Read Rongmei Naga AMOS 8 Bible Online

AMOS 8 - Rongmei Naga bible

AMOS 8

¹Zaeng neih khat Kauh Liangmeipu RINGHPOUC rui akhou ndawman akhat lyanlou dat khwan e. Mi khou tingthai nggiuh akhat ai how the.

²“Amos, nang tabui how bu cho?” twna RINGHPOUC rui thanv e. “Tingthai nggiuh akhat how e,” twna ai rui daw the. RINGHPOUC rui akhou sa dat re, “Amei Isaraelmei nunc khang nkhamhmei ganv guang the. Ai alung kalaic dat lak khe, kaniw ta dandi tii puni the.

³Mi nungc kiu ravkai khou lu suan bampui mei nunc tei latluna kap puni the. Kabamv kathuic khou phouh rui padik puni the. Kaniw ta rimh rimmei khou kaliang ganclou puni the.”

⁴Mi hei nking o, lungcsi lungcroucmei ta kadymbin bammei khatni lungcthuy lakmei nunc ta swmaan khang swmeithiu.

⁵Nangniw rui kumna kakhanh e, “Aniu nap-bi zuanh khang bw thanh tingmik guay luaimei ta nkhwan liat lak khe. Puatc zuanc thau dat khang tabui nungc rui Sabbath luai nina cho? Kumh e thei aniu kamanv laa haapna laa dat khang, karyan kadath swzuanhlouna ndat dat khang, khatni duh tizuanclouna liumei nunc ta guat dat khang.

⁶Tu nuh makmei gehu kamanv kauhna zuanc dat khang pow khangc ngam lakmei, phaythuapc akhat na manv sini tii ngam lakmei lungcsi lungcroucmei ta phuna bangh khang liu dat khang tabui nungc rui Sabbath luai nina cho.”

⁷RINGHPOUC, Isaraelmei guangc sw bammeipu rui kumna latdyng sw kan the, “Kaniw tuang simei taanv guay tei ai amuc dat lak khe,

⁸Heikumna kandih ta kanukc puni the, kumna kandih khou lungc bammei meic katana ryanra puni the. Kandih kapwm kanukc puni the; hei tei Nail duiriang kumcna kamuatc puni the.

⁹Mi nungc kiu ai rui kalaanv neih ndyng khou neih tikeylou puni the khatni kandih nam ruc khou kalaanv zingc puni the. Kauh Liangmei RINGHPOUC ai rui sa the.

¹⁰Ai rui nangniw tuang khumngai tei theihkai khatni neihlamei lu guay tei latluna kapmei tiguanhlou puni the. Ai rui nangniw py tiguat nkuak duaklou puni the khatni zaengsiphey ti-nsuay puni the; kumna nangniw hei kanac mpouh akhat namei theic kanmei ta huay bammei puipu kumc puni the. Mi tingmik tei luaimei nganvna puihuay puni the.

¹¹“Ai rui mi kandic khou hei nkowmei tiguang puni the. Meic nunc tei ndaapc puni the, tiki nap ndaapcmei hamh e; kaniw tari puni the, tiki dui tarimei hamh e. Ravguangc tuang lat nkow puni the. Kauh Liangmeipu RINGHPOUC ai rui sa pat kan the.

¹²Meic nunc tei neihpat neihkey dihpy dihba ruanna RINGHPOUC lat tei kabamv kathuicna khou phu bam sini phutow pw lak khe.

¹³Mi nungc kiu kapumc gaymei chabwan chanaw nunc nganvna tarina bowkey puni the.

¹⁴‘Dan rav rui thay puni,’ twna Samariamei tuang racmaengc ta pancna latdyng sw bammei nangniw bowkey puni the, kumna thau dat ni tuang hamh the.”