Read Rongmei Naga JOEL 1 Bible Online

JOEL 1 - Rongmei Naga bible

JOEL 1

¹Mi hei Pethuel nac mpouh Joel khou tii guangmei Ravguangc tuang lat re.

²Mi hei nking o, he gaanvthaih nunc; Juda khou bammei kathuicna, nking o. Mi kumhmei nangniw zuk khou pwni nangniw pupouc zuk khou pwni pat kan the cho?

³Mi hei nangniw nac nunc khou raclou tio; kaniw rui kaniw nac nunc khou rac kadailou kan diu o. Kaniw nac nunc ni kaniw nac nunc khou raclou kadai kan diu o.

⁴Nap nkav pang rui tu nsaekcloumei tei pyzinpui pang rui tu kan the; pyzinpui pang rui tu nsaekcloumei tei pyzinpui naw rui tu kan the; pyzinpui nau rui tu nsaekcloumei tei baihmei nkav rui tu kan the.

⁵Zipthauna kap tho, he zouh zangv mbamei nunc; kaucna kap tho, zouh zangvmei nunc, zouh thanh kasiamh nimei drakha thai guay tei sw kasic ngam the.

⁶Nkav ricmei rui aniw kandic ta adow the; kaniw tei pumtan tanc e khatni kasing chak ngam thay lak ge; kaniw nei tei kamang nei kumc ntuk ge.

⁷Kaniw rui aniw tuang drakha bang guay tu mut ngam the khatni aniw tuang tadut bang guay nchupc mut ngam the. Kaniw rui thing gi guay tac tu ngam the, kachy guay tac mphwan phum ngam the.

⁸Tunacpui rui khamthanloumei gaanv ta theic ntamvna kapmei kumc kap tho, meic nuncle.

⁹Ravkai khou katlou khang nap-bi maek khe, drakhadui ni maek khe; RINGHPOUC khang katlou khang ramh maekna amuh nunc ni huayna kap the.

¹⁰Laupuk guay tei karaeng di the; nap-bi guay swmut ngam the, drakha bang guay kangc ngam the, Olive bang guay ni ngguaih ngam the kandih rui zaengsina kap the.

¹¹Zaengsina kap tho, he lau taanhmeithiule; latluna kap tho, drakhalau ruaihmei nuncle, gehu ni sipian ni, ngguay, phunling kaguayna sw kamut kamai ngam the.

¹²Ngguaihkey ngam the puc-heithai, tadanv khatni appal bang, laupuk tingthai bang guay; tingthai bang guay theic ngam the. Meic nunc tuang neihlamei maek khe.

¹³Ravchapaeng khou thouh swbammei amuh nunc, zaengsiphey piuna kap tho! Ravkai thangc tatna zingbangc saanvsaengh kapna huay tho! Nang Racguangc khang katlou khang nap ni drakhadui ni maek khe.

¹⁴Munthiangh khang latdanv pat ti tho; charuangcdai kaw kaduai tho, gaanvthaih guay ta kaw kaduai tho Judamei meic kaguay ta ni kaw guang tho, RINGHPOUC aniu Ravguangc tuang Ravkai khou guangna kakhou kaplou tho.

¹⁵RINGHPOUC tuang latzan tingmik hei ana the; Ngamparymeipu rui sw kamut kamaimei tiguang nimei tingmik ana the. Mi tingmik kiu adihkamv meicpingmei tingmik puni cho!

¹⁶Aniu hu khou rui aniu tuang nap-bi sw kasic karouc key kan the. Aniu Racguangc kai khou neihlamei maek khe.

¹⁷Kandih kanghmei khou phunling thw guay theic ngam the. Saamh khou phungclou khang nap-bi maek khe, saamh raeng guay tei raam ngam the.

¹⁸Guaih-bangh guay ni ndaapcna rah the, kaniw taek tuloumei bamv maek khe; lauziu guay ni ryanra the.

¹⁹Ai rui RINGHPOUC, nang khou kapna huay e, kalam thu guaihbyn khatni thingbang guay mai raw kumc kykaengv ngam the.

²⁰Nwmbangc khouringc nunc rui nganvna nang khou kapna huay e kalam thu duithuak guay kangc ngam the.