Read Rongmei Naga DANIEL 3 Bible Online

DANIEL 3 - Rongmei Naga bible

DANIEL 3

¹Guangh Nebukadnezar rui chowbuk 60 kauhmei khatni charuk daihmei kachaekc rui meic maengc kasiamh lana hei tei Babilon ramv lungc khou naimei Dura nzaengc khou suamc thaulou the.

²Khoutei guangh rui katuang meicdaihmei guay twmei thu guangh nac nunc, guanghkhyn guay, baanhza guay, latzanpouc guay, syan dui sinmei guay khatni ramv langv ramv langv tuang meicdaihmei guay ta guang kariu khang latdanv tii the. Guangh Nebukadnezar rui suamc thauloumei maengc tei kat patmei khou kaniw kazauh nimei tuang e.

³Mi maengc tei katpat khang guang kariuna meicdaihmei guay tei mi maengc hu khou tei ding bam khou,

⁴chamvdinhmeipu rui kauc ranvna kauc pat the, “Guanghdic, zaatc khatni lat kapwm tuang mei nuncle!

⁵Nangniw bianggun khwan chu puni, mi thei tei alim, nrah, luanluh, baih baihmei ludow na guay palup puni. Mi khwan guay tei chupui lev nangniw nkhum keyna Guangh Nebukadnezar rui suamc thauloumei kachaekc tuang maengc ta tei kalum nina e.

⁶Thow pwni nkhum keyna kalum makpui mei ta tei thu dyng na khou chakhuan mai khou phaiclou puni.”

⁷Kumna lu khwan tei chupui lev zaatc guay, lat kaguayna tuang mei nunc tei nkhum keyna Nebukadnezar rui suamc thauloumei kachaekc tuang maengc ta kalum the.

⁸Hei tei Jihudimei nunc khuay phu bammei Babilonmei nunc khang kadow chamei sw kan the.

⁹Kaniw rui Guangh Nebukadnezar khou sa the, “Guangh panty lungsing o!

¹⁰Guangh rui kumna latdanv pat kan the twmei thu lu tei kahouhpui lev meic kathuicna nkhum keyna kachaekc tuang maengc ta tei kalum nina e,

¹¹kumna thow pwni nkhum keyna mi ta tei kalum makpui mei ta tei chuangc bammei chakhuan mai khou phaiclou nina e.

¹²Nang rui Babilon ramv langv sin khang nsinloumei Jihudimei Shadrak, Meshak, khatni Abednego kaniw hei guangh tuang latdanv piu mak khe. Kaniw hei nang tuang rav ta kalum mak khe, khatni nang rui suamc thauloumei maengc ta tei kalum mak khe.”

¹³Khoutei guangh tei kalungpuamc the kumna mi nunc gaanv thumh ta kiuc kakhou nduangh guang khang latdanv tii the.

¹⁴Kamei rui kaniw khou sa the, “Shadrak, Meshak, khatni Abednego, nangniw atuang rav ta kalum mak ge khatni ai rui suamc thauloumei kachaekc maengc hu khou tei nkhum key mak ge twmei hei kachangh cho?

¹⁵Kum e thei, ntaw thu bianggun, alim, nrah, luanluh, khatni baihmei ludow na guay khwan chupui lev nangniw nkhum keyna mi maengc ta tei kalum nina e. Nangniw kalum mak ge thei nangniw ta chuangc bammei chakhuan mai khou phaiclou puni the. Nangniw ta kanlou nuhmei rav nai e twna nangniw ningna cho?”

¹⁶Shadrak, Meshak, khatni Abednego rui daw the, “Guanghle, aniw akhangv khang sw lak ge.

¹⁷Aniw rui kalum bammei Racguangc hei rui aniw ta chakhuan mai khatni nang ngamv khou rui kanlou ngam e thei, kamei rui taanclou puni de.

¹⁸Kamei rui kanlou mak pwsini, Guanghle, aniw thu nang tuang rav ta kalum lak ge khatni nang rui kasiamh thauloumei kachaekc maengc khou nkhum key lak ge.”

¹⁹Khoutei Nebukadnezar tei Shadrak, Meshak khatni Abednego kaniw ta kareic thau the kumna kazaw haengc gam thau the. Kumna kamei rui kamei nunc ta chakhuan mai tei kalwnlung suangc kadam chanei mbuna tisuclou khang latdanv pat the.

²⁰Kamei rui katuang ricmei pang khou tanc liangmei nunc khou tei mi nunc gaanv thumh ta tei karak lana chakhuan mai khou tei phaiclou khang latdanv tii the.

²¹Kumna kaniw rui mi nunc ta tei karak lana, thiula, thiula saenghmei, pygwm khatni pwan kaguay tipiu nthuihlouna chakhuan mai khou tei phaiclou the.

²²Chakhuan mai tei tichuangc ranvlou khang guangh rui tanhmei latdanv pat tipui zaeng rui mi nunc ta tei zay guangmei nunc ta tei mai tei rui kahapcna raw kan the.

²³Khoutei Shadrak, Meshak, khatni Abednego tei karakclouna, chakhuan mai chung khou tei key kan the.

²⁴Kadyng khou tei Nebukadnezar hahlahlana kaphaychwm tangkhuang thau the. Kamei rui katuang meicdaihmei nunc khou thanv the, “Aniu rui meic gaanv thumh ta karakcna chakhuan mai khou phaiclou kan tu hamhna cho?” “Ngguay, Guanghle” twna kaniw rui daw the.

²⁵Kamei rui sa the, “Kum e thei tabui swtina meic gaanv padeih mai khou tat bammei ta ai how tu cho? Kaniw ta tei karakclou mak ge, kaniw ta rawloumei lwn ni how mak ge. Padeihmeipu hei baanchara kumc e.”

²⁶Kumna Nebukadnezar tei chakhuan mai chaengmun daeng khou tei guangna, “He Shadrak, Meshak, Abednego! Kauh Liangmei Racguangc tuang bangc nunc! Pat dat tho!” twna kauc the. Kumna kadyng khou tei kaniw tei pat dat the.

²⁷Guanghkhyn guay, baanhza guay, latzanpouc guay, khatni baihmei meicdaihmei guay mai rui sw kasic makmei meic gaanv thumh ta tei zauh khang guang the. Kaniw sam sini hamc nkhitlou mak ge, kaniw pheybaan ni raw mak ge, khatni kaniw khou maikhou rym na sini namh mak ge.

²⁸Guangh rui sa the, “Shadrak, Meshak, khatni Abednego tuang Racguangc ta thuanc o! Kamei rui katuang baanchara thouc guangna kasiamruaimei khatni kakhou lwmmei kaniw ti hei kanlou the. Kaniw hei kaniw tuang Racguangc na ta hamhna rav baihmei ta nkhum keyna kalum lak ge twna theihmei nganvna ping makna alatdanv ta nganvna piu mak khe.

²⁹“Kumna tabui bui kandihmei, zaatc, lat zaatc baih baihmei samei pwni Shadrak, Meshak khatni Abednego kaniw tuang Racguangc ti hei sa kasicpui mei ta tei thu dan puat paruatlou puni, khatni kakai tei swmutsutlou puni. Hei kumna kanlou ngammei rav baihmei maek ge.”

³⁰Kumna guangh rui Shadrak, Meshak, khatni Abednego kaniw ta Babilon ramv lungc khou kauh ranvmei bamv khou tikulou kan the.