Read Rongmei Naga DANIEL 6 Bible Online

DANIEL 6 - Rongmei Naga bible

DANIEL 6

¹Kaguanghdic kapwm khou kandih phungh khang guanghkhyn 120 lou khang Darias rui dinglou the.

²Hei ruc khou tei kamei rui Daniel khatni baihmei gaanv nei ta guanghkhyn nunc ta tei zauh khang khatni guangh tuang taanv guay zauclou khang kadahlou the.

³Baihmei dihsinpouc nunc khatni guanghkhyn nunc khang suangc Daniel tei sw chuy mbu ngammei tei how the. Kamei tei langh lang timei zaeng rui, kakhou guanghdic kapwm tei zauh khang nsinlou khang guangh tei rui kakhanh the.

⁴Khoutei Daniel rui guanghdic tei sin bammei thiak khou tei tabui nkhuai pat puni cho twmei dihsinpouc nunc khatni guanghkhyn nunc tei phu bam khwan e, tiki kaniw rui phu pat ngam mak khe, kalam thu Daniel tei lwmlou nuhmei khwan e kumna nkhuaimei taanv khat na sini taanh mak khwan e khatni lungning nthan makmei tuang ramhkhat na sini maek khwan e.

⁵Kaniw khat khat khou sa the, “Aniu rui Daniel ti hei katuang ravchap lam khou hamhna kakhuay phu pat nimei chaeng baihmei maek ge.”

⁶Kumna kaniw guangh ta ariw khang tatna sa the, “Guangh Darias, ringc saengc o!

⁷Nang guanghdic khou dihsinna bammei aniw guay dihsinpouc nunc, guanghkhyn nunc, khatni baihmei meicdaihmei guay rui guangh rui latdanv akhat patna hei tei tancna tat key khang dinglou tho. Mi kiu thu zaeng 30 lungc khou meic gaanv khat na sini guangh khou na hamhna rav khou pwni maansei khou pwni ramhkhat na sini ney nuh mak ge twmei latdanv tii pat tho. Thow pwni mi tuang latdanv tei liampui mei ta tei kamangliangpui kuanc khou phaiclou nina e.

⁸Guangh rui mi latdanv hei tii patna suaic swlou tho, hei tei Medi khatni Persia tuang latdanv swna tat puni, hei tei kalaic dat lak khe.”

⁹Kumna Guangh Darias rui latdanv tei suaic sw the.

¹⁰Mi latdanv tei suaic sw kan the twmei Daniel tei chu lana kakai tat kan the. Kakai khou kaithaek karucmei khou Jerusalem biak thangc karihmei kailat nai bam khwan e. Hei khou tei, kamei taanc tanh tan guangmei kumcna laancloumei kailat khou tangkhungh keyna Ravguangc khou zaeng neih khat khou huayney kathumh kathumh the.

¹¹Daniel rui kumna Ravguangc khou huayney bammei tei kata zauczihmei nunc rui how pwkhou,

¹²Daniel khuay tei poulou khang kaniw guayna guangh daeng thangc tat the. Kaniw rui sa the, “Guanghle, zaeng 30 lungc khou thow thow pwni guangh khou hamhna rav khou pwni maansei khou pwni ramh neypui mei ta tei kamangliangpui kuanc khou phaiclou puni twmei latdanv nang rui suaic sw kan tu hamhna cho?” Guangh rui daw the, “Ngguay, ntipmei latdyng di the, kalaic dat nuh makmei Medi khatni Persia tuang latdanv di the.”

¹³Khoutei kaniw rui guangh khou sa the, “Daniel, Juda thangc rui nym guangmeipu akhat tei, guangh ta chakhwang sw mak khe khatni guangh rui tii patmei latdanv tei piu mak khe. Kamei zaeng neih khat khou huayney kathumh kathumhna huayney tanh tan bam e.”

¹⁴Guangh rui hei tei chu pwkhou kamei kalung kabiu the kumna Daniel ta kanlou nuhmei chaeng phu khang ngammei kamv karamc the. Neih key mak saanv kamei karamc the.

¹⁵Khoutei mi nunc tei guangh khou guang datna sa the, “Guangh rui thay e twmei thu Medi khatni Persia tuang latdanv theilayna guangh rui pat kanmei latdanv akhat na sini kalaic nuh mak khe.”

¹⁶Kum tina Daniel ta nym lana kamangliangpui kuanc khou phaiclou khang guangh rui latdanv pat the. Kamei rui Daniel khou sa the, “Nang Racguangc, nang rui heidi lunghlouna bammeipu tei rui nang ta kanlou pw diu tho.”

¹⁷Meic gaanv khat na rui sini Daniel ta kanlou nuh mak khang mi kamangliangpui kuanc kaimun tei ntauh paek rui gumbinlou the, guangh rui katuang sil khatni katuang meicdaihmei nunc tuang sil ntauh khou tei lou the.

¹⁸Guangh tei guanghkai khou guang datna tu mak zangv makna, laam lu tuang ramhkhat sini sw makna zip makna rak thangc the.

¹⁹Tinggaanc pwkhou guangh tei thau lana kaluak kalat kamangliangpui kuanc thangc tei pat the.

²⁰Kamei mi khou tei guang pwkhou, kamei lungh geic kadanna kauc the, “Daniel, ringc bammei Racguangc bangcpu! Nang rui heidi lungh gutna kasiamruai sw bammei Racguangc tei rui kamangliangpui nunc khou rui nang ta kanlou dai cho?”

²¹Daniel rui daw the, “Guangh, panty lungsingna lungc o!

²²Kamangliangpui nunc rui ata sw kabiu kabaeng mak khang Ravguangc rui kamangliangpui nunc mwang kagouclou khang katuang baanchara thouclou the. Guanghle, ai hei akhuay maekmei e khatni ai rui nang khou nkhuailoumei tuang maek ge twmei kamei thay lana mi hei sw bammei tuang e.”

²³Guangh tei neihla the kumna Daniel ta kamangliangpui kuanc khou tei rui zay pat dat khang latdanv tii the. Kumna kaniw rui kata zay pat dat the kumna kata kabiu kabaenglou mak khe twmei how the, kalam thu kamei Ravguangc khou lwmlou the.

²⁴Khoutei Daniel khuay phumei guay ta tei nym khang guangh rui latdanv pat the, kumna kaniw ta kaniw nownac guay lev twna kamangliangpui kuanc khou phaiclou the. Kaniw tei kandih sini key tangh mak khou rui kamangliangpui nunc rui kaniw ta kazap lana kaniw rouruc nganvna swpiak ngam kan the.

²⁵Khoutei Guangh Darias rui kandih nam ruc khou naimei kandih kapwm, zaatc kapwm, khatni lat kapwmna nunc khou kumna hy the: “Kalum e!

²⁶Aguanghdic khou bammei meic kathuicna rui Daniel tuang Racguangc ta ping nina e khatni chakhwang sw nina e twna ai rui latdanv pat the. “Kamei hei ringhmei Racguangc e, kamei tingsaengzaeng guanghtu bam puni. Kaguanghdic tei tabui nungc na sini swmut dat lak khe, khatni kangamv kanganv nai dat lak khe.

²⁷Kamei rui kanlou e khatni kan patlou e; kamei rui tingkauh khou khatni kandih khou charynmei taanv taanclou e. Kamei rui Daniel ta kamangliangpui nunc khou rui kanlou e.”

²⁸Daniel tei Darias khatni Persiamei Sairas guangh sw bammei douc lungcgay chingkhiuhna lungc bam khwan e.