Read Rongmei Naga JONA 3 Bible Online

JONA 3 - Rongmei Naga bible

JONA 3

¹RINGHPOUC rui luan neimei swna Jona khou sa dat re,

²“Nineve kaidai daihmei thangc tei tatna ai rui nang khou salou kanmei lat tei meic nunc khou tei sa tho.”

³Jona RINGHPOUC lat piuna Nineve thangc tat the. Nineve tei daic nganvmei kaidai e. Kumna hei tei tat kaan khang zaeng neih thumh gut puni.

⁴Jona mi kaidai khou tei zaeng neih khat chaengkaamv tat gutna kumna sa the, “Zaeng 40 khou Nineve hei swmaan puni the!”

⁵Ninevemei nunc tei Ravguangc lat tei lwm the. Kumna meic kathuicna daic liangmei khou rui nthyam liangmei nganv zaengsiphey piuna munthiangcna huayney nina the twna kauc ndauhlou the.

⁶Ninevemei guangc rui mi chamv tei chu lana, kaguangc bamvpaeng khou rui tat keyna katuang guangc pheybaan luak gancna, zaengsiphey piuna mbut ding khou dungc the.

⁷Kamei rui Ninevemei nunc khang kumna latdanv tiipat the, “Mi hei guangh khatni katuang meicdaihmei nunc khou rui patmei latdanv the: meic gaanv khat na sini khouringh khatna rui sini ramh tulak nina e.

⁸Maansei khatni khouringh khounah katana zaengsiphey piu nina e. Meic katana lunghgutna Ravguangc khou huayney nina e khatni katuang katuang simei kheiliak khatni simei taanv guay ganc nina e.

⁹Ravguangc kalunglaicna, kalungpuam kim keyna aniu ta swluailou mak pwng e!”

¹⁰Kaniw sw bammei tei Ravguangc how the; kaniw tuang gay makmei kheiliak tei kaniw ganc kan the twmei Ravguangc how lana kalung kalaic the. Kamei rui kaniw ta dandi tii ni twna samei tei tii dat mak khe.