Read Rongmei Naga DANIEL 7 Bible Online

DANIEL 7 - Rongmei Naga bible

DANIEL 7

¹Belshazar rui Babilonmei guangc swmei tuang reymei kwm, zingbangc ai mang akhat khatni ndawman akhat manv khwan e. Ai rui mi mang tei hykeylou the, kumna mi khou hyloumei hei

²mi zingbangc tei ai rui howmei kiu the: Kabiak kaguayna thangc rui mpwan aliu guang the kumna duipui ruc khou guang thui the.

³Mi duipui khou tei rui khouringh daihmei padeih pat the, mi guay tei kalwn baic baic ngam e.

⁴Reymei tei kamangliangpui lwn kumc e, tiki mouckauh swkaeng kumhmei kaswkaeng nai e. Ai zaucna bam khou, kaswkaeng nei tei kathyng kan the. Khouringh ta tei zaythauna maansei ta kumc tidinglou the. Kum pwkhou mi khouringc khou tei maansei lungning tiilou the.

⁵Kaneimei khouringc tei thei tan rui dingna bammei chagamh kumc e. Naekpai rou kathumh kamei rui nkayna bam e, kumna khwan akhat rui mi khou tei “Tu thau tho, zanh tei nang rui tu diw saanv tu tho!” twna sa the.

⁶Ai rui zaucna bam khou, khouringh baihmei akhat pat dat the. Hei tei kamang tarikmei kumc e, tiki kating khou nruay swkaeng kumhmei kaswkaeng padeih nai e, khatni kapy padeih nai e. Mi khou tei dihsinmei ngamv tiilou kan the.

⁷Ai zaucna bam khou, padeihmei khouringc pat the. Hei tei pumtan padik ge, khatni meicpingmei lwn phungc e. Daic kanmei katuang ntanh huc rui katuang zauczihmei guay ta swpuat the, kumna khou tei mi guay ta tei kamei rui niibin bam e. Baihmei khouringc nunc tei kumh makna, hei tei kachei ruh nai e.

⁸Mi chei guay lam khou tei ai kakhanhna bam khou, mi pang khou tei kachei launa akhat thau datmei ta ni ai how e. Mi khou tei nai bammei kachei kathumh ta hei tei rui riam bau kan the. Mi chei khou tei maansei tuang mik kumhmei nai e khatni kamwang ni naina kagaengh swna bam e.

⁹Ai zaucna bam khou, guanghbamvpaeng guay kabamv kabamv khou lou kan the. Tingsaengzaeng ringcbammeipu gaanv khat guanghbamvpaeng akhat khou dungc key kan the. Kapheybaan tei gunh kumcna mphwan e, khatni kasam tei ni ramh hiw langc kumc mphwan e. Katuang guangcbamvpaeng tei mai haengv ruc khou duanclou the, mi khou tei maibwang chuangcna bam e,

¹⁰khatni mi khou tei rui maibwang tei duiriang kumcna luangc pat bam e. Kasiamruai sw khang meic ching ching bam e, khatni kahu khou meic akha akha ding bam e. Latzankai khou tei taanv tat key the, kumna latrik buk guay phaek pat the.

¹¹Ai rui zaucna bam khou kachei launa tei rui kagaengh swna sa bammei ta ai chu the. Ai zaucna bam khou, padeihmei khouringc ta tei swluai kan the, khatni kapumc tei maibwang khou tei phaiclouna swmut kan the.

¹²Baihmei khouringc nunc ta ni kaniw tuang ngamv laa ganc kan the, tiki tiiloumei ganv dak akhat na thu ringc kanak bam khang nuhlou e.

¹³Zingbangc mi ndawman hei howna bammei dak khou, maansei kumhmei akhat how e. Muangh rui guamliamna kamei adaeng khou guang e, khatni kamei tingsaengzaeng ringc bammeipu daeng thangc tei guang lana kakhou tiilou kan the.

¹⁴Kata kandih kapwm, zaatc kapwm khatni lat kapwm meic nunc rui kasiamruai sw khang kakhou tei ngamv, champouhmei khatni guangh ngamv tiilou kan the. Katuang ngamv tei tingsaengzaeng nai bam puni, khatni kaguanghdic tei nganvmei nai dat lak khe.

¹⁵Ai howmei ndawman tei rui ata tikaluang the, khatni reih reina bam key ngam mak khe.

¹⁶Mi khou tei ding bammei pang khou tei gaanv khat khou nganghna mi kabac guay tei dinclou khang sa the. Kumna kamei rui kabah tei dinclou the.

¹⁷Kamei rui sa the, “Mi daihmei khouringc padeih hei mi kandic khou guang pw nimei guangcdic padeih the.

¹⁸Kumna Kauh Liangmei Ravguangc tuang mei nunc rui guangh ngamv laana hei tei tingsaeng tingsaengzaeng khang lou kan puni e.”

¹⁹Mi tangv tei padeihmei khouringc, baihmei nunc tei lev nchamc makmei meicpingmei khouringc, katuang tanzinc tin khatni ntanh huc rui katuang zauczihmei guay ta siatpuatna mi guay ruc khou tei dingbin bammei lam khou tei ai mbuna thay nii khwan e.

²⁰Kapy khou kachei ruh naimei khatni kachei akhat thau pat lana baihmei kathumh ta swbow kanmei lam guay tei thay nii khwan e. Hei tei kamik khatni kamwang nai e kumna daic tuh tuna kagaengh sw bam e. Baihmei guay khang tei suangc hei tei meicpingmei lwn nai e.

²¹Ai rui zaucna bam khou, kachei tei rui Ravguangc tuang mei nunc ruc khou rih thauna kaniw ta ngam kan the.

²²Mi tangv tei tingsaengzaeng ringc bammeipu guangna Kauh Liangmei Racguangc tuang mei nunc khang tei latzan kauc patlou kan the. Ravguangc mei nunc rui guangh tuang ngamv laa nimei ganv guang pw the.

²³Akhou kabah dincloumei kiu mi hei the: “Padeihmei khouringc tei kandih khou nai pw nimei guangcdic khatni baihmei guangcdic guay khou rui baic lath lat pw nimei guangcdic akhat the. Mi rui kandih kapwm ta swpuat key puni kumna mi ti hei nii bin puni.

²⁴Kachei ruh tei mi guangcdic khou sin nimei guangh ruh the. Mi tangv tei guangh akhat pat dat puni; kamei tei nai bam reymei nunc suangc baic taph tap puni kumna kamei rui guangh kathumh ta swbow key puni.

²⁵Kamei rui Kauh Liangmei Ravguangc ruc khou lat sa puni kumna Ravguangc mei nunc ta rai puni. Kamei rui kaniw tuang ravchap latdanv guay khatni khumngai guay ta swkalaic khang sw puni, kumna Ravguangc mei nunc tei tingkwm kathumh kapaek kangamv bangc khou bam puni.

²⁶Hei tangv tingkauh latzan kai khou latzan sw puni the, kangamv guay laa ganc puni, kumna kata swkamut kamailou puni.

²⁷Kandih khou naimei guanghdih guay tuang ngamv khatni katik kahym guay tei Kauh Liangmei Racguangc tuang mei nunc khou tiilou puni. Kaniw tuang guangc ngamv nganvmei nai dat lak khe khatni kandih khou dihsinpouc guay rui kaniw siamruai sw puni khatni kaniw lat piu puni.”

²⁸Mi hei mi ndawman tuang lam nganvloumei kiu the. Ai ping ndavdyan dian khwan the, kumna ai ramh guayna sa pat makna alung khou phungc bam khwan e.