Read Rongmei Naga AMOS 7 Bible Online

AMOS 7 - Rongmei Naga bible

AMOS 7

¹Zaeng neih khat Kauh Liangmeipu RINGHPOUC rui akhou ndawman akhat lyanlou the. Mi khou tei guangh tuang dam mphuaic tei tay tang lana kabwan thau kahow datmei ganv khou kamei rui pyzinpui naw pang kasiamh kanmei ta ai how the.

²Pyzinpui naw pang tei rui thingnuy paannu ndiakcmei guay ta tu ngam kan nimei ta ai how the. Kumna ai rui sa the, “Kauh Liangmeipu RINGHPOUC, nang mei nunc ta kuaklou o. Akumhna kaniw ringc ngam nina cho? Kaniw hei katit na de khatni nsuanmei de.”

³Khoutei RINGHPOUC kalung kalaicna, “Mi hei tipat dat lak khe,” twna sa the.

⁴Zaeng neih khat Kauh Liangmeipu RINGHPOUC rui akhou ndawman akhat lyanlou dat re. Kamei rui kamei nunc ta mai rui dandi tii khang sw bammei ta ai mi khou tei how the. Mi mai tei rui kandih bangc khou naimei duipui daihmei ta kau thipna, laupuk ta raw thau the.

⁵Khoutei ai rui kumna sa the, “Nthaekclou o, RINGHPOUC Ravguangc! Akumhna nang mei nunc ringc ngam nina cho? Kaniw hei katit na de khatni nsuanmei de!”

⁶RINGHPOUC kalung kalaic datna sa the, “Mi hei ni tipat lak khe.”

⁷RINGHPOUC rui akhou ndawman akhat lyanlou dat re. Mi khou tei mikzuatriang thaengcna ding ntyng dingloumei ngaengsaengc akhat twan thangc rui kamei rui mikzuatriang thaengc keyna ding ntyngmei ntyng makmei zauc bammei ta ai how the.

⁸Kamei rui akhou, “Amos nang tabui how bu cho?” twna thanv e. “Mikzuatriang ta how e,” twna ai daw the. Mi khou tei kamei rui kumna sa the, “Ai mi hei lyanmei thu amei nunc hei mbianghmei ngaengsaengc kumc the twmei lyan khang e. Ai alung kalaic dat lak khe, dandi tii puni the.

⁹Isak kikta nunc tuang ravbamv guay tei sw kasic puni the. Isaraelmei tuang kalummei bamv guay tei sw kasic puni the. Guangh Jeroboam kaikhwang ta swluai mutsutlou puni the.”

¹⁰Bethel tuang muhzwng Amazia rui Isaraelmei guangc Jeroboam khou kumna lat dinc guang the: “Amos rui nang ta sw kasic khang mbincna meic nunc ding khou sw bam the. Kalatsav rui kandih sw kasic puni the.

¹¹‘Jeroboam hei buy-baeng hu khou theic puni the, kumna Isaraelmei ti hei kaniw kandic khou rui nymtat puni the,’ twna kamei rui sa bam the.”

¹²Khoutei Amazia rui Amos khou sa the, “He muhzwngle, Juda kandic thangc tat dat tho. Mi khou tei ravmun dincna nang bung phy khang ntaanv tat tho.

¹³Bethel khou tei ravmun dinc dat ri tho. Mi hei guangh tuang kalummei bamv e, khatni kandihmei tuang ravkai e.”

¹⁴Amos rui daw the, “Ai hei muhzwng hamh e, muhzwng kikta ni hamh e. Ai hei khouringh nruaihpui mei de, khatni ai hei tadutlau ruaihpui mei de.

¹⁵Tiki lauziu gaengc bammei taanv khou rui RINGHPOUC rui ata kaw patna kamei Isaraelmei nunc khou kalat dinh khang thouc the.

¹⁶Hei zaeng rui RINGHPOUC rui samei nking o. Ai RINGHPOUC lat dinc taan khang, Isaraelmei nunc ruc khou kalat dinc taan khang nang rui ata sana bam e.

¹⁷Kumna, Amaziale, RINGHPOUC rui nang khou kumna sa the, “Nang now tei chaengdai khou mangcsangmeiluc sw puni the, khatni nang nac nunc tei buy-baengmun khou theic puni the. Nang tuang ramvdui tei siat bakna meic baihmei nunc khou nzanhlou puni the. Nang kahak ni ravmaengc kalummei kandic khou theiclou puni the. Isaraelmei nunc ta kaniw kandic khou rui nymzay tat puni the.’ ”