Read Rongmei Naga SINGCHAKH 17 Bible Online

SINGCHAKH 17 - Rongmei Naga bible

SINGCHAKH 17

¹RINGHPOUC rui Mousi khou sa the,

²“Isaraelmei kaikhwang kathuic tuang kapy swmei kathuic khou rui builwang akhat akhat laaguangna builwang 12 laaguang o twna Isaraelmei khou sa o. Mi builwang guay khou tei kaniw zanc hylou raph rap nina e.

³Levimei kai kaikhwang tuang builwang khou tei Aron zanc hylou nina e. Kapy swmei kathuic khang tei builwang akhat akhat nai nina e.

⁴Mi guay tei atuang kalummei pheykai thangc tei phungc guangna ai rui nang ta ariwpui bamv Latdyng Khuk hu khou tei lou nina e.

⁵Kum pwkhou ai rui kadahloumeipu tuang builwang tei thu kabwan thau puni. Isaraelmei rui nang ruc khou pian makna sana bammei hei ti-nthaekclou puni.”

⁶Kumna hei tei Mousi rui Isaraelmei khou salou the. Kaikhwang kathuic tuang kapy swmei kathuic rui builwang akhat akhat laaguangna Mousi khou builwang 12 nsinlou the. Mi pang khou tei Aron tuang builwang ni lou the.

⁷Mousi rui builwang guay tei kalummei pheykai khou RINGHPOUC tuang Latdyng Khuk hu khou guanglou the.

⁸Nthuanh thauna Mousi rui kalummei pheykai khou tei guang pwki Levimei kaikhwang tuang swna loumei Aron tuang builwang tei kabwan thau bam khwan the. Hei tei kazik kasatcna, kapwang puangcna almon thai minc pat the.

⁹Mousi rui builwang guay tei laa lana Isaraelmei guay khou lyanlou the. Hei tei kaniw guay rui how the, kumna meic kathuicna katuang katuang builwang laa dat kan the.

¹⁰RINGHPOUC rui Mousi khou sa the, “Aron tuang builwang tei Latdyng Khuk hu khou tei guanglou dat tho. Meicliammei Isaraelmei nunc hei rui kaniw tuang pian makmei lat hei nthaekc makna sa bam e thei kaniw theic puni twmei thay kan khang mi hei khou tei lou bam nina e.”

¹¹RINGHPOUC tuang latdanv theilayna Mousi rui taanc the.

¹²Isaraelmei rui Mousi khou sa the, “Kum e thei aniw hei luai the cho!

¹³Aniw pheykai daeng khou guang guangmei thu theic rap khang di the cho! Aniw thu theic ngam puni cho?”