Read Rongmei Naga DANIEL 4 Bible Online

DANIEL 4 - Rongmei Naga bible

DANIEL 4

¹Guangh Nebukadnezar rui mi lat hei kandih khou naimei guanghdic kapwm, zaatc kapwm, lat kapwm khou tithay the: “Kalum e!

²Kauh Liangmei Racguangc rui akhou lyanloumei charynmei taanv ti hei nking o.

³“Ravguangc rui lyanloumei hei adih daihmei charynmei cho! Kamei rui taanhmei charynmei taanv hei adih ngam kan tu cho! Kaguanghdic hei tingsaengzaeng guanghdic, meickin meickin sw bam puni; kamei rui kaganv thuic guangh sw bam puni.

⁴“Ai Nebukadnezar hei lungcgay chingkhiuhna, mbaanv thayna guanghkai khou lungc bam khwan e.

⁵Tiki ai zip bam khou meicpingmei mang akhat manv khwan e khatni ping kanmei ndawman akhat how khwan e.

⁶Mi mang tei hanclou khang Babilon khou naimei guangh tuang ningtyngmei guay ta kaw guang khang latdanv tii khwan e.

⁷Khoutei ravkhanmei nunc, duaih thaymei nunc, mangmuh khatni gaanchuangcna madanhmei nunc kaguayna ta kaw guang the, kumna ai rui kaniw khou amang tei raclou the, tiki kaniw rui hei tei akhou kabah dinclou ngam mak khe.

⁸Nkhamh khou Daniel guang the. (Atuang rav zanc phuaklouna kazanc tei Belteshazar twna ni kaw e.) Nthanmei rav nunc tuang bumaengc kakhou bam e, kumna amang tei ai rui kakhou raclou the. Ai rui kakhou sa the:

⁹Ravkhanmei kapypu Belteshazarle, nthanmei rav nunc tuang bumaengc nang khou nai e twmei ai thay e, khatni nkamhloumei guay tei nang thay e twmei ai thay e. Amang kiu mi hei the mi kabac hei dinclou o:

¹⁰“Ai zip bam khou, kandih chung khou thingbang daic nganvmei thau bammei tuang ndawman akhat how khwan e.

¹¹Hei tei kauh khith khit thauna tingpuk daic twng the kumna kandih nam ruc khou meic katana rui mi ta tei how khwan e.

¹²Mi nwang guay tei howgay e khatni kathai tei kandih nam ruc khou meic katana khang tu biuc nthai padik gith gith the. Nwmbangc tuang khouringc nunc rui kalym khou nthaekc bam e, kachy khou nruay thauruay kabou duanc bam e, khatni ringhmei khouringc katana mi thai tei tu bam e.

¹³“Mi ndawman lam khou tei ai kakhanh bam khou, baanchara akhat tingkauh thangc rui keymei ta how the. Kamei tei ntak nrak sih khwan e.

¹⁴Kamei rui kauc ranvna kauc pat the, ‘Thingbang tei gay bau keyna kachy guay tei dow bau pat tho; kanuang guay tei kathangv ganc tho khatni kathai guay tei nrou phak pat tho. Khouringh khounah guay ta tei mi bang bangc khou rui alay ganc tho, khatni nruay thauruay guay tei kachy khou rui alay ganc tho.

¹⁵Tiki kamui tei ntanh khatni tanzinc riang rui bangclouna lou o. Hei tei ramvpuk khou tei pucbwan ding khou ganclou ti tho. “‘Mipu ruc khou hei zikdui keylou kan di tho, kumna kamei khouringh khounah lev nwmbangc khou lungc bam kan di tho.

¹⁶Tingkwm chanei kakhou maansei lung nai lak khe, khouringh lung nai puni the.

¹⁷Mi hei ntak nrakmei baanchara nunc tuang Latdyng kiu the. Kumhpui zaeng rui Kauh Liangmei Ravguangc hei maansei tuang guanghdic guay ruc khou ngamv nai e kumna meic launa khou nganvna kamei rui kahawpui mei khou guanghdic tei tiilou nuh e twmei meic kathuicna rui thay kan diu.’

¹⁸“Ai rui manv kanmei mang kiu mi hei the. Belteshazar, nang rui mi kabac hei hanclou tho. Atuang ningtyngmei gaanv khat na rui sini mi hei akhou dinclou ngam mak khe, tiki nang rui thu dinclou ngam puni, kalam thu nthanmei rav nunc tuang bumaengc nang khou nai e.”

¹⁹Khoutei, Daniel, Belteshazar twna ni kawmeipu tei ping the kumna kamei lat sa khang thay mak khe. “Belteshazarle, mi mang khatni mi tuang kabac khang tei nang ping riu,” twna guangh tei rui sa the. Belteshazar rui sa the, “Guanghle, mi mang khatni mi tuang kabac hei nang tuang zauczihmei nunc khang sw lana, nang khang hamh bam khwan e thei gay nimei tuang e.

²⁰Thingbang tei tingpuk kauh tangc the, hei tei kandih nam ruc khou meic katana rui how the.

²¹Mi nwang guay tei howgay the, kumna kandih kapwm ta titu khang biucna kathai nthai bam khwan e. Nwmbangc khouringc nunc mi bang bangc khou nthaekc bam khwan e, khatni nruay na nunc mi chy guay khou kaniw bou duanc bam khwan e.

²²“Guanghle, kauhmei khatni tanhmei thingbang tei nang hei the. Nang hei tingpuk daic tangc bam khwan e khatni nang ngamv kandih pwm lik bam khwan e.

²³Guangh rui zauc bam khou baanchara akhat tingkauh thangc rui keyna sa the, ‘Thingbang tei gaibau keyna swmut tho, tiki kamui tei thu kandih khou ganclou duc o. Ntanh khatni tanzinc riang rui mi ta tei bangclou tho, kumna hei tei nwmbangc khou pucbwan ding khou ganclou tho. Mi pucbwan ruc khou tei zikdui keylou kan di tho, kumna kamei mi khou tei khouringh khounah lev tingkwm chanei bam kan di tho.’

²⁴“Guanghle, mi kabac kiu mi hei the, nang khou patlou puni twna Kauh Liangmei Racguangc rui kauc patmei kiu the.

²⁵Nang ta maansei pang khou rui alay ganc puni the kumna nang nwmbangc khouringc lev lungc puni the. Tingkwm chanei nang hei guaih kumcna pucbwan tu puni the, khatni nang ruc khou zikdui keylouna nang nwmbangc khou zipna lungc puni the. Kauh Liangmei Racguangc rui maansei tuang guangcdic guay ta sin bammei tuang e, kumna kamei rui kadahlou loumei khou tei kamei rui guanghdih tei tiilou ngam e twmei nang mi ganv khou kiu thay puni.

²⁶Kata tei kandih khou ganclou duh khang baanchara tei rui latdanv pat the. Mi tuang kabac thu Ravguangc rui kandih kapwm ta sinna bam e twmei nang thay dat pwkhou nang guangh sw dat puni.

²⁷Kumna guangh rui alat hei laalou o. Paapc taanc nthaekc tho, nchumhmei tei taanc tho, kumna lungcsi lungcroucmei ta nzianthay tho. Kum pwkhou nang hei lungc thau dat puni e.”

²⁸Mi guay hei Guangh Nebukadnezar khou pat changh khwan the.

²⁹Bw 12 tangv Babilon khou katuang guangckai kainam khou tat bam khou,

³⁰kamei rui sa the, “Zauclo Babilon hei adih daic kan tu cho! Mi hei angamv khatni apumtan, khatni atik agunc lyan khang ai rui swloumei kaidai e.”

³¹Mi latkaeng tei kamwang khou rui pat makmei hu khou, tingkauh thangc rui khwan akhat rui sa the, “Guangh Nebukadnezar, ai rui samei hei nking o! Nang tuang guangh ngamv tei nang khou rui laa tat kan the.

³²Nang ta maansei pang khou rui alay ganc puni the, nwmbangc khouringc pang khou nang lungc puni the, kumna guaituam kumcna tingkwm chanei pucbwan binc tuna lungc puni the. Khou kiu Kauh Liangmei Kaipouc hei maansei tuang guanghdic guay ruc khou ngamv nai e kumna hei tei kamei rui kadahloumei thow thow khou pwni kamei rui tii ngam e twmei nang kwmlou puni.”

³³Mi dyng khou tei mi lat tei guang tangc kan the. Nebukadnezar ta maansei pang khou rui alay ganc kan the kumna kamei guaituam kumcna pucbwan tuna lungc kan the. Kapumc khou zikdui keylou the, kum tina kahiw tei mouc hiw saan saan pat the khatni katin tei nruayna tin kumc saengc pat the.

³⁴Guangh tei rui sa the, “Tingkwm chanei tei luai pwkhou,” ai tingpuk thangc zauc ku the, kumna ai maansei lungning pat dat the. Kauh Liangmei Ravguangc ta ai thuanc e khatni tingsaeng ringc bammeipu khang tei champouhmei khatni hymgaanhmei tii e. “Kamei rui tingsaeng dihsinna bam puni, khatni kaguanghdic tei meickin meickin nai bam puni.

³⁵Kamei rui kandih khou maansei guay ta ramhkhat na khang sini chaklou mak ge; tingpuk khou baanchara nunc khatni kandih khou maansei nunc ta kabaanc bangc khou lou e. Meic gaanv khat na sini kachwn ta thingc ngam mak ge khatni kachwn ta tabui zaeng cho twna thanv nuh mak ge.

³⁶“Ai maansei lungning pat dat pwkhou, atuang champouhmei, atik agunc, khatni aguanghdic tuang tikgunc guay akhou tiilou dat the. Atuang meicdaihmei nunc khatni baanhza nunc rui ata riwlou dat the, kumna atuang guangc ngamv tei akhou tiilou dat the, kahu nungc suangc sini daic ranvmei champouhmei tiilou dat the.

³⁷“Ntaw thu Nebukadnezar, ai rui Tingkauh Guangc ta thuanc e, kata champouh e khatni kahym thuanc e. Kamei rui taanhmei guay hei nchumh e khatni nzih e, kumna daic tuh tuna samei guay ta kamei rui tiniamh keylou ngam e.”