phy tei ai tii puni the.

⁴Ai rui nangniw ta nsaekclou dat lak khe, nangniw ta zauc nzianlou dat lak khe. Ai hei RINGHPOUC dyng e twmei nangniw thay khang nangniw rui taanc kanmei chanymei taanv guay khang ta ai rui nangniw ta dandi tii puni the.”

⁵Kauh Liangmei RINGHPOUC rui sa e, “Sw kamut kamaimei hei nangniw ruc khou katwan katwanna guang puni the.

⁶Mi hei nangniw khang luaimei di the. Nangniw hei luai the.

⁷Mi kandic khou lungc bammei nangniw khang nkhamhmei kiu guang pw the. Chyng twan khou naimei ravbamv guay khou tei khumngai khwan hamhna pingna kauhmei khwan padik nimei ganv guang pw the.

⁸“Asaanh makna alungpuam hei nangniw ruc khou bun keylou puni the. Nangniw rui taanc kanmei taanv guay tei ai latzan swna bam the. Nangniw tuang chanymei tuang taanv guay khang tei rui nangniw khang dandi tii puni the.

⁹Ai rui nangniw ta daeklou dat lak khe, nangniw ta zauc nzianlou dat lak khe. Ai hei RINGHPOUC dyng e, ai rui nangniw ta riap bammei tuang e twmei nangniw thay kan diu khang nangniw rui taanc kanmei chanymei taanv guay khang tei ai rui nangniw ta dandi tii puni the.”

¹⁰Isaraelmei ta swkamut kamai nimei tingmik kiu guang pw the. Meicngam meicliammei tuang taanv hei kami tangc the. Daihriw swmei ni kanganv tangc the.

¹¹Meicngam meicliammei rui simei ti-mbu hay hay the. Kaniw khang ramh akhat na sini nai dat ni tuang hamh the, kaniw lanv ni, kaniw tuang tik-hym ni nai dat lak khe.

¹²Kaganv kiu guang pw the. Zuanhmei khang ni liumei khang ni kabah nai lak nimei ganv guang khang katingmik ana the, kalam thu meic kathuicna khou Ravguangc tuang dandi guang puni the.

¹³Lanvguanhmeipu tei katuang amaan kanmei tei zuanc pat dat khang kapanty nai ni tuang hamh the, kalam thu Ravguangc lungpuam hei meic kathuicna khou nai the. Meicsimei nunc tei ringc pat dat ngam pw lak khe.

¹⁴Ramh guayna chamdaanvna bianggun amuanna bam sini, rih adow khang tei pat nimei meic maek khe, kalam thu meic kathuicna khou Ravguangc tuang lungpuam keylou puni the.

¹⁵Kapaengc thangc rui buy-baeng, kalungc khou rui ravpyan khatni nkow-ndaapcmei nai puni. Kapaengc tat pat patmei tei suc-rih khou theic puni, kaidai lungc khou bammei nunc tei ravpyan khatni nkow-ndaapcmei hu khou theic puni.

¹⁶Nzaengc khou bammei akhouhna nunc ta sw kaluanglou timei kumcna gaanvsaekc rui chyngbut chyngbut thangc pak ku puni. Kaniw guay tei kaniw tuang paap khang rui puihuay puni.

¹⁷Kaniw kathuicna tuang baanc kazaeng nai lak khe, khatni kaniw khubut kadunh puni the.

¹⁸Kaniw tei zaengsiphey baanvna kaniw pumc pwm kadunh chah cha puni the. Kaniw py guat puni the kumna kaniw guayna zak puni the.

¹⁹Kaniw rui kaniw tuang daandi kachaekc guay tei ganc patloumei puat kumcna chaengluang chaengluang khou ganclou puni the, kalam thu RINGHPOUC tuang lungpuam bun key pwkhou daandi rui ni, kachaekc rui ni kaniw ta kanlou dat ngam lak khe. Hei tei rui kaniw tuang kahawmei ni tipian dat ngam lak khe, kaniw bung ni tipadik dat lak khe. Daandi kachaekc rui kaniw ta paapc khou zaylou the.

²⁰Kaniw tuang howgaymei ntuh ntah khang kaganv akhat khou kaniw daic bam khwan e, tiki kaniw rui hei tei chanymei ravmaengc kasiamh the. Hei zaeng rui RINGHPOUC rui kaniw tuang lanv tei kaniw khang karaengmei puat tiswlou the.

²¹RINGHPOUC rui sa e, “Ai rui kaniw tuang puat tei kandih baihmei nunc ta ti-asut puni the kumna kariak swbakmei nunc rui kaniw tuang lanv guay tei laana swtanac puni the.

²²Lanv naimei atuang Ravkai khou hei kwamtumei nunc rui gutna swtanacna bam sini ai zauclou dat lak khe.

²³“Ramh guayna hei katuakc katit the—mi kandic hei meicbiw meicdowmei rui padik the khatni kaidai guay hei meicngam meicliammei taanv rui padik the.

²⁴Si liang si liangmei zaat ta mi kandic khou hei ai rui phungc guangna nangniw tuang kai guay kaniw khang tii puni the. Ai rui zaatc baihmei nunc ta nangniw rui kalum bammei bamv ti hei tisw-mphuamlou pwkhou kiu nangniw pang khou Tancbauhmei nunc ni bauc dat ngam pw lak khe.

²⁵Charynmei meicpingmei ganv guang pw the. Nangniw rui nchu-nzaenghmei phu bam sini phutow dat lak khe.

²⁶Sw kasic karoucmei hei akhat tang akhat lwan guang puni the, khatni simei chamv hei dui luangh kumc guang puni the. Muhzwng nunc khou tei kaniw tabui how bu cho twna thanv puni the. Amuh nunc tei meic nunc khou nchamlou khang kaniw khou ramh nai dat ni tuang hamh the, khatni gaanvthaih nunc tei ni dinclou kadai dat khang ramh nai ni tuang hamh the.

²⁷Guangh nunc tei kap puni the, guangh nah nunc tei kaniw machunhmei nai lak khe, khatni meic nunc tei pingna kadunh puni the. Ai rui nangniw rui taanc kanmei taanv guay khang tei dandi tii puni the, khatni nangniw rui meic nunc ta latzan sw kanmei kahak tei kumcna latzan sw puni the. Heikumna ai hei RINGHPOUC e twmei mi hei rui nangniw khou lyanlou puni the.”