Read Rongmei Naga DANIEL 1 Bible Online

DANIEL 1 - Rongmei Naga bible

DANIEL 1

¹Jehoiakim rui Judamei guangc swmei tuang kathumhmei kwm, Babilonmei guangc Nebukadnezar rui Jerusalem ta adowna mi kaidai tei dingbin the.

²RINGHPOUC rui Guangh Jehoiakim ta Nebukadnezar baanc khou tiilou kan the. Kumna kamei rui Ravkai tuang lanv asaekc asut kan the. Kamei rui nymloumei gaanvsaekc ta Babilon khou naimei katuang rav nunc tuang Ravkai khou phungc guang the, khatni asut guangmei lanv guay tei ni mi Ravkai khou puatc ryloumei bamv khou lou the.

³Nym guangloumei Isaraelmei pang khou rui guangh kaikhwang mei khatni meicdaihmei kaikhwang khou rui chabwan gaanvsaekc kapah o twna guangh tei rui katuang meicdaihmeipu, kapumc siammei Aspenaz khou latdanv pat the.

⁴Kaniw tei lwnchav gaymei, ningtyngmei, ncham chuyloumei, ramh thay katumcmei, kapumc sisuaimei maekmei sw nina e, kalam thu kaniw tei guangh kai khou siamruai sw khang biuhmei nunc sw nina e. Aspenaz rui kaniw ta Babilonmei lat hy thay pac thay khang nchamlou nina e.

⁵Guanghkai khou bammei guay rui tuzangvmei taektw khatni zouh tei kaniw khang ni nchamcna tingmik pum tii nina e twmei tuang latdanv ni guangh rui tii the. Kumna tingkwm kathumh kasiamhlou tang pwkhou guangh tuang siamruai khou gut nina e.

⁶Mi kadah patloumei pang tei Daniel, Hanania, Mishael, khatni Azaria kaniw hei e. Kaniw guay hei Juda kaikhwang mei rana e.

⁷Meicdaihmeipu tei rui kaniw khang zanh thanh: Daniel khang Belteshazar, Hanania khang Shadrak, Mishael khang Meshak, khatni Azaria khang Abednego twna phuaklou the.

⁸Daniel tei guanghkai tuang taektw khatni zouh tei rui kata sw mphuam lak ge twmei kalung ding the. Kumna kata nkhavlou khang Aspenaz khou sa the.

⁹Ravguangc rui Aspenaz khou Daniel ta nzianlou khang swlou the.

¹⁰Tiki Aspenaz rui guangh ta pingna kamei rui Daniel khou sa the, “Nangniw tu nimei khatni zangv nimei guay tei guangh rui dinglou tang the, kumna baihmei chabwan nunc tei kumcna nangniw pumc gay timak ge thei, kamei rui ata swluai kho ni nuh e.”

¹¹Daniel lev kapam gaanv thumh khang Aspenaz rui langloumei rigaanv khou tei Daniel rui tatna sa the,

¹²“Aniw ta zaeng ruh matat zauc o.” “Aniw tu zangv khang thingnuy paannu na khatni dui na tii do.

¹³Kumna guanghkai tuang taektw tu bammei nunc tei lev kida zauc o, kumna aniw akumh bu cho twmei theilayna kakhanh tho.”

¹⁴Kaniw ta tei kumna zaeng ruh tei zauh khang nuhlou the.

¹⁵Kaganv tei luai pwkhou, guangh tuang taektw tumei nunc khang tei suangc kaniw tei pumh gay mbu the khatni tanc mbu the.

¹⁶Kumna khou tei rui thauna rigaanvpouc tei rui guangh rui tiimei taektw tei hamhna thingnuy paannu na titu the.

¹⁷Ravguangc rui mi chabwan gaanv padeih khou tei takh khatni latrik khou khatni ningting khou thaymei tiilou the. Hei khou tei rui Daniel khou ndawman khatni mang kabah thay khang tiilou the.

¹⁸Guangh rui nrianhloumei tingkwm kathumh ganv tei luai pwkhou, Aspenaz rui mi chabwan guay ta tei Nebukadnezar khou nduangh guang the.

¹⁹Guangh rui kaniw kaguayna ta kachuc the, kumna Daniel, Hanania, Mishael khatni Azaria kaniw ta tei baihmei nunc ta khang suangc pian the. Kumna kaniw ta guangh tuang taanv khou laalou the.

²⁰Guangh rui tabui bui lat thanv bam sini khatni kamei rui kunghmei latbam azuh phungc guang sini, mi gaanv padeih hei kaguanghdic kapwm khou naimei ravkhanmei nunc khatni duaih thaymei nunc suangc sini kadam ruh mbuna thay the.

²¹Persiamei guanghdaihmei Sairas rui Babilon laa kan mak saanv Daniel tei guanghkai khou bam khwan e.