Read Rongmei Naga HOSEA 2 Bible Online

HOSEA 2 - Rongmei Naga bible

HOSEA 2

¹Hei zaeng rui, he Jezreel nang chana swmei Isaraelmei ta “Ravguangc mei nunc,” khatni “RINGHPOUC rui nzianmei nunc,” twna kaw o.

²Anac nuncle, nang pui hei anow sw taanc bam sini, ai hei kagaanv sw taan bam sini, nang pui ta sa o. Kamei mangcsangmeiluc swna lungcmaanv lungcmow bammei hei nthaekc khang sa o.

³Kamei nthaekc mak ge thei, ai rui kata puanc pat nungc tei kumcna tipaliuclou puni. Ai rui kata kangc khiaumei ramh thau makmei ramkaengv kumc tiswlou puni, kumna kamei ndaapc tarina theic puni.

⁴Ai rui kanac nunc ta nzianlou lak ge, kalam thu mangcsangmeiluc nac nunc the.

⁵Kamei rui sa e, “Ai rui ai nzianmeipu nunc daeng thangc tat ni kaniw akhang tu khang zangv khang tiilou e, kumna kanac nunc ti hei zak thay makna khatni zawsimei khou puanc patlou tuang e. Ramhhiw phey khatni linen phey Olive thauc khatni drakhadui tiilou e.”

⁶Kumna ai rui kata sauhraengh rui raeng binlou puni the khatni kachaeng raengh rui raeng thingclou puni the.

⁷Kamei rui kamei nzianmei nunc ta pakna lay nzwan tat puni the tiki kaniw ta nymtow pu lak khe. Kamei rui kaniw ta phu puni the tiki kaniw ta phutow pu lak khe. Khou kiu kamei rui, “Ai agaanv reymei daeng thangc guang dat ni the—ntaw khang suangc mi douc tei rui gay mbuna bam khwan e,” twna sa dat puni the.

⁸Kamei rui Baal ta kalum khou sinsw bammei nap-bi, drakhadui, Olive thauc, daandi, khatni kachaekc guay tei ai rui kakhang tiiloupui tuang e twmei kamei thay zat mak ge.

⁹Kumhpui zaeng rui atuang ai rui tiiloumei nap-bi khatni drakhadui tei kathai laamei ganv khou ai laa dat kan puni khatni kaphey kabaan khang tiiloumei ramhhiw phey khatni linen phey tei laa dat kan puni.

¹⁰Karamckhangc nunc mav khou ai rui kata tipaliuclou puni, kumna meic gaanv khat na rui sini kata abaanc khou rui kanlou dat ngam ni tuang hamh the.

¹¹Katuang khumngai guay ti-nthaekc puni the—katuang tingkwm tuang khatni bw tuang ngai guay khatni katuang Sabbath ngai guay katuang ravriak tuang guang kariumei mung guay ti-nthaekc puni the.

¹²Kamei rui karamckhangc nunc tuang siamruai swlou tina tiiloumei tuang e twna kamei rui sa bammei katuang drakhaluai guay khatni tadut bang guay tei swmaan puni the. Ai rui katuang drakhalau khatni tingthailau guay ta nwmbangc tiguanhlou puni; nwmbangc khouringc nunc rui hei tei sw kasic key puni.

¹³Kamei rui ata amuclouna Baal khou agaw nteina khatni ntuh-ntah nu lana karamckhangc nunc ta phuna tat bammei zaeng khou tei rui ai rui kata dandi tii puni. RINGHPOUC rui sa the.

¹⁴Kumna ai rui kata syniang ramv thangc phungclouna, hei khou tei kata nzianmei lat rui kalung tikalaiclou dat puni.

¹⁵Katuang drakhalau guay tei ai rui kakhang tiilou dat puni khatni ryanramei nzaengc ta tei machunhmei chaengmun tiswlou puni. Kamei chabwan swna bammei douc, kamei Izip khou rui guangmei douc tei kumna kamei rui akhou mundaw dat puni.

¹⁶Khou kiu kamei rui ata kagaanv twna kaw dat puni—kamei rui ata katuang Baal twna kaw dat pw lak khe.

¹⁷Ai rui kata Baal zanc kamwang khou tisa dat lak khe.

¹⁸Mi ganv khou kiu amei nunc ta sw kasic mak khang ai rui nwmbangc khouringc khatni nruay thauruay guay lev latdyng sw puni the. Ai rui mi kandic khou rui rih na guay, buy-baeng guay khatni sauhpai guay laa ganc puni the, kumna amei nunc ta suc-rih maekna nchu-nzaenghna tilungclou puni the.

¹⁹He Isaraelmei, ai rui nang ta anow tisw puni; ai hei nchumhmei khatni lwmnuhmei sw bam puni; ai rui nang ta taek makna nzianlou bam puni khatni nang ta tingsaengzaeng atuang tiswlou puni.

²⁰Ai atuang latdyng ngaek bam puni kumna nang ta atuang tisw puni, nang rui ata RINGHPOUC e twmei thay puni.

²¹Mi ganv khou kiu Isaraelmei amei nunc rui huayneymei ai rui dawlou puni.

²²Ai rui kandih khou ting tiriu keylou puni, kumna kandih rui nap-bi, drakhathai khatni Olive thai tipat puni.

²³Ai rui amei nunc ta mi kandic khou hei kasiamh thaulou dat puni kumna kaniw ta tilungcgay chingkhiuhlou puni. “Nzianlou Makmei” twna kaw bammei nunc ta tei ai rui nzianlou puni “Amei nunc Hamh The,” twna kaw bammei nunc ta tei “nangniw Hei Amei nunc e,” twna ai rui sa puni, kumna “Nang hei aniw Racguangc e,” twna kaniw rui daw puni.