Read Rongmei Naga SINGCHAKH 12 Bible Online

SINGCHAKH 12 - Rongmei Naga bible

SINGCHAKH 12

¹Mousi tei Kusmeipui ta kaw e, kum tina Miriam lev Aron rui Mousi ta sa kasicna sa the.

²Kaney rui sa the, “Mousi khouna RINGHPOUC rui kachuc tu dina cho? Aney khou ni kachuc tu hamhna cho?” Kaney rui sa bammei ta RINGHPOUC rui chu the.

³(Mousi tei niamhmeipu e, kandih khou lungcpatmei kapwmna pang khou niamh liangmeipu e.)

⁴Thaymakdaek khou RINGHPOUC rui Mousi, Aron khatni Miriam khou sa the, “Nangniw gaanv thumh atuang kalummei pheykai khou tei patmei ta kahaw e.” Kaniw khou tei pat the,

⁵kumna RINGHPOUC muangh tiangc khou keyna kalummei pheykai kaimun khou tei dingna, “Aron! Miriam!” twna kauc the. Kaney tei tatgut the.

⁶Khoutei RINGHPOUC rui sa the, “Ai rui ntaw sa nimei hei nking o! Nangniw khou muhzwng nunc nai bammei douc tei kaniw khou ndawman khou lyanlou e khatni mang khou kachuclou e.

⁷Abangc Mousi thu heikum rap mak ge kamei thu atuang kaikhunc ta zauclou khang lwmnuhmei de.

⁸Kumna ai rui kata zaw lev zaw puanc adyangna latgyam hamhna nthanna saloumei tuang the; kamei RINGHPOUC lwnlung nganvna how kan the. Akumhna abangc Mousi ruc khou nangney sa bam baucna cho?”

⁹RINGHPOUC rui kaney ta lunghpuamc the; kumna kamei tatpat kan the,

¹⁰Muangh tei kalummei pheykai tei mpatlou kan pwkhou, Miriam gic tei meicpingmei phaanziu kadyngna khou kapumc pwm lik sik the kumna hei tei gunh kumcna mphwan phwmh phwm the. Mipui tei mi ravpuat tei pat bammei ta how lana,

¹¹Aron rui Mousi khou sa the, “Kaipoucle, aney tuang mpangmei paap zaeng rui mi dandi hei aney ruc khou tikeylou rio.

¹²Katei kapaek akhat tu ngamna theicna puanc patloumei ngasatna kumc kata tiswlou rio.”

¹³Kumna Mousi rui RINGHPOUC khou kauc thau the, “He Ravguangc, kata tigaylou o!”

¹⁴RINGHPOUC rui daw the, “Kapu rui kazaw khou teih nsuklou e thei, kamei mi tuang zakmei tei zaeng chanei phungc nimei tuang e. Kumna kata zypui paengc thangc zaeng chanei bangclou o, mi tangv tei kata laaguang dat nuh e.”

¹⁵Miriam ta zypui paengc thangc zaeng chanei bangclou the, kumna kata nduangh guang dat mak saanv meic nunc tei tat thau dat mak khe.

¹⁶Mi tangv tei kaniw Hazerot mpatlouna Paran tuang tazikramv khou zypui bamv sw the.