Read Rongmei Naga AMOS 3 Bible Online

AMOS 3 - Rongmei Naga bible

AMOS 3

¹Isaraelmei nuncle, RINGHPOUC kamei rui Izip khou rui nduangh patloumei nangniw lam khou kamei rui samei hei nking o:

²“Kandih nam ruc khou naimei zaatc guay pang khou rui ai rui thayloumei khatni kadanloumei zaat kiu nangniw na de. Hei zaeng rui nangniw tuang paap guay khang tei ai rui nangniw ta dandi tii puni the.”

³Guang kariu khang nuh nchamclou makna meic gaanv nei nggin thau nchamc nuh dina cho?

⁴Kamangliangpui rui khouringh ariw makna nwmbangc khou rah dina cho? Ramh akhat nymtow makna kamangliangpui chatanh rui kakai khou rah dina cho?

⁵Phah khou kataek ndaanvlou makna nruayna key manc dina cho? Phah tei ramh akhat rui sw nkhaplou timakna karana nkhap dina cho?

⁶Kaidai khou rih khuangc hiw pwkhou ping lak nimei thow nai cho? RINGHPOUC rui tiguang makna kaidai akhat khou sw kasic karoucmei guang dina cho?

⁷Kauh Liangmeipu RINGHPOUC hei katuang raeng kabangc muhzwng nunc khou ndauhlou rey makna ramh akhat na sini taanh mak ge.

⁸Kamangliangpui rah pwkhou thow ping mak ngam nina cho? Kauh Liangmeipu RINGHPOUC rui sa pwkhou thow rui kalat tei sa ndauh makna bam ngam nina cho?

⁹Izip khatni Asdod tuang guanghkai khou lungc bammei nunc khou kumna sa o, “Samaria chyngbut khou guangna mi khou tei swluai swtiatna kaniw khat lev khat ta pingna bammei ta tei zauc lo.”

¹⁰RINGHPOUC rui sa e, “Meic nunc tei kaniw kai khou tei swluai swtiatna khatni asut animna laaguangmei puat rui padik the. Nchumhna lungc nimei thak ni thay mak khe.

¹¹Hei zaeng rui zauczihmei rui kaniw kandic ding nkuayna kaniw tuang raengc guay swra puni the, kumna kaniw kai nuam puni the.”

¹²RINGHPOUC rui sa e, “Lauziu gaenghmei nunc rui kamang nkai kanmei lauziu tan kanei na hamh e thei kanu akhat na kamang mwang khou rui asut guang datmei kumcna ntaw nungngai amanvmei laeng khou aliau mphaih bammei Samariamei nunc hei meic katit na nsaekclou puni the.

¹³Ntaw nking o, Jakob kikta khou kumna sa o,” twna Ngamparymei Kauh Liangmei RINGHPOUC rui sa the.

¹⁴“Isaraelmei nunc ta kaniw paap zaeng rui ai rui dandi tiipui nungc kiu thu, kaniw tuang Bethel khou naimei ravchabamv tei sw kasic puni the. Ravchabamv chei guay tei swbau puni the, kumna kandih khou taek key puni the.

¹⁵Ai rui tingsei kai ni tinglwm kai ni swra puni the. Guaipuang nei rui karuhloumei kai guay tei bow puat paruat key puni the; kai daihmei guay tei nai dat lak khe.”