Read Rongmei Naga EZEKIEL 9 Bible Online

EZEKIEL 9 - Rongmei Naga bible

EZEKIEL 9

¹Ravguangc rui kumna kauc patmei ta ai chu the, “Mi kaidai ti hei dandi tii nimei nangniw guang tho. Nangniw tuang rih na phungcna guang tho.”

²Kadyng mak khou nggaanvmei gaanv charuk rih na phungcna Ravkai tuang kapaengcmei dihpy biak raengcmun khou rui guang the. Kaniw pang khou tei meic gaanv khat linen phey piuna hy nimei tuang sin lana guang kazauh e. Kaniw meic guayna guangna tanzinc tuang ravchapaeng daeng khou guang ding the.

³Isaraelmei Racguangc tuang karangmei riw tei, hei tei bammei bamv kaswkaeng naimei khouringc nunc khou tei rui thauh lana Ravkai tuang kaimun thangc tei guang the. Linen phey piumeipu khou tei RINGHPOUC rui sa the,

⁴“Jerusalem tuang kaidai kapwm khou tatna mi kaidai khou chanymei taanv taancna bammei zaeng rui lungh kabiuna bammei nunc tuang sanpiangc khou tei ramh madanclou o.”

⁵Baihmei nunc khou tei RINGHPOUC rui kumna samei ai chu the, “Mipu thei tei kaidai kapwm khou tatna swluai tho. Meic gaanv khat na ta sini nsaekc dat ri tho; meic gaanv khat na ta sini zauc nzianlou dat ri tho.

⁶Karapoucpeic ta ni, chabwan ta ni, pui nunc ta ni, alauc nunc ta ni swluai tho. Tiki kasanpiang khou madancloumei nunc ta thu kahi riu. Atuang Ravkai khou hei rui swluai thau tho.” Kumna Ravkai khou ding bammei kapy nunc khou tei rui swluai thau the.

⁷Ravguangc rui kaniw khou sa the, “Ravkai hei swtanac tho. Mi tuang kaimav guay hei theihmei pumc rui ganc padiklou tho. Swluai thau tho!” Kumna kaniw rui mi kaidai khou bammei nunc ta tei swluai thau the.

⁸Kumna swluai bam khoutei, mi khou tei arana bam khwan e. Ai azaw kandih khou sow nkhum khuakh keyna kumna kauc the, “Kauh Liangmei RINGHPOUC, Jerusalem ruc khou nang lungpuam bun keylouna nsaekcloumei Isaraelmei guay ta swmaan mutsutlou ni thena cho?”

⁹Ravguangc rui daw the, “Isaraelmei khatni Judamei nunc hei si sihmei paap taanc the. Mi kandic kapwm hei meicbiw meicdowmei rui padik the khatni Jerusalem hei tasiat rui padik the. RINGHPOUC, ai rui kaniw kandic ta ganclouna tat kan the kumna kaniw ta how dat mak khe twna kaniw rui sa the.

¹⁰Ai rui kaniw ta zauc nzianlou dat lak khe, kaniw rui meic baihmei khou swlou kanmei tei ai rui kaniw khou swlou dat puni the.”

¹¹Khoutei linen phey piumeipu tei rui guang datna, “Nang tuang latdanv thei tei layna ai taanclou kan the,” twna RINGHPOUC khou poulou the.