Read Rongmei Naga HOSEA 4 Bible Online

HOSEA 4 - Rongmei Naga bible

HOSEA 4

¹Mi kandih khou lungc bammei nunc hei Ravguangc hu khou kaniw khuay nai the. Nking o, he Isaraelmei, Ravguangc rui sa e; “Mi kandic khou hei lwmnuhmei khatni nzianmei maek ge, khatni meic nunc rui ata Ravguangc e twna laalou mak ge.

²Kaniw latdyng mpeyna sw e tiki mi guay tei sw bak ge; kaniw saraamc e, meicdow e, kaihouc e, khatni lungcmaanv lungcmow e. Tasiat taanv mbu thau the, khatni swluai swtiatmei hei geic hay hay thau the.

³Kumhpui zaeng rui kandih hei phui key puni the, mi kandic khou ringc bammei katana theic puni the. Khouringh khounah, nruay thauruay, khav-ga nganv, kaguayna theic puni the.”

⁴RINGHPOUC rui sa e, “Meic nunc khou tei khuay nkhamlouna luh bam riu—ai rui sa nimei thu amuh nunc nangniw ruc khou e.

⁵Zingbangc kalaanv nangniw phaysuyna bam e, muhzwng nunc ni kasuan mak khe. Hei zaeng rui ai rui nang pui Isaraelmei ta swmaan puni the.

⁶Amei nunc hei mut the kalam thu kaniw ata thaylou mak khe. Amuh nunc nangniw ata thay zih the kumna ai rui nchamloumei ta laalou mak khe, hei zaeng rui ai rui nangniw ta ganc pat the khatni nangniw nac nunc ta atuang amuc swna laalou dat lak khe.

⁷“Nangniw amuh geic hay nangniw aruc khou paapc taanc geic hay hay the, hei zaeng rui nangniw tuang chakhwang champouhmei tei zakmei khou guanhlou puni the.

⁸Amei nunc tuang paap khou rui nangniw lungcgay thau the, kum tina nangniw rui kaniw ta paapc mbu mbuna taanhmei ta kahaw the.

⁹Meic nunc ruc khou tiiloumei dandi tei nangniw ruc khou ni tiilou puni the. Ai rui nangniw ta dandi tii puni khatni nangniw rui taanclou kanmei simei taanvphy tei khangclou puni.

¹⁰Ravkhaengmei tuang nangniw dam tei nangniw tu bam sini nggu zat mak puni. Kingckiumei rav ta nangniw kalumna nthah-bowlahmei taanv taanc bam e, tiki nangniw tunapuan maek puni, kalam thu nangniw ata ganclouna rav baihmei thei lay kan the.”

¹¹RINGHPOUC rui sa e, “Drakhadui kaguangc khatni kathanc rui amei nunc lungning swmaan the!

¹²Amei nunc rui kaniw thay niimei tei thing tiangh khou thanv the. Kaniw rui thay niimei tei thingchiang rui dinclou the! kaniw ata ganclou the. Mangcsangmeiluc kumcna, kaniw rana kaniw ta rav baihmei nunc khang tii kan the.

¹³Chyngtwan twan khou swloumei ravbamv guay khou kaniw ravkhaeng the, khatni chyngbut ruc khou nai naimei kauhmei kaphaan gaymei thingbang bangc khou kasung tei zuh zu the twna kaniw agaw nteina kalum the! “Mi thai tei nangniw nac aluh nunc kaniw pumc zuanc the, khatni nangniw thunc-mauc nunc lungcmaanv lungcmow the.

¹⁴Kum bam sini mi khang rui ai kaniw ta dandi tii lak ge, kalam thu nangniw kahak ni Ravkai tuang mangcsangmeiluc nunc khou tatna bam e, khatni kaniw lev rav baihmei nunc khang khaeng the. Latkwdyn khou samei kumcna ‘Kabah thay makmei maansei nunc tei amaan puni.’

¹⁵“Amei Isaraelmei nunc rui akhou lwmnuh makmei sw bam sini, Juda thu mi kumhmei khuay tei sw mak kan diu. Gilgal khou ni Bethel khou ni kalum riu, hei khou tei ringhmei Racguangc zanc khou rui latdyng sw riu.

¹⁶Isaraelmei nunc hei guaihnay kumc kanu tanc e. Akumhna ai rui kaniw ta lauziunac nunc ta kumc mphuaih pung khou titu ngam nina cho?

¹⁷Isaraelmei nunc ti hei ravmaengc guay rui sw pagui the. Kaniw ningraeng sw kan di tho.

¹⁸Zouh zangv mbalouna, nthah bowlahmei khou lungh gut the, chakhwang champouhmei ta suangc zakmei ta kaniw kahaw the.

¹⁹Mpwan rui phungc ganh kumc kaniw ta phungc ganc puni the, kumna kaniw rav baihmei khang khaeng bammei phy tei kaniw zakmei ariw puni the.