Read Rongmei Naga AMOS 1 Bible Online

AMOS 1 - Rongmei Naga bible

AMOS 1

¹Mi hei Tekoamei lauziu gaenghmeipu Amos tuang lat guay e. Baengla zaymei hu khou tingkwm kanei, Uzzia rui Judamei guangc khatni Jehoas nac mpouh Jeroboam rui Isaraelmei guangc sw bammei douc Ravguangc rui Isaraelmei lam khou mi guay hei Amos khou ndauhloumei tuang e.

²Amos rui sa the, “RINGHPOUC Zaion Chyng khou rui kamangliangpui rah kumc rah pat the; Jerusalem khou rui tingthinc ganhkey kumc pat the. Lauziu byn guay kangc ngam the, Karmel Chyng tuang mphuaic guay theic ngam the.”

³RINGHPOUC rui sa e, “Damaskasmei nunc hei paapc taanc kasuan kasuanna bampui zaeng rui ai rui kaniw ta dandi tii puni the. Kaniw rui Gileadmei nunc ta ntanh naplaek rui laudy kumc dy the.

⁴Hei zaeng rui Guangh Hazael tuang guangckai khou ai rui mai tii key puni the, kumna Guangh Benhadad tuang rihgaekkai tei mai rui tumutlou puni the.

⁵Ai rui Damaskas kaidai raengc khamvtaan diangcbau puni the khatni Aven nzaengc khou bammei nunc khatni Bethedenmei tuang dihsinpouc ta swmutlou puni the. Siriamei nunc ta Kir thangc nym tat puni the.”

⁶RINGHPOUC rui sa e, “Gazamei nunc paapc taanc kasuan kasuanna bampui zaeng rui ai rui kaniw ta dandi tii puni the. Kaniw rui zaatcpwm ta nym zayna Edommei nunc khang bangh swna zuanclou the.

⁷Kumna ai rui Gaza kaidai tuang raengh khou mai tii key puni the kumna mi tuang rihgaekkai tei mai rui rawmut puni the.

⁸Ai rui Asdod khatni Askelon tuang guangc ta swmaan puni the. Ai rui Ekron kaidai ta dandi tii puni the, kumna theic nsaekcloumei Philistinmei guay tei ni theic puni the.”

⁹RINGHPOUC rui sa e, “Turmei nunc hei paapc taanc kasuan kasuanna bampui zaeng rui ai rui kaniw ta dandi tii puni the. Kaniw rui zaatcpwm ta Edom thangc kangmei swna zuanclou the, kumna champanv swmei tuang latdyng tei kaniw ngaek mak khe.

¹⁰Kumna ai rui Turmei kaidai raengc khou mai tii key puni the kumna mi tuang ricgaekkai guay tumutsutlou puni the.”

¹¹RINGHPOUC rui sa e, “Edommei hei paapc taanc kasuan kasuanna bampui zaeng rui ai rui kaniw ta dandi tii puni the. Kaniw rui kaniw chana punav, Isaraelmei ta buy-baeng sinna alay the, kumna kaniw khou nzianmei khat sini maek khe. Kaniw lungpuam kanganv maek khe, kim key zat mak khe.

¹²Kumhpui zaeng rui ai rui Teman kaidai khou mai tii key puni the kumna Bozra tuang rihgaekkai guay raw mutsutlou puni the.”

¹³RINGHPOUC rui sa e, “Ammonmei nunc hei paapc taanc kasuan kasuanna bampui zaeng rui ai rui kaniw ta dandi tii puni the. Kaniw rui kaniw kandic ramvrei tidaic khang rihswna Gileadmei kapumc nritmeipui nunc ta kabung khou rui kanac siu patlou the.

¹⁴Hei zaeng rui Rabba kaidai tuang raengc khou mai tii key puni the, kumna mi tuang rihgaekkai guay raw mutsutlou puni the. Khou kiu rih adowpui nungc kiu kauc kachin karo key puni the, kumna pwansa kumc adow katungh thungh key puni the.

¹⁵Kaniw tuang guangc khatni meicdaihmei nunc ta tei nym tat puni the.”