Read Rongmei Naga SINGCHAKH 19 Bible Online

SINGCHAKH 19 - Rongmei Naga bible

SINGCHAKH 19

¹RINGHPOUC rui Mousi lev Aron khou sa the,

²RINGHPOUC rui tiimei latdanv kiu mi hei the, Isaraelmei nunc rui guaihnay haenghmei, hiaksuimei khatni puatc phungclou zat makmei nangney daeng khou laaguang khang sa o.

³Laaguangmei guaicnay tei amuh Eleazer khou tiilou nina e. Hei tei zypui paengc thangc zaypatna Eleazer hu khou swluai nina e.

⁴Eleazar rui kazei asaekc kabaanczung rui key ntin lana kalummei pheykai biak tei kazinhlou lwan chanei nina e.

⁵Mi guaic kapwm tei twmei thu kagic, kazanc, kazei, khatni kaba guay kazauhna amuh hu khou tei ntei nina e.

⁶Mi tangv tei kamei rui sidarthing, hissop phwam, khatni langhriang haenghmei laa lana mi guay tei guaihnay raw bammei mai khou tei phaiclou nina e.

⁷Mi tangv tei kaphey kabaan souna, duilow nina e, kum tang kan e thei kamei zypuikai khou gut dat nuh the. Kum e tiki tingzyn nganvna kamei nthan makmei di he.

⁸Guaih nteimeipu tei ni kaphey kabaan souna duilow nina e. Kum e tiki kamei ni tingzyn nganvna nthan dat mak ge.

⁹Nthanmei gaanv khat rui mi guaic rawmei tuang mbut tei laana zypui paengc thangc nthanmei bamv khou tei lou nina e. Isaraelmei guay rui hei tei sw nthanmei dui khou sinsw khang hei khou tei lou nina e; mi thouc hei paapc sw nthan khang swmei tuang e.

¹⁰Mi mbut suakmeipu tei kaphey kabaan sou dat nina e kumna tingzyn nganvna nthan makna bam nina e. Mi riak hei dilungmei khatni khuam bammei gin guay khang ni twna thei thangc nganvna nai bam nimei tuang e.

¹¹Theihmei ta kahiloupui mei tei zaeng chanei mphuam e.

¹²Kamei tei pumh sw nthanmei dui rui zaeng neih thumhmei khatni chaneimei nungc sw nthan e thei kamei tei nthan dat puni the. Kamei rui zaeng neih thumhmei khatni chaneimei nungc sw nthan dat mak ge thei, kamei tei nthan dat ni tuang hamh e.

¹³Theihmei pumc ta kahilouna sw nthan dat makpui mei tei rui RINGHPOUC tuang pheykai ta sw tanac e. Mi kumhpui mei ta tei Isaraelmei pang khou rui swluai ganc nina e. Kalam thu sw nthanmei dui kakhou kazinhlou makpui zaeng rui nthan makmei tei kakhou kumna nai bam e.

¹⁴Kainung khou meic theiclou e thei mi kainung khou bammei guay tei hamh e thei mi khou tei gutloumei guay tei zaeng chanei tanac the.

¹⁵Mi kai lungc khou naimei kagwm gumlou makmei lai guay tei ni tanac the.

¹⁶Meic rui dowluailoumei, hamh e thei kapaengc thangc theicloumei ta, hamh e thei tarou pwni, meic rou pwni kahiloupui mei tei zaeng chanei tanac the.

¹⁷Mi tuang tanacmei tei kuak dat khang paapc kuaklou khang guaituam haenghmei raw kanmei mbut tei laana lai khou lou nina e, kumna hei khou tei dui thanh bunlou nina e.

¹⁸Kainung khou theicloumei tuang khou tei nthanmei gaanv khat rui hissop phuam laana, hei tei mi dui khou tei ntinna theicloumei pheykai, mi lungc khou naimei puat katana khatni maansei guay khou tei mi dui tei kazinhlou nina e. Kapaengc thangc theicloumei tuang lat bamv zaat khou tei rui theihmei pumc pwni, tarou pwni, rou pwni kahiloupui mei khou tei nthanmei gaanv khat rui mi dui tei kazinhlou nina e.

¹⁹Kumna kakhou tei zaeng neih thumhmei nungc khatni chaneimei nungc kazinhlou nina e. Zaeng chaneimei nungc kaphey kabaan souna duilow kan e thei neih keymei tangv thu kamei nthan dat the.

²⁰Mphuam lana sw nthan dat makpui mei tei kamei mphuamna bam puni, kalam thu sw nthanmei dui tei kakhou kazinhlou mak he. Kamei rui RINGHPOUC tuang pheykai sw tanacpui zaeng rui kata Ravguangc tuang mei pang khou rui swluai ganc puni.

²¹Nangniw rui mi riak hei thei thangc nganvna tat bam nina e. Sw nthanmei dui kazinhmeipu tei ni kaphey kabaan sou muay nina e; mi dui tei kahimei guay rui neih key mak saanv mphuam the.

²²Nthan makpui mei rui kahiloumei guay tei mphuam the. Kumna hei tei kahiloumei guay ni neih key mak saanv mphuam the.