Read Rongmei Naga AMOS 6 Bible Online

AMOS 6 - Rongmei Naga bible

AMOS 6

¹Zaion khou ramhningtow makna lungc bammei nunc khatni Samaria khou lunghgeic kadan thay makna lungc bammei nunc mi zaatc daihmei Isaraelmei khou meicdaihmei sw bammei nunc khatni nkhavlou khang meic nunc rui nzwan guangna bammei nangniw sansi e dav!

²Kalne kaidai tei tatna zauc o. Mi tangv kaidai daihmei Hamat thangc tat ro khatni Philistinmei kaidai Gat thangc tei keyna zauc o. Mi guay tei Isaraelmei guanghdic suangc gay mbu bu cho? Kaniw kandic tei nangniw kandic suangc daic bu cho?

³Ryanra ryanriumei tingmik guang pw the twmei nangniw nuh nii mak ge, tiki nangniw taanv rui mi tingmik tei ti-ana guang the.

⁴Guaipuangnei laeng khou nliau ntyng dingh dingna nliauna guaihnac zanc khatni lauziunac zanc tuna khumngay bammei nangniw sansi e dav!

⁵David kumc nangniw lu phuakna nrah downa suan e.

⁶Nangniw zouh kabuangc daih daihmei padik padikna zangvna, kungh kunghmei mwndui thauc tey lana, sw kasicna ganclou bammei Isaraelmei khang rui nangniw lunghgeih mak ge.

⁷Kumhpui zaeng rui ginramc thangc nym tat nimei khou hu liang nimei kiu nangniw hei the. Nangniw tuang khumngay khatni zouhluh-lauhdaih guay tei luai kan puni the.

⁸Kauh Liangmei Ngamparymeipu RINGHPOUC rui mi kalaic dat lakmei latdyng hei sw the, “Isaraelmei tuang daihriw swmei tei ai karaeng e; kaniw tuang kamanv kunghmei rihgaekkai guay tei ai karaeng e. Kaniw tuang kaidai khatni mi khou naimei kaguayna tei zauczihmei nunc khou ai rui tii kan puni the.”

⁹Kaikhunh akhat khou gaanv ruh theic nsaekclou e thei, kaniw tei ni theic puni.

¹⁰Kariang kaluaicmei theihmei pumc nunc tei mai ntei nimeipu rui theihmei pumc nunc tei laa pat khang kai khou tei gutna khou tei dup bammei thowkumhmei khou tei, “Meic baihmei ni nai di he cho?” twna thanv ti khou “Maek khe,” twna daw puni khou tei, “Latlu riu, RINGHPOUC zanc panc nuh mak khe,” twna kamei rui sa puni.

¹¹RINGHPOUC rui latdanv tiipat pwkhou kai daihmei ni nthyammei ni diangc puat paruatlou puni the.

¹²Takuanh rui khow khou pak tat na cho? Meic nunc rui duipui[1] khou lau suakna cho? Tiki nangniw rui thu nchumhmei ta khay tiguanh kan the khatni nzihmei ta laanhmei tiguanh kan the.

¹³Lodebar kaidai laa the twna nangniw zaenggay e. “Aniu tuang pumtan rui Karnaim kaidai laa the,” twna nangniw gaengh sw e.

¹⁴Zauc lo, Ngamparymei RINGHPOUC Ravguangc rui sa e, “He Isaraelmei nuncle, nangniw kandic tei laa khang ginramdic ricmei ta ai rui thouc guang puni the. Kaniw rui nangniw ta dihpy thangc Hamat chaeng khou rui dihba thangc Araba nzaengc nganv rai key puni the.”