Read Rongmei Naga SINGCHAKH 18 Bible Online

SINGCHAKH 18 - Rongmei Naga bible

SINGCHAKH 18

¹RINGHPOUC rui Aron khou sa the, “Atuang kalummei pheykai khou taanc nkhuailoumei kaguayna tuang khuay tei nang, nang nac mpouh nunc khatni Levimei guay rui phungc nina e, tiki amuh tuang thouh swmei khou nkhuailoumei khuay guay tei thu nang khatni nang nac mpouh nunc na rui phungc nina e.

²Nang khatni nang nac mpouh nunc rui kalummei pheykai khou taanvtaanhmei ganv khou nangniw ta nkhavlou khang nangniw puinacmei Levimei ta nduangh guang nina e.

³Kaniw tei nang ta nkhav nimei tuang thouc guay tei khatni kalummei pheykai khou kaniw rui taanc nimei tuang thouc naimei kaguayna tei taanc nthuih nina e, kum e tiki Nthanmei bamv khou naimei nthanmei puat guay khatni ravchapaeng tei thu kaniw kahi nuh mak ge. Kaniw rui hei tei kahilou e thei nangniw ni kaniw ni theic puni.

⁴Kaniw rui nang ta nkhavna kaniw rui kalummei pheykai khou taanc nimei thouc kaguay tei nthuihna taanc nina e, kum e tiki meic baihmei kapaengc thangc mei gaanv khat na sini nang daeng khou lay gut nuh mak ge.

⁵Isaraelmei guay ruc khou alungpuam keylou dat mak khang Nthanmei bamv khatni ravchapaeng khou taanc nimei thouc guay tei nang khatni nang nac mpouh nunc na rui taanc nina e.

⁶Zauc lo, nangniw chana punav swmei Levimei nunc ta kalummei pheykai khou siamruai taanv khang Isaraelmei pang khou rui ai rui kadahpatlou the. Kaniw hei RINGHPOUC khang katlou kanmei nangniw khang kaipat di the.

⁷Mi guay tei nangniw tuang thouc the, kalam thu nangniw hei amuh sw diu khang ai rui kaipat swna tiiloumei tuang the. Thow pwni biuh makna nthanmei puat guay daeng khou guangpui mei ta tei swluai puni.”

⁸RINGHPOUC rui Aron khou sa the, “Rawna khaeng makmei langv, Isaraelmei guay rui akhang nkunmei puatkat swna tiimei guay tei ai rui nang dam khang tiiloumei tuang the. Hei tei tingsaengzaeng nang khatni nang kikta guay tuang saram sw bam khang the.

⁹Rawna khaeng makmei nthan liangmei puatkat khou tei rui laa patmei kabangc khoumei guay hei nangniw tuang the: mi kiu thu nap-bi puatkat, paapc khang khaengmei puatkat, khangc datmei tuang khaengmei puatkat. Nthanmei puatkat swna akhou tiiloumei guay tei nang khatni nang nac mpouh nunc khang e.

¹⁰Nangniw rui mi guay tei nthanmei bamv khou tu nina e khatni nggaanvmei kathuic rui tu nina e; mi guay tei nthanmei e.

¹¹“Mi ruc khou rui, Isaraelmei rui akhang nkunmei puatkat swna katloumei guay tei nangniw khang e. Ai rui mi guay tei nang khang khatni nang nac mpouh aluh guay khang, thei thangc khang nganvna tiiloumei tuang the. Kariak lungc khou nthanna bammei kaikhunhmei guay hei tei tu nuh e.

¹²“Isaraelmei rui tingkwm khou gay liangmei Olive thauc, drakhadui, khatni rey liangmei tingthai akhang katloumei guay tei ai rui nangniw khang tiimei tuang the.

¹³Kaniw tuang ramv khou rui nthai reymei tingthai RINGHPOUC khang kat guangmei tei nangniw khang e. Nang kai kaikhunc khou nthanna bampui mei tei rui hei tei tu nuh e.

¹⁴“RINGHPOUC khang katduang patloumei puat guay tei nangniw khang e.

¹⁵Isaraelmei rui RINGHPOUC khang khouringh pwni maansei pwni puanc reymei katloumei guay tei nangniw tuang e. Mpouh nac reymei khatni nthan makmei khouringc puanc reymei tei nangniw rui thuak ni tuang e.

¹⁶Nareimei guay tei bw akhat tangc pwkhou daandi paek panguh tiina thuak dat nina e.

¹⁷Nkui reymei guaih, lauziu, khatni ziuhnac tei thu thuak dat nimei tuang hamh the. Mi guay tei atuang di the kumna mi guay tei khaeng khang di the. Kazei tei ravchapaeng khou kazinhlouna kathav guay tei taektw puatkat swna raw nina e. Karym tei rui ata tipianlou e.

¹⁸Mi tuang zanc kiu thu, nkunmei puatkat — kangaengv khatni nzat theinaeng hei kumhmei guay hei nangniw khang e.

¹⁹“Isaraelmei rui akhang nkunmei puatkat swna tii guangmei guay tei ai rui nang khatni nang nac mpouh aluh guay khang tiiloumei tuang the. Mi hei ai rui nang khatni nang kikta khou swlou kanmei kalaic dat lakmei latdyng the.”

²⁰RINGHPOUC rui Aron khou sa the, “Nangniw khang puatc ni ramvdui ni nzanhlou lak ge. Nangniw dam kiu thu ai hei the.”

²¹RINGHPOUC rui sa the, “Isaraelmei rui akhang tiimei kadam ruh khou akhat tei ai rui Levimei khang tii the. Mi hei kaniw rui atuang kalummei pheykai khou taanvtaanhmei tuang phy swna tiimei tuang e.

²²Isaraelmei baihmei thu kalummei pheykai khou tei guang nuh mak ge, guang e thei kaniw theic puni.

²³Ntaw khou rui thauna Levimei na rui kalummei pheykai khou tei taanvtaanc nina e. Mi hei tingsaengzaeng nangniw tounac nunc nganvna tat bam nimei riak the. Levimei tei Isarael khou kaniw tuang kaiphwn lauphung nai bam nuh mak ge.

²⁴Kalam thu Isaraelmei rui tii guangmei ruh dam tei kaniw khang swna tingsaeng khang tiiloumei tuang di the. Hei zaeng rui Isarael khou kaniw tuang kaiphwn lauphung nai nuh mak ge twna ai rui kaniw khou saloumei tuang the.”

²⁵RINGHPOUC Mousi khou sa the,

²⁶Levimei nunc khou heikumna sa o, “Isaraelmei rui kadam ruh tii guangmei tei RINGHPOUC rui nangniw khang tiimei tei nangniw laa pwkhou, nangniw ni mi tuang kadam ruh tuang akhat tei RINGHPOUC khang nkunmei puat swna tii dat nina e.

²⁷Mi puatkat hei kailau taanhmei nunc rui napthanc khatni drakha dui thanc katmei tei lev nchamcmei tuang e.

²⁸Mi hei kumcna nangniw rui Isaraelmei khou rui laamei kadam ruh tuang khou tei rui RINGHPOUC khang nkunmei puatkat swna kat nimei tuang e. Nangniw rui mi puatkat hei RINGHPOUC khang amuh Aron khou tii nina e.

²⁹Nangniw rui laatowmei gay liangmei khou tei rui tii nina e.

³⁰Gay liangmei tei tii tangmei tangv, baihmei guay tei nangniw khang lou nuh the, hei tei kailau taanhmei rui kamei rui tii nimei dam tii tangmei tangv nsaekcloumei guay tei kakhang loumei tei kumh tuang the.

³¹Nsaekcloumei guay tei nang khatni nang kai kaikhuncmei rui tu nii niimei bamv khou tu nuh the, kalam thu hei tei nangniw atuang kalummei pheykai khou taanvtaanhmei tuang taanvphy the.

³²Nangniw rui gay liangmei tei RINGHPOUC khang katlou tang kan e thei nangniw rui hei tei tu bam sini nkhuai mak khe. Kum e tiki gay liangmei langv tei katlou rey makna tuna Isaraelmei tuang nthanmei puatkat tei sw tanac mak khang thu sw nina e; nangniw rui hei tei sw tanac e thei, nangniw theic puni.”