Read Rongmei Naga SINGCHAKH 11 Bible Online

SINGCHAKH 11 - Rongmei Naga bible

SINGCHAKH 11

¹Meic nunc tei kaniw khou ryanramei guangmei hei RINGHPOUC tuang e twmei chu pwkhou RINGHPOUC ta nutna sa the. Hei tei RINGHPOUC rui chu pwkhou lunghpuamc the kumna kaniw ruc khou mai tiikey the. Hei tei kaniw rak khou chuangc the kumna zypui katin akhat raw the.

²Nkhavlou khang meic nunc tei rui Mousi khou kauc thau the; kamei rui Ravguangc khou huayneylou pwkhou, mai tei amit key kan the.

³Kumna mi bamv zanc tei Tabera twna phuaklou the, kalam thu hei khou tei RINGHPOUC tuang mai kaniw rak khou raw the.

⁴Isaraelmei nunc thei lay tat bammei zaatc baihmei asaekc rui taektw khang lat sw thau the. Isaraelmei nunc nganvna “Zanh katit na sini tu khang nai e thei gay ni ki twna lat sw thau khwan the!

⁵Izip khou thu katy-kamanv key maekna khav hei tu nii saanv tu de. Ngeicnathai, duangkhathai, maruai, chalouc, gannamv heidi mphamh bammei tei ningtow e!

⁶Ntaw thu aniu pumtan hei suan key the. Tu khang ramhkhat na sini maek khe— tingmik pum mi manna na hei tu kaluaih phik bammei hei hamhna baihmei maek khe!”

⁷Manna hei mphuan nzinh zinna ramhthw launa kumc e.

⁸Meic nunc rui tat nkuayna khuaic the, hei tei kamut sowpat lana lai khou suangc the hamh e thei ntyan paek kasiamh the. Hei tei Olive thauc louna kasiamh loumei mahauc nai e.

⁹Hei tei zypui bamv khou zingbangc chaeng zik thei laykey raph rap khwan e.

¹⁰Kaniw tuang pheykai guay kaimun khou meic kakang kakang dinglouna khuay sw bammei tei Mousi chu the. Kamei kalung ryanra the kalam thu RINGHPOUC rui kaniw ta lunghpuamc the.

¹¹Kumna Mousi rui RINGHPOUC khou sa the, “Tabui swna mi kumhmei ramrianra hei akhou tiguanglou bam tu cho? Tabui swna mi nunc ti hei chaengzay nimei thouc guay hei akhou tiilou bam tu cho?

¹²Mi nunc ti hei ai rui damcloumei tuang ni hamh e, ai rui puancloumei tuang ni hamh e! Tabui swna ai hei nahpui kumcna kaniw ta angana ta kumcna abaanc khou puanc lana kaniw pupouc khou nrianhloumei kandic nduangh tangclou khang akhou tiilou bam tu cho?

¹³Mi nunc khang hei tii biuc tabui thangc rui ai khav-zanh laa nina cho? Kaniw khuay swna zanh ney bam e.

¹⁴Ai arana mi nunc tuang rith hei phungc ngam mak khe; akhang nrit langv khe.

¹⁵Nang rui ata heikumna piu bam ni de tw e thei thu, nang tuang nzianthay makmei taanv tei akhaengv bam dat mak khang ata zauc nzianlouna swluailou pu tho.”

¹⁶RINGHPOUC rui Mousi khou sa the, “Meic nunc rui kaniw tuang kapy nunc the twna laamei chakhwang sw nuhmei 70 khuam tho, kumna kaniw ta atuang pheykai khou tei adaeng khou nduangh guangna nang daeng khou ding bam khang kaniw khou sa ti tho.

¹⁷Ai khoutei keyna nang ta kachuc puni the, kumna ai rui nang khou tiilou kanmei bumaengc asaekc tei nang khou rui laana kaniw khou tii puni the. Kumna kaniw rui mi nunc tuang rith tei nang ta phungc nkhav puni the, kumna hei tei nang rana phungc dat ni tuang hamh the.

¹⁸Ntaw thu meic nunc khou tei kumna sa tho, ‘Nthuanh khang nangniw pumh nthan tho; nthuanh nangniw zanh tu khang nai puni the. Nangniw khuay swna zanh ney bammei tei khatni nangniw khang Izip rui gay de twna sa bammei tei RINGHPOUC chu the. Ntaw thu RINGHPOUC rui nangniw khang zanh tii puni the, kumna hei tei nangniw tu puni the.

¹⁹Nangniw rui hei tei zaeng neih khat, neih nei, zaeng panguh, ruh, zaeng 20 na tuna taan ni tuang hamh the,

²⁰tiki bw akhat, nangniw ruak tu tangh mak saanv, nangniw tu chany mak saanv tu puni the. Nangniw khou bammei RINGHPOUC kata ganc patna nangniw Izip khou rui tatpat lak nimei tuang e twna sa bammei zaeng rui mi hei tiguangmei tuang the.’ ”

²¹Mousi rui RINGHPOUC khou sa the, “Khou hei ai meic 600,000 ta nduangh tat bam e, kumna mi nunc khang bw khat tu biuh khang zanh akumhna tii nina cho?

²²Kaniw ta titu pian biuc khouringh dowluai diwna cho? Duipui khou naimei khav guay hei rui biuc puni dina cho?”

²³RINGHPOUC rui daw the, “Akhang ngam lakmei tuang naina cho? Ai rui samei hei guang tangc ny guang tangh mak ny nangniw nthuanh thay puni the!”

²⁴Kumna Mousi rui tatpat lana RINGHPOUC rui samei tei kaniw khou dinclou the. Kamei rui kapy swmei gaanv 70 khuam kaduaina kaniw ta kalummei pheykai daeng khou tiding haengvlou the.

²⁵Khoutei RINGHPOUC muangh khou keyna kata kachuc the. Kamei rui Mousi khou tiilou kanmei bumaengc tei asaekc laana kapy swmei gaanv 70 khou tei tiilou the. Bumaengh tei kaniw khou guanglou pwkhou kaniw tei muhzwng nunc kumcna ravmun dinc thau the, kum e tiki kaniw tei sw dat kaluaih mak ge.

²⁶Kapy pang khou tei Eldad lev Medad thu kalummei pheykai thangc tei pat makna zypui bamv khou bam khwan e. Mi zypui khou bumaengh tei kaney khou ni guanglouna kaney ni muhzwng kumcna ravmun dinc thau the.

²⁷Eldad lev Medad rui sw bammei tei salou khang chabwan gaanv khat Mousi daeng khou pak guang the.

²⁸Khoutei Nun nac mpouh, alauc khou rui Mousi baanhou sw guangmeipu Joshua rui Mousi khou sa the, “Kaipoucle, kaney ta khaamv keylou tho!”

²⁹Mousi rui daw the, “Athouc khou tei nang lunggeih bam tu cho? RINGHPOUC rui katuang bumaengc meic kathuicna khou tiilouna kaniw guayna ta muhzwng kumcna tikauclou pw e thei gay nii e twna ai ning e!”

³⁰Mi tangv tei Mousi tei kapy swmei 70 tei lev twna zypui bamv thangc tei guang dat the.

³¹Thay mak daekna RINGHPOUC rui mpwan tipatna duipui thangc rui akhuaihna pang phungc guang the, hei tei sianphai kamv kamv na khou samc guang the. Hei tei zypui bamv khou khatni mi daeng nkuaymei zaeng neih khat chaengkaamv lungc khou keytow padiklou the.

³²Kumna zingbangc kalaanv akhuaihna tei nym the; meic kathuicna kilogram 1000 khou rui key makna khuamlou the. sw kangh khang kaniw tuang zypuikai daeng guay tei phauc padik the.

³³Kaniw zanh tei tu khang nai geicna bammei ganv khou tei, RINGHPOUC rui meic nunc ruc khou tei lunghpuamc the kumna kaniw khou tei meic ryam tiguang the.

³⁴Mi bamv zanc tei Kibroth-hattaava “Agaamvmei Taroubamv” twna kaw the, kalam thu zanh agaamvmei nunc ta tei mi bamv khou tei phuplou the.

³⁵Mi bamv khou tei rui Hazerot khou guang the, kumna hei khou tei zypui sw the.