Read Rongmei Naga HOSEA 10 Bible Online

HOSEA 10 - Rongmei Naga bible

HOSEA 10

¹Isaraelmei nunc hei kathai nthai padik gith githmei drakhaluai kumc bam khwan e. Kaniw hei lungcgay la hay ravchabamv kasiamh thaulou geic hay hay the. Kaniw kandic khou phunling thuihlou, kaniw rui kalum bammei ntauh tiangc guay tei kasiamh chuylou hay hay the.

²Meic guatmei lung phunghmei nunc tei ntaw thu kaniw paap khang kaniw ryanra nina the. Ravguangc rui kaniw tuang ravchabamv guay swra key puni the khatni kaniw tuang kalummei tiangc guay sw kasic key puni the.

³“Aniu rui RINGHPOUC ta ping mak tipui zaeng rui aniu khang guangh maek khe. Tiki guangh rui aniu khang tabui swlou ngam ni cho?” twna meic nunc tei rui sa zaic puni the.

⁴Kaniw kabah maekmei lat sa the, saraamhmei syangdyng sw the khatni gaeng makmei latdyng sw the. Nchumhmei tei nchumh makmei tisw the, laupuk khou kakhai tanhmei pucbang thau kumc thau the.

⁵Saraamcna kaidai khou lungc bammei nunc tei ping puni the khatni Bethel tuang kachaekc guaituamchic tei amaan puni the. Samariamei khatni mi ravmaengc siamruai sw bammei amuh nunc tei mi khang tei kap puni the. Mi guaihmaengc tuang gunc tei amaan kan pwkhou kaniw pui huayna kap puni the.

⁶Mi ravmaengc tei Asiria thangc phungc tatna guanghdaihmei khang kat kan puni the. Isaraelmei tei mi racmaengc zaeng khou tei rui zak puni the.

⁷Kaniw guangc ta tei dui khou thingsaap nzuan tatmei kumc phungc tat puni the.

⁸Isaraelmei nunc rui ravmaengc kalumna bammei Aven tuang chyngtwan khou Isaraelmei guay tei swmutlou puni. Mi tuang ravchabamv guay tei sauhraengh bang rui thau liam puni the. Meic nunc tei rui chyngbut guay ta, “Aniw ta nkamhlou o!” twna khatni luanghbut guay ta, “Aniw ta gum binlou o!” twna sa puni the.

⁹RINGHPOUC rui sa e, Isaraelmei nunc hei kaniw Gibea khou paapc taanc rap khou tei rui thauna kaniw aruc khou paapc taanc nthaekc zat mak ge. Kumna Gibea khou kaniw ta rih alay tangc puni the.

¹⁰Mi paapcmei nunc ti hei ai rui sw puni the kumna kaniw ta dandi tii puni the. Zaatc guay kariuna kaniw ta sw puni the, kumna kaniw ta kaniw tuang paap heizumei khang rui dandi tii puni the.

¹¹“Kaganv akhat khou Isaraelmei hei laek chuyloumei, nap nii khang sinsw gaymei guaituamnay kumc bam khwan e. Tiki katuang mbuaihmei guanglingc khou tei guaihphu goulouna taanv titaanc ni the twna alung ding the. Kumna ai rui Juda ta guaihphu khatni Isaraelmei ta lauruk tizay the.

¹²Ai rui sa e, nangniw laupuk kathanc suak dat tho, hei khou tei ravchaptatmei lingc keylou tho, ata nzianmei tuang thai suaihiam tay tho!

¹³Tiki nangniw mi phaan tei simei lingclouna simei thai tay the. Nangniw hei nangniw tuang saraamhmei khou rui nthai patmei thai tei tu the. “Nangniw rui nangniw tuang rih gari guay khatni nangniw tuang rihmei sing geihmei khou lwmloumei zaeng rui

¹⁴nangniw ruc khou rih key puni the, kumna nangniw tuang raengc guay tei swralou puni the. Mi hei Guangh Shalman rui rih swna Betharbel kaidai swmutmei kumc khatni kapui lev kanac nunc ta kandih khou kathamv puat paruatloumei kumc nangniw khou swlou puni the.

¹⁵Mi hei Bethelmei nangniw rui si kanmei tuang taanv taanclou kanmei guay zaeng khou tei rui nangniw ruc khou guanglou puni the. Rih tei kahouh rappui lev, Isaraelmei guangc tei theic puni the.”