Read Rongmei Naga HOSEA 13 Bible Online

HOSEA 13 - Rongmei Naga bible

HOSEA 13

¹Tat kanmei ganv khou, Ephraim kaikhwang rui sa ti thei, Isaraelmei baihmei khwang guay tei ping bam khwan e, kaniw Ephraim ta ngangc phaengc bam khwan e. Tiki kaniw tei Baal ta kalumna paapc taanc the, mi zaeng rui kaniw theic puni the.

²Kaniw tanh tuang ravmaengc guay daandi tuang ravmaengc guay, maansei lungc rui kakhanhna damcloumei, maansei baanc rui kasiamhloumei ravmaengc guay ta kalumna paapc taancna bam e. “Mi racmaengc guay khou tei khaengna kalum nina the,” twna kaniw rui sa the. Kaniw rui guaichiclauna maengc guay ta tei kaput the.

³Kumna kaniw hei lauthwan achin amaan nuanghmei kumc, lauthwan zikdui phui nuanghmei kumc, amaan kan puni the. Kaniw tei laudy bamv khou rui mpwan rui phungc tat kanmei napgung tei kumc khatni maikhou kai khou rui patmei maikhou tei kumc amaan kan puni the.

⁴RINGHPOUC rui sa e, “Ai hei RINGHPOUC nangniw Racguangc, nangniw ta Izip khou rui zaypatmeipu tei e. Ai hamhna nangniw khang Ravguangc baihmei maek ge. Ai na hei nangniw ta kanloumeipu kiu e.

⁵Ai rui nangniw ta dui maekmei sypungramv khou makavlou the.

⁶Tiki nangniw ramv gaymei kandic khou tei gut pwkhou, tu nggu zangv ngguna pian the, khoutei nangniw gaengh sw thauna ata amuc the.

⁷Kumna ai rui nangniw ta kamang alaih rui nkai kumc nkai puni the. Kamangliangpui kumcna nangniw ta chaeng khou nchwan puni the.

⁸Kanac amaan kanmei chagamhkui kumcna ai nangniw ta anuay puni the, kumna ai rui nangniw ngaengv phaak padaklou puni the. Kamangliangpui kumcna ai rui nangniw ta kabamv khou tu mbamlou puni the, kumna nwmbangc khouringc kumcna nangniw ta siat puat paruatlou puni.

⁹“He Isaraelmei nunc, ai rui nangniw ta swmutlou puni the! Kum pwkhou nangniw ta thow rui nkhavlou ngam puni cho?

¹⁰Nangniw rui guangh khatni kapy nunc tiilou khang ney e, tiki tukumhna kaniw rui nangniw ta kanlou ngam ni cho?

¹¹Alungpuamcna nangniw khang guangh azuh ni tii the, khatni alungpuamcna ai rui kaniw ta laa ganc dat the.

¹²“Isaraelmei tuang paap khatni khuay guay tei hy keylou kan the, kumna mi hy keyloumei tei ry tiph tipna rylou kan the.

¹³Isaraelmei hei ringc kan diu khang kadow gaymei tiilou the, tiki mpang langvna hei tei laa kan mak khe kaniw puanc pat nimei ganv tangh the tiki kapui nacbamv khou rui pat mumei nac kumc the.

¹⁴Ai rui kaniw ti hei theihmei kandic khou rui kanlou lak khe khatni theihmei ngamv khou rui tiduak lak khe. He theihmei, nang tuang ravpyan phungc guang tho! He theihmei kandic, nang tuang swmutmei phungc guang tho! Ai rui kaniw ti hei zauc nzianlou dat lak khe.

¹⁵Isaraelmei nunc hei zuangctou bang guay kumcna daicthau bam sini, ai rui sypungramv thangc rui suhmei neihpat pwan ti aliu guang puni, kumna hei tei rui kaniw tuang duithuak khatni duikhunc guay tithip kan puni. Khatni kamanv kunghmei puat guay ta phungc tat kan puni.

¹⁶Alat liammei zaeng rui Samaria ta ai rui dandi tii puni the. Kamei nunc rih khou theic puni; ngasatna nunc ta kandih khou kathamv puat paruatlou puni, khatni kapumc nrit bammeipui nunc bung tei seihuakh seihuaklou puni.”