Read Rongmei Naga DANIEL 10 Bible Online

DANIEL 10 - Rongmei Naga bible

DANIEL 10

¹(Sairas rui Persiamei guanghdaihmei swmei tuang kathumhmei kwm, Daniel, Belteshazar twna kawmeipu khou ndauhloumei akhat tiilou khwan e. Ndauhloumei tei nchumhmei tuang e tiki thay khang kungc sih the. Mi kabac tei ndawman khou rui dinclou dat khwan e.)

²Mi ganv khou tei, ai kanit dak kathumh kapna huay bam khwan e.

³Mi kanit dak kathumh tei luai mak saanv ai tugay zangvgay, khav zanh tumak ge, drakhadui ni zangv mak ge, asam ni zay mak ge.

⁴Mi kwm tuang reymei bw tuang zaeng 24mei nungc ai Taigris Duithuak paengc khou ding bam khwan e.

⁵Ai zauc ku pwki ngniangmei linen phey piuna kachaekc gaymei tuang bungkam kamhmeipu gaanv khat ta how e.

⁶Kapumc tei kunghmei tauc kumcna gaanc e. Kazawpaanv tei ting palikmei kumc karang e. Kamik tei maibwang kumc chuangc e. Kaphey kabaan tei thaamc karang chuyloumei tanzinc kumc e, khatni kakhwan tei meic kangdai rui karo bammei khwan kumc e.

⁷Mi ndawman tei howmei arana khwan e. Ai lev bam nchamcmei nunc thu ramhkhat na sini how mak khwan e, tiki kaniw tei pingna pak tatna nkamh kan the.

⁸Arana ta ganclou ducna ngak sakh sakna ndawman tei zauc bam khwan the. Apumtan maek khe, kumna azaw ndavdyan dian the kumna alwn kalaic ngam the.

⁹Ai mi khwan tei chu pwkhou ramh thay makna kandih khou bowkeyna bow nkhum khuakh khuakna bow bam khwan the.

¹⁰Khoutei baanh akhat rui ata zay thau the. Khoutei ai kadunhna bam khwan e.

¹¹Baanchara tei rui akhou sa the, “He Daniel, Ravguangc rui nang ta nzian e. Dingthauna ai rui sa nimei hei nking chuyna nking o. Ati hei nang khou thouc guangmei tuang e.” Kamei rui mi hei salou pwkhou ai ding thau the, khoutei ai kadunh bam khwan e.

¹²Khoutei kamei rui sa the, “Daniel, ping riu. Kabah thaymei laatow diu khang rui nang lung niamh key khang nang dinglou reymei nungc tei rui Ravguangc rui nang tuang ravsuai dawlou the. Nang tuang ravsuai tei dawlouna ai guangmei tuang the.

¹³Persiamei guangcdic gaek bammei baanchara rui ata zaeng 21 thingc the. Khoutei Mikael, baanchara py akhat rui, ata nkhavlou khang guang the, kalam thu Persia khou arana ta ganclou the.

¹⁴Thei thangc nang mei nunc khou guang pw nimei lam tei dinc nthanlou khang ai hei guangmei tuang the. Mi hei guang nimei lam khou lyanloumei ndawman kiu the.”

¹⁵Kamei rui hei tei sa pwkhou, azaw nkhum keyna lat sa makna bam khwan the.

¹⁶Khoutei maansei kumhmei baanchara tei kabaanc haamv patna achy kahi the. Ai rui kakhou sa the, “Poubauhmei, mi ndawman rui azaeng maek khe, ai kadunh nthaekc dat ngam mak khe.

¹⁷Ai hei kakaipouc mav khou ding bammei bangc kumc the. Akumhna ai nang ta kachuc ngam nina cho? Apumtan maek khe, athiu ni maek khe.”

¹⁸Kamei rui ata kahi dat pwkhou azaeng tanc thau dat the.

¹⁹Kamei rui akhou sa the, “Ravguangc rui nang ta nzian e, ping riu nchu-nzaengh o, tanc o, bauc o.” Kamei rui mi hei salou pwkhou ai azaeng tanc thau dat the. Ai rui sa the, “Poubauhmeile, nang rui sa nimei kiu akhou salou tho. Nang rui azaeng titanclou the.”

²⁰Baanchara tei rui sa the, “Tabui sw khang ai nang khou guang tu cho twmei nang thay dai cho? Ntaw ai tat datna Persia ta gaek bammei baanchara ta adow puni. Mi tangv tei, Grikmei ta gaek bammei baanchara guang puni.

²¹Isaraelmei ta gaekmei baanchara Mikael hamhna ata nkhavlou nimei maek ge, twmei nchumhmei buk khou hylou bammei tei ai rui dinclou puni.