Read Rongmei Naga AMOS 2 Bible Online

AMOS 2 - Rongmei Naga bible

AMOS 2

¹RINGHPOUC rui sa e, “Moabmei paapc taanc kasuan kasuanna bampui zaeng rui ai rui kaniw ta dandi tii puni the. Kaniw rui Edommei guangc rou ta chakhwang sw makna chaniu raw mbaihlou the.

²Ai rui Moab kandic khou mai tikeyna Keriot tuang rihgaekkai guay raw mutsutlou puni the. Rihmei nunc rui kaucna khatni bianggun muanna bammei rih tuang kachin karomei ding khou Moabmei nunc theic puni the.

³Ai rui Moabmei guangc khatni mi kandic tuang kapy nunc ta swluai puni the.”

⁴RINGHPOUC rui sa e, “Judamei paapc taanc kasuan kasuanna bampui zaeng rui ai rui kaniw ta dandi tii puni the. Alat ta kaniw thouhsw mak khe kumna alatdanv guay kaniw ngaek mak khe. Kaniw pupouc nunc kalummei rav rui kaniw ta zay laanh kan the.

⁵Kumna ai rui Juda ruc khou mai tikeyna Jerusalem tuang rihgaekkai guay raw mutsutlou puni the.”

⁶RINGHPOUC rui sa e, “Isaraelmei paapc taanc kasuan kasuanna bampui zaeng rui ai rui kaniw ta dandi tii puni the. Kaniw pow khangc ngam lakmei kalung nthanmei nunc, phaythuapc manv na sini khangc ngam lakmei lungcsi lungcroumei nunc ta kaniw rui bangh khang zuanc the.

⁷Kaniw rui nsuanmei ngangvbamv maekmei nunc ta katwan bin the. Kumna lungcsi lungcroucmei nunc ta tiryanra the. Kapu kanac banghpui akhat na khou tatlou kariu the, kumna atuang nthanmei zanc swtanac the.

⁸Lungcsimei nunc rui sindaancloumei pheybaan guay tei kalummei bamv kathuic khou baanv zip the. Kaniw pow phunghmei nunc khou rui khapna laaguangmei drakhadui tei kaniw Ravguangc tuang kai khou zangv the.

⁹“Amei nuncle, nangniw zaeng rui ai rui sidar bang saan kauhmei mphauhbang kumc tanhmei Amormei nunc ta swmaan mutsutlou the.

¹⁰Ai rui nangniw ta Izip khou rui nduangh patna, tingkwm 40 sypungramv khou zay kaanlouna, nangniw khang Amormei kandic tiilou the.

¹¹Ai rui nangniw nac nunc asaekc ta muhzwng khang, chabwan asaekc ta Nazirai khang kawlou the. RINGHPOUC ai rui thanv e, kiuc hamhna cho Isaraelmei nac nuncle?

¹²Tiki nangniw rui Nazirai nunc ta zouh tizangv the, khatni muhzwng nunc ta alat sa nuh mak khe twna thingc the.

¹³Zauc tho, ai rui nangniw ta kandih khou niakpiaklou puni the kumna nap peic padikloumei guaih gari kumcna nangniw ratuai key puni the.

¹⁴Pak tanhmei nunc ni duak ngam lak khe; tanhmei nunc ni kaniw pumtan nai lak khe, khatni rihmei nunc ni kaniw panty kan ngam lak khe.

¹⁵Sauhpai sinmei nunc ni ding ngam lak khe, kaphay nthaanmei nunc ni pak duak lak khe, takuanh tuanghmei nunc ni pak duak lak khe.

¹⁶Mi nungc kiu tancbauhmei rihmei nunc nganv kaniw tuang buy-baeng ganclouna pumtang pak puni the.” RINGHPOUC rui kumna sa the.