Read Rongmei Naga SINGCHAKH 16 Bible Online

SINGCHAKH 16 - Rongmei Naga bible

SINGCHAKH 16

¹Levimei Kohat puinac mei Izhar nac mpouh Kora khatni Reuben kaikhwangmei Eliab nac mpouh Dothan lev Abiram khatni Pelet nac mpouh On kaniw gaanv thumh rui

²Isaraelmei pang khou rui kazanc tatmei kapy swmei 250 lev twna Mousi ta athwng the.

³Kaniw Mousi khatni Aron hu khou guangna sa the, “Nang hei gut duc langv the. Isaraelmei guay hei RINGHPOUC tuang de, kumna RINGHPOUC aniu guayna pang khou bam de. Mousile, nang tabui swna RINGHPOUC tuang mei nunc ruc khou bam tu cho?”

⁴Mousi rui mi hei chu pwkhou kandih khou pun khum khuak keyna huayney the.

⁵Mi tangv tei kamei rui Kora khatni kathei laymei nunc khou sa the, “Thow tei RINGHPOUC katuang cho twmei nthuanh kiu kamei rui lyanlou puni the. Kamei rui kadahloupui mei ta tei ravchapaeng khou tei kadaeng khou tiguang puni.

⁶Kora nang khatni nang mei nunc lev mai nteipui kuak laa tho.

⁷Nthuanh lauthwan nang mei nunc lev maikuak khou tei maithyn haenghmei louna khatni agaw lou lana hei tei ravchapaeng khou tei laaguang tho. Kum pwkhou RINGHPOUC rui kadahpui mei tei Ravguangc mei the. Gut duc langvmei kiu Levimei nangniw hei the.”

⁸Mousi rui Kora khou sa dat re, “Nking o, Levimei nuncle!

⁹Nangniw RINGHPOUC daeng khou guangna RINGHPOUC tuang kalummei pheykai khou siamruai sw khang khatni kandihmei siamruai sw khang nangniw ta kamei rui Isaraelmei pang khou rui reicpatloumei hei katit na mei tuang de twna nangniw ningna cho?

¹⁰Kamei rui mi hei nang khang khatni Levimei guay khang tiiloumei champouhmei e— kum ki ntaw nang amuh ni sw nii the!

¹¹Nang rui Aron ruc khou sa bammei hei nang khatni nang thei laymei nunc rui RINGHPOUC ta liamna sw bammei tuang e.”

¹²Khoutei Dathan khatni Abiram Eliab nac mpouh nei ta kaw khang Mousi rui thouclou the, kum e tiki kaney rui sa the, “Aney guang lak ge.

¹³Aney ta mi tazikramv khou swluailou khang kandih gaymei Izip khou rui aniw ta nduanghpatmei rui nang khang biuh mak he twna cho? Nang rui aniw tuang kaipouc ni sw ni he twna cho?

¹⁴Nang rui aniw ta kandih gaymei kandic khou phungc guanglou nina hamh the, aniw khang laupuk khatni drakhalau tiilou nina hamh the; nang aniw ta guat bammei tuang di the. Aney guang mak ge!”

¹⁵Khoutei Mousi kalungpuamcna RINGHPOUC khou sa the, “Mi nunc hei rui phungc guangmei puatkat akhat na sini laalou riu. Ai rui kaniw gaanv khat na khou sini nkhuailoumei tuang maek ge; ai rui kaniw tuang kuanniam akhat na sini laaloumei tuang maek ge.”

¹⁶Mousi rui Kora khou sa the, “Nthuanh kiu nang lev nang thei laymei nunc RINGHPOUC mav khou guang nina e; hei khou tei Aron ni bam puni.

¹⁷Nangniw ni, Aron ni katuang katuang maikuak khou agaw louna hei tei ravchapaeng khou katlou nina e.”

¹⁸Kumna kaniw meic kathuicna katuang katuang maikuak khou agaw louna Mousi khatni Aron lev twna kalummei pheykai kaimun khou tei guang ding the.

¹⁹Khoutei Kora rui meic nunc ta tei khuam kaduaina kalummei pheykai kaimun khou tei Mousi lev Aron biak thangc kaniw zaw puanc achow louna ding the. Thaymak daek khou RINGHPOUC tuang karangmei riw tei meic nunc hu khou tei gaanc pat the,

²⁰kumna RINGHPOUC rui Aron khatni Mousi khou sa the,

²¹“Mi nunc khou rui tatpat kan o, ai rui kaniw ta swkamut kamailou puni the.”

²²Kum e tiki Mousi khatni Aron rui kaney zaw kandih khou sow nkhum keyna sa the, “He Ravguangc, ringhmei hei nang khou rui patmei tuang de. Meic gaanv khat rui paapc taanc pwkhou, nang rui meic kaguayna ta lunghpuamh nina cho?”

²³RINGHPOUC rui Mousi khou sa the,

²⁴“Kora, Dathan khatni Abiram tuang pheykai khou rui meic nunc ta tei karei la tho twna sa ti tho.”

²⁵Khoutei Mousi rui Isaraelmei kapy nunc ta nduanghna Dathan khatni Abiram bamv thangc tat the.

²⁶Kamei rui meic nunc khou tei sa the, “Mi meicsimei nunc tuang pheykai khou rui ducna tatpat tho. Kaniw tuang ramh akhat na sini kahaw nuh mak ge. Kum e thei kaniw tuang paap zaeng rui nangniw ta swmaan kazauh puni.”

²⁷Kumna kaniw Kora, Dathan khatni Abiram kai khou rui karei pat the. Dathan lev Abiram tei pat lana kaniw now nac nunc lev twna kaniw tuang pheykai kaimun khou ding bam the.

²⁸Mousi rui meic nunc khou sa the, “Mi guay tei taanc diu khang RINGHPOUC rui ata thoucloumei tuang e, hei tei achwnphuakh khou rui taanc bam tuang hamh e twmei nangniw thay puni the.

²⁹Mi nunc hei RINGHPOUC tuang dandi hamhna kalwnlung ramthei theic e thei thu RINGHPOUC rui ata thoucloumei tuang hamh tina the.

³⁰Kum e tiki RINGHPOUC rui meic chu zat thay zat makmei tuang ramh akhat taanclouna, kandih nkakc patna kaniw ta khatni kaniw tuang kaguayna ta nringh taruaih thangc tikey kan e thei, mi nunc hei rui RINGHPOUC ta thouh sw makna sw tina the twmei nangniw thay puni the.”

³¹Mousi rui sa tang rap twpui lev Dathan khatni Abiram bammei bamv tei nkakc pat the.

³²Kumna kaney ta tei kaney kai kaikhwangmei guay lev kazauhna aluakc kan the. Kora thei laymei guay ta ni kaniw tuang puat lev kazauhna aluakc kan the.

³³Kumna kaniw tei nringh kaniw tuang puat guay lev twna taruaih key kan the. Kaniw ta kandih rui gumbinna kaniw tei meic pang khou rui amaan kan the.

³⁴Kaniw rui kauhmei khwan tei chu pwkhou khou tei bammei Isaraelmei guay tei “Pak la tho! Aniu ta ni kandih rui aluakc puni the!” twna kaucna pak kan the.

³⁵Khoutei RINGHPOUC rui mai tikeyna agaw kat bammei meic 250 ta ni raw kan the.

³⁶Khoutei RINGHPOUC rui Mousi khou sa the,

³⁷“Mai ntei kanmei nunc tuang maikuak guay tei mi khou tei naimei mai guay tei ramh bamv akhat thangc duc maihna bow ganc lana laa o twna Aron nac mpouh amuh Eleazer khou sa ti tho. Kalam thu maikuak guay tei thu nthanmei de.

³⁸Mi guay tei ravchapaeng khou katlou khou tei rui nthanmei di the. Kumhpui zaeng rui kaniw tuang paap zaeng rui swluai kanmei nunc tuang maikuak guay tei laana, mi guay tei ntanh paek mpumei khang dy patlou lana ravchapaeng gwm khang kasiamh o. Mi hei Isaraelmei ramh thay kan khang e.”

³⁹Kumna Eleazer rui maikuak guay tei laana ravchapaeng gwm khang dy pat the.

⁴⁰Aron kikta hamhna meic baihmei RINGHPOUC khang agaw ntei khang ravchapaeng daeng khou guang nuh mak ge twmei thay kan khang mi hei swloumei tuang the. Kum mak ge thei kamei rui kaniw ta ni Kora lev kamei nunc ta swmaanmei kumc swmaanlou puni. RINGHPOUC rui Eleazer khang Mousi khou tii guangmei theilayna mi guay hei taanc the.

⁴¹Nthuanh thauna Isaraelmei guay rui Mousi khatni Aron ruc khou “Nangney rui RINGHPOUC tuang mei nunc ta swluai kan the,” twna sa thau the.

⁴²Kumna Mousi lev Aron ruc khou lat sa khang guang kariuna bam pwkhou zauclo kaniw pheykai biak thangc zauc pat pwki pheykai tei muangh rui gumbin bammei khatni RINGHPOUC tuang riw mi khou tei gaanc bammei ta kaniw how the.

⁴³Mousi khatni Aron kalummei pheykai kaimun khou tei guang ding the,

⁴⁴khoutei RINGHPOUC rui Mousi khou sa the,

⁴⁵“Mi nunc khou rui tatpat kan o. Ai rui kaniw ta mi bamv khou hei sw mutsutlou puni the!” Kaney gaanv nei kandih khou bow nkhum khuak keyna,

⁴⁶Mousi rui Aron khou sa the, “Maikuak laana ravchapaeng tuang maithyn haenghmei mi khou tei louna agaw ruailou tho. Katumcna meic nunc ta tei sw nthanmei tuang thouc tei taanclou tho! RINGHPOUC tuang lungpuam mpat pat kan the kumna ravpyan tei guang pu the.”

⁴⁷Aron rui maikuak tei katumcna laa lana meic pang khou tei pak gut kan the. Ravpyan tei kahouh the twmei kamei how lana mai khou tei agaw ntupclouna meic nunc ta tei sw nthanmei tuang thouc tei swlou the.

⁴⁸Hei tei rui ravpyan ta tei khaamlou the, kumna kamei theihmei ringhmei kak khou dingna bam the.

⁴⁹Kora rui latliam khou theic kanmei nunc tei chak makna ntaw theic kanmei hei meic 14,700 tangc the.

⁵⁰Ravpyan tei nthaekc kan pwkhou Aron rui kalummei pheykai kaimav khou Mousi daeng khou guang dat the.