Read Rongmei Naga OBADIA 1 Bible Online

OBADIA 1 - Rongmei Naga bible

OBADIA 1

¹Mi hei Kauh Liangmei RINGHPOUC rui Edommei lam khou Obadia khou sa guangmei lat re: RINGHPOUC rui katuang latdinhmei gaanv khat ta zaatc nunc khou thouc guang the. “Thau tho! Aniu Edom kandih ruc khou rihkey di kho!” twna kamei rui samei aniw chu the.

²RINGHPOUC rui Edom kandic khou sa e, “Ai rui nang ta zaatc guay pang khou rui ti-nthyamlou puni; meic guayna rui nang ta mala puni.

³Nang daihlwn swmei rui nang ta guat the. Nang tuang kaidai hei khowtauh ruc khou swmei rihpan e; nang kai hei chyng kauhmei ruc khou kauhna swlou bam e, ‘thow rui ata thaek key dat ngam punina cho?’ twna nang kakhanh e.

⁴Nang rui mouckauh kumc samc kauh bam sini khatni nang bou tei gaanchuangcna rak khou nang bou duanc bam sini ai rui nang ta zaykey lou dat puni. gaanchuangcna pang khou swlou kumc bam sini, ai rui nang ta zaykey dat puni.

⁵“Kaihouhmei rui zingbangc guangna, kaniw kahawmei na kha laa kan de. Drakhathai reimei nunc rui ni asaekc thu rei nsaekclou kan de. Kum e tiki nang ta zauczihmei nunc rui nang tuang khiukhingh guay katham nthan thiak tat kan puni the.

⁶He Esau kikta nuncle, nangniw tuang lanv guay asut tat kan the.

⁷Nangniw gin nunc rui nangniw ta guat the; kaniw rui nangniw ta nangniw kandic khou rui alay ganc the. Nangniw champanv nunc rui nangniw ta sinbin the. Nangniw lev tuzangv nchamc bammei nunc tei rui nangniw khang phah zawlou the; ‘Katuang ningtyng takh guay tei tabui thangc lou kan thena cho?’ twna kaniw rui sa the.

⁸“Ai rui Edom ta dandi tii pwkhou kiu thu, ai rui kaniw tuang ntakmei nunc ta swmutlou puni. Kumna kaniw tuang ningtyng guay giak ganclou puni.

⁹Temanmei tuang rihphyan nunc ta tipinglou puni, kumna Edom khou naimei rihmei guay ta swluai puni.

¹⁰“Nang rui nang chana, Jakob kikta nunc tuang akwamna laana swluaimei zaeng rui, nang ta swmutlou puni khatni tingsaengzaeng ti-malalou puni.

¹¹Kaniw tuang raengckat guay zauhzihmei nunc rui swra khou tei nang kapaengc dingna zauc bam e. Jerusalem tuang lanv guay phungc tatna kaniw khang nzanh kanmei gin nunc lev simei nangniw nchamh the.

¹²Juda khou bammei nang chana nunc rui sansimei khou keylou bammei khang tei nang zaenggay bam lak nimei tuang e. Kaniw ta swmutloumei ganv khou tei nang neihla bam lak nimei tuang e. Kaniw ryanramei ta tei nang nuic bam lak nimei tuang e.

¹³Amei nunc tasiat chari ariwmei ganv khou tei kaniw tuang raengckat khou tei nang gut lak ni tuang e, khatni tasiat charimei ganv khou tei nang zaenggaylou lak ni tuang e khatni kaniw tuang lanv asut lak ni tuang e.

¹⁴Nang chaengkhaek chaengkhaek khou dingna pakduak patmei nunc ta nym bammei tei sw lak nimei tuang e. Kaniw khang ryanra ryanriumei ganv khou tei nang rui kaniw ta zauczihmei nunc khang nym tii bam lak nimei tuang e.

¹⁵“RINGHPOUC ai rui zaatc guayna ta latzan sw nimei tingmik ana the. He Edomle, nang rui taanc kanmei tei nang ruc khou taanclou dat puni. Nang rui tiipat kanmei tei nang laa dat puni.

¹⁶Amei nunc tei atuang nthanmei chyngbut khou dandi tuang nkhucmei buangc zangv kan the. Kum e tiki kadaeng khou lungc nkuay bammei zaat nunc hei dandi tuang nkhuc ranvmei buangc zangv puni; kaniw hei tei zangv ngamparyna mutsut puni.

¹⁷“Kum e tiki Zaion Chyngbut khou gaanvsaekc pakduaklou puni, kumna hei tei nthanmei bamv sw puni. Jakob mei nunc rui kaniw khang tiiloumei ramv tei kaniw laa puni.

¹⁸Jakob khatni Josepmei nunc tei mai kumc puni the; kaniw rui Esaumei nunc ta mai rui ngeic raw kumc raw mutlou puni the. Esau kikta gaanv khat na ta sini nsaekclou lak khe. RINGHPOUC ai rui sa pat kan the.

¹⁹“Juda tuang dihba thangc bammei nunc rui Edom khou lungc puni; neihkeylou biak chingcphay khou lungc bammei nunc rui Philistin ta laa puni. Isaraelmei nunc rui Ephraim lev Samaria tuang ramv laa puni; Benjamin mei nunc rui Gilead ta laa puni.

²⁰Isaraelmei tuang nym tat kanmei rihmei nunc dihpy thangc rui hancguang datna Phoenikia ramv dihpy thangc Zarephat nganv laa puni. Jerusalem khou rui nym tat kanmei Sardis khou bammei nunc rui Juda tuang dihba khou naimei kaidai guay ta laa puni.

²¹Jerusalemmei suc-rih ngammei nunc rui Edom ta adow puni kumna mi ti hei sin puni. Kumna RINGHPOUC kamei kahak rui Guangh sw puni.”