Read Rongmei Naga JONA 1 Bible Online

JONA 1 - Rongmei Naga bible

JONA 1

¹Zaeng neih khat Amittai nac mpouh Jona khou RINGHPOUC rui sa guang e,

²“Katumcna Nineve kaidai daihmei thangc tei tatna kaniw tuang khuay lam khou dinc tho, kalam thu kaniw tuang simei guay tei ai how the.”

³Tiki Jona tei RINGHPOUC khou rui Tarsis thangc pak tat kan the. Kamei Joppa khou key pwkhou Tarsis tat khang tat thau nina bammei rungh akhat ariw the. Runghthaengv tiilou lana, RINGHPOUC khou rui Tarsis thangc pakley tat khang, Tarsis tat nimei nunc tei lev rungh khou tei gutna tat thau the.

⁴RINGHPOUC rui pwanzinghdai duipui khou tei tiguang the, pwanzingh tei heidikamv ranv tina rungh tei bak ngam kan ni kumc the.

⁵Runghchaumei nunc tei ping the kumna kaniw kathuicna nkhavlou khang karav karav khou kauc thau the. Rungh tei ti-nthaan khang, rungh puat guay tei kalat ganc the. Kum bammei ganv khou tei Jona tei kabangc thangc key lana mi khou tei ziptheic mangh mangna zip bam khwan the.

⁶Runghpypu rui khou tei kata ariwna kakhou sa the, “Nang tabui swna zip bam tu cho? Thauna nkhavlou khang nang tuang rav khou huayney tho. Kum e thei kamei rui aniu ta nzianlouna aniu panty kanlou nuh e.”

⁷“Mi ryanramei hei thow zaeng rui guang bam tu cho san zauc di kho,” twna runghchaumei nunc tei kaphianh the. Kaniw san zauc ki Jona khou keylou the.

⁸Kaniw rui kakhou sa the, “ntaw sa tho, mi hei thow zaeng rui pat bam tu cho? Nang tabui taanv taanhmei cho? Nang tabui kandic thangc rui guang tu cho? Nang tabui zaat cho?”

⁹Jona rui daw the, “Ai Ibrimei e, tingkauh Ravguangc duipui khatni ramvkiang damhmeipu RINGHPOUC ta kalummeipu e.”

¹⁰Jona kamei RINGHPOUC khou rui pakley tatmei tuang the twmei kaniw khou raclou the. Runghchaumei nunc tei ping the kumna, “Nang rui sw bammei hei meic pingmei taanv di the!” twna kakhou sa the.

¹¹Pwanzingh tei ranv hay hay thau the, kum tina kaniw rui kakhou thanv the, “Pwanzingh ti-nthaekc khang nang ta tabui sw khona cho?”

¹²Jona rui daw the, “Ata duipui khou phaic keylou ti tho, kum ti thei rim key kan ni the. Nangniw mi pwanzingcdai akhaengv bammei hei azaeng rui dyng the.”

¹³Kum bam sini runghchaumei nunc tei rungh tei duipaengc thangc chaupat khang ngammei kamv karamc the. Tiki kaniw ngam mak khe, kalam thu pwanzingh tei ranv hay hay thau the.

¹⁴Kaniw RINGHPOUC khou kumna kauc the, “He RINGHPOUC, mipu tuang panty swmaanmei khang rui aniw ta titheiclou rio. Mipu theihmei nwan aniw khou tikeylou rio, kalam thu, he RINGHPOUC, mihei nang rui nuhmei theilayna taanhmei tuang di the.”

¹⁵Khoutei kaniw rui Jona ta puanc thauna duipui khou tei phaic key kan the. Pwanzingh tei kadingna khou rim key kan the.

¹⁶Khoutei kaniw tei RINGHPOUC ta ping the, kumna RINGHPOUC khang khaenglou the khatni kasiamruai sw ni the twna lungdyng dinglou the.

¹⁷RINGHPOUC rui chamdaanvloumei khav daihmei rui Jona ta aluakc kan the. Kamei khav bung lungc khou kalaanv kathumh zingbangc kathumh bam kan the.