Read Rongmei Naga HOSEA 5 Bible Online

HOSEA 5 - Rongmei Naga bible

HOSEA 5

¹“Mi hei nking o, amuh nuncle! Lungh gutlou lo, he Isaraelmei thiu! nking o, nangniw guanghkaimei nunc! nangniw hei nchumhna latzan sw nimei thouc e, hei zaeng rui nangniw ruc khou latzan key puni the. Nangniw hei Mizpa khou phah the, Tabor Chyng khou zawloumei kih the.

²Akasia khou nthukmei kuam the kumna ai rui nangniw kaguayna ta dandi tii puni.

³Isaraelmei ta ai thay e, kamei akhou rui nkamh ngam lak ge. Kamei hei lwmnuh mak the. Kumna kamei nunc hei ata kalum khang biuh mak khe.”

⁴Kaniw tuang simei taanv hei rui kaniw Ravguangc khou hanc guang dat nimei ta khaam the. Ravmaengc kalummei chwn rui kaniw ta sin bin the, kumna kaniw RINGHPOUC ta thay mak khe.

⁵Isaraelmei nunc tuang daihriw swmei tei rui kaniw khuay tei lyan bam the. Kaniw paap rui kaniw ta phay tisuy the khatni tibow the, kumna Judamei nunc ni kaniw lev bow nchamc the.

⁶Kaniw rui lauziu khatni guaih RINGHPOUC khang khaeng e, tiki hei tei rui kaniw khang gaengmei tuang maek khe. Kaniw rui kata phutow ngam mak khe, kalam thu kamei rui kaniw ta ganclou the.

⁷RINGHPOUC ta kaniw guat the; kaniw nac nunc tei nkhahnac nunc di the. Kumna ntaw thu kaniw khatni kaniw kandic ta katumcna swmaan puni the.

⁸Gibea khou rih bianggun amuan tho! Rama khou lauziuchei amuan tho! Bethel khou rih kauc tho! Rihbamv khou gut tho, he Benjaminmei riphyan guay!

⁹Dandi tingmik kiu guang pu the, Isaraelmei ta swmutlou puni the. Isaraelmei nuncle, mi hei pat changh puni the!

¹⁰RINGHPOUC rui sa e, “Ai lungpuamh the, kalam thu Juda tuang kapy nunc rui Isaraelmei khou rih keyna kaniw tuang ramv laagut kan the. Kumna ai rui kaniw ruc khou duidaih kumc dandi bun key puni the.

¹¹Isaraelmei hei rairiu khaengvna bam e; katuang ramv tei amaan the; kalam thu nkhavlou ngam lak nimei nunc khou kamei tatna bam e.

¹²Ai rui Isaraelmei ta sw kasic karouclou puni khatni Juda ta swkamut kamailou puni.

¹³“Isaraelmei rui katuang sunu tei how pwkhou khatni Juda rui katuang zam zei guay tei how pwkhou, nkhavlou diu khang Isaraelmei rui Asiriamei guanghdaihmei daeng thangc tat the, tiki kamei rui kaniw ta tigaylou ngam mak khe.

¹⁴Ai rui Isaraelmei khatni Judamei nunc ta kamangliangpui kumc sw key puni the. Ai rui kaniw ta sat karu pat pwkhou, meic gaanv khat na rui sini kaniw ta kanlou dat ngam lak khe. Ai kahak rui kaniw ta thaek puat paruatna ganclou puni the.

¹⁵“Amei nunc hei kaniw paap khang rui ryanra biuc ryanra lana ata phu guang dat mak saanv ai rui kaniw ta ganclou puni. Kaniw ryanra pwkhou ata phu dat pwng e.”