Read Rongmei Naga EZEKIEL 8 Bible Online

EZEKIEL 8 - Rongmei Naga bible

EZEKIEL 8

¹Aniu meic bangc bam tatmei tuang charukmei kwm charukmei bw tuang zaeng panguhpui nungc, Juda thangc rui meic bangc bam tatmei kapy nunc akai khou ai lev dungc kariu bam khwan e. Dyngna khou tei Ngamparymei RINGHPOUC tuang ngamv akhou guang khwan e.

²Ai zauc ku pwki maansei kumhmei maibwang akhat how khwan e. Kasian khou rui kabangc keymei langv tei mai kumc e, kasian khou rui karuc ku kanmei langv tei thaamc karangloumei tanzinc kumc karang e.

³Kabaanc kumhmei akhat haamv patna asam kakam the. Mi ndawman khou tei Ravguangc tuang bumaengc rui ata kauh khou zay thauna Jerusalem khou phungc guanglou the. Kamei rui ata Ravkai tuang dihpy raengckat lungc khou, Ravguangc lung tipuamcna bammei ravmaengc naimei bamv khou gut mpatlou the.

⁴Ai Kebar duithuak daeng khou ndawman akhat khou how kanmei tei kumc rapmei Isaraelmei Racguangc tuang titah tahmei riw khou tei ai how the.

⁵Ravguangc rui akhou sa the, “Maansei nacle dihpy biak thangc zauc ngangh o.” Ai zauc ngangh pwki Ravguangc lung tipuamcna bammei ravmaengc tei raenghmun daeng khou naimei ravchabamv akhat daeng khou how the.

⁶Ravguangc rui akhou kumna sa the, “Maansei nacle, sw bammei hei nang how bu cho? Isaraelmei rui sw bammei chanymei taanv, atuang nthanmei bamv khou rui ata nthau duc hay hayna sw bammei taanv ti hei zauc tho. Mi khang suangc sini karaengmei taanv how puni he.”

⁷Kapaengcmei kaimav tuang kaimun daeng khou phungc guangna ngaengsaesngc khou tei kaphoukai akhat lyanlou the.

⁸Kamei rui sa the, “Maansei nacle, mi khou hei ngaengsaengc tei swphou gut ro.” Hei tei swphou gut pwki kaimun akhat ariw the.

⁹“Kamei rui akhou kumna sa bammei simei, chanymei taanv guay tei gutna zauc tho.”

¹⁰Kumna ai gutna zauc the. Mi ngaengsaengc guay khou tei nrui maengc khatni baih baihmei tanacmei khouringc nunc maengc khatni baih baihmei Isaraelmei rui kalum bammei guayna maengc rui hy padiklou the.

¹¹Hei khou tei Shaphan nac Jaazania kazauhna Isaraelmei tuang kapy gaanv 70 bam khwan e. Kaniw kathuicna tei agaw nteimei kuak akhat khat sinna mi khou tei rui maikhou khou buih bui thau bam e.

¹²Ravguangc rui akhou thanv the, “Maansei nacle, Isaraelmei kapy nunc rui nkamhna taanc bammei hei nang how bu cho? Ravmaengc rui padikmei kai lungc khou kaniw kalumna bam e. ‘RINGHPOUC rui aniu ta how mak ge! Kamei rui mi kandic ti hei ganclouna tat kan the,’ twna kaniw dawleyna bam e.”

¹³Khoutei RINGHPOUC rui akhou sa the, “Mi khang suangc sini chanymei taanv kaniw taanc bammei ta nang how puni he.”

¹⁴Kumna kamei rui ata Ravkai tuang dihpy raengcmun khou phungc guanglouna meicpui nunc Tammuz rav theihmei ta huayna kap bammei ta lyanlou e.

¹⁵Kamei rui akhou thanv e “Maansei nacle, nang hei tei how bu cho? Mi khang suangc chanymei ni nang how puni he.”

¹⁶Kumna kamei rui ata Ravkai kalungcmei kaimav thangc tei phungc gutlou the. khou tei, ravbamv gut nimei chaengmun daeng khou, ravchabamv lev chaeng kak khou nggaanvmei gaanv 25 dou bam khwan e. Kaniw tei ravbamv biak tei kaniw thei karihlouna neihpat biak karihna nkhum keyna neihpatmei ta kalum bam khwan e.

¹⁷RINGHPOUC rui akhou sa the, “Maansei nacle, nang hei tei how bu cho? Mi Judamei nunc hei nang rui mi khou how kanmei chanymei tuang taanv taanc bammei khatni mi kandic kapwm khou hei meicngam meicliammei taanv taanc padikna bammei na hei rui pian makna kaniw rui Ravkai kahak khou guangna mi guay tei taancna areic tithauna bam e. Ai rui kahaw makmei taanv guay tei taanc lana ata adih tizak bam tu cho twmei zauc lo!

¹⁸Alungpuam kaniw ruc khou keylou puni the. Ai rui kaniw ta daeklou dat lak khe, zauc nzianlou dat lak khe. Kaniw rui kaniw sangrang patna huayneyna bam sini ai rui chulou lak khe.”