Read Rongmei Naga SINGCHAKH 13 Bible Online

SINGCHAKH 13 - Rongmei Naga bible

SINGCHAKH 13

¹RINGHPOUC rui Mousi khou sa the,

²Isaraelmei kaikhwang kathuic khou rui kapy swmei gaanv khat gaanv khat kadah patna ai rui nangniw khang tiiloumei Kanaan kandic gwanrum khang thouclou tho.

³Kumna Mousi rui RINGHPOUC tuang latdanv piuna Paran tuang tazikramv khou rui Isaraelmei kaikhwang tuang kapy swmei nunc ta thouc the.

⁴Mi hei kaniw tuang zanc guay the; Reuben tuang kaikhwang khou rui Zakur nac mpouh Shammua;

⁵Simeon kaikhwang khou rui Hori nac mpouh Shaphat;

⁶Juda kaikhwang khou rui Jephunne nac mpouh Kaleb;

⁷Isakar kaikhwang khou rui Josep nac mpouh Igal;

⁸Ephraim kaikhwang khou rui Nun nac mpouh Hosea;

⁹Benjamin kaikhwang khou rui Raphu nac mpouh Palti;

¹⁰Zebulun kaikhwang khou rui Sodi nac mpouh Gaddiel;

¹¹Manase kaikhwang khou rui Susi nac mpouh Gaddi;

¹²Dan kaikhwang khou rui Gemalli nac mpouh Ammiel;

¹³Aser kaikhwang khou rui Mikael nac mpouh Sethur;

¹⁴Naphtali kaikhwang khou rui Nahbi nac mpouh Vopsi;

¹⁵Gad kaikhwang khou rui Maki nac mpouh Geuel, hei guay hei the.

¹⁶Kanaan kandic gwanrum khang Mousi rui thoucloumei nunc kiu mi nunc hei the. Mousi rui Nun nac mpouh Hosea zanc Joshua twna kaw kalaiclou the.

¹⁷Mousi rui kaniw ta thouc patmei ganv khou tei kumna kadylou the, “Mi khou rui dihba biak tat lana mi khou tei rui chyngramv thangc tat dat tho.

¹⁸Mi kandic tei akumh bu cho, meic azuh dou lungc bam bu cho khatni kaniw tei adih tanc bu cho twna zauc tho.

¹⁹Kakandic tei gay ny si ny khatni meic nunc tei kaniw tuang kaidai guay raengh raenglouna bam tu ny hamh e thei raengh maekna bam tu ny twmei guay hei zauc o.

²⁰Kakandih tei phunling gay nimei dic ny khatni ngouh tazingh nai ny zauc o. Bauc o, khatni mi kandic khou nthai bammei thai asaekc suai makna phungc guang nina e.” (Hei tei drakha thai minc kahouhmei ganv the.)

²¹Kaniw rui dihpy biak nganvna Zin tuang tazikramv khou rui thauna dihpy thangc Lebo Hamat chaeng daeng khou Rehob nganvna zauc ngangh the.

²²Kaniw rui dihba ramv nganghna Anakimmei kikta Ahimanmei, Sheshaimei khatni Talmaimei lungc bammei bamv khou gut the.( Hebron kaidai hei Izip tuang kaidai Zoan suangc tingkwm chanei kasiamh thaurey khwan the. )

²³Kaniw Eskol nzaengc khou guang the kumna hei khou tei drakha chuam akhat dow the. Mi drakha chuam tei heidikamv nritna kaluang phianlouna meic gaanv nei rui puanc the. Kaniw rui puc-heithai khatni tadutthai asaekc ni phungc guang khwan e.

²⁴(Mi bamv zanc tei Eskol nzaengc twna kaw e, kalam thu mi bamv khou tei rui Isaraelmei drakhathai chuam akhat dowmei tuang the.)

²⁵Zaeng 40 mi ramv gwan tei zauc tangmei tangv gwanrummei nunc tei hanc guang dat the.

²⁶Paran tuang tazikramv khou Kades twna kawmei bamv khou Mousi, Aron khatni Isaraelmei nunc bamv khou kaniw rui howmei guay tei raclou the khatni kaniw rui phungc guangmei tingthai guay tei lyanlou the.

²⁷Kaniw rui Mousi khou sa the, “Aniw rui mi ramv gwan tei zauc the mi ramv tei guaihnoudui lev nkhuaihdui luanghmei riath di the; kumna mi bamv tuang tingthai kiu mi hei the.

²⁸Tiki mi bamv khou lungc bammei nunc tei tanc e, kaniw tuang kaidai guay hei daic e khatni raengh tei ntipna raenglou e. Kungc ranvmei thu, khoutei liantuangh kikta nunc bam e.

²⁹Mi kandic tuang kabangc naek thangc Amalekmei bam e; Hittimei, Jebusimei, khatni Amormei chyngramv khou lungc bam e; Kanaanmei nunc rui Mediterranean daeng khou lungc bam e.”

³⁰Mousi hu khou Kaleb rui meic nunc ta sa rimh rimlouna kumna sa the, “Ntaw thu aniu rui adow gutna mi kandic tei laa nina the; aniu ngam diw e.”

³¹Kum e tiki Kaleb lev tat nchamcmei nunc tei rui sa the, “Kaniw ta adow khang aniu tik maek ge; mi khou bammei nunc tei aniu khang suangc tanc de.”

³²Kumna kaniw rui kaniw zauc tatmei kandic lam khou saraamhmei lat Isaraelmei nunc khou tei racliklou the. Kaniw rui sa the, “Mi kandic khou lungc bammei nunc tei kaniw bungbiuc khang na sini taanc pat mak ge. Aniw howmei kathuicna tei saengcdaic the,

³³kumna hei khou tei liantuangh Anak kikta bam e. Aniu hei nkav-nkitna kumcna ninglou the, hei zaeng rui hei tei kumcna aniu kaniw ta zauc nina di the.”