Read Rongmei Naga SINGCHAKH 20 Bible Online

SINGCHAKH 20 - Rongmei Naga bible

SINGCHAKH 20

¹Reymei bw khou Isaraelmei kapwm tei Zin tuang tazikramv khou guangna Kades khou zypui sw the. Khoutei Miriam theicna mbeihlou duc the.

²Kaniw zypui swmei bamv khou tei dui maek khwan the, kum tina meic nunc tei Mousi lev Aron daeng khou guang ding huamcna sa the,

³“Chana punav Isaraelmei pang khou aniu ni RINGHPOUC tuang pheykai hu khou theiclou khwan e thei gay ni tuang e!

⁴Tabui sw khang nangney rui aniw ta mi tazikramv khou hei nduanghpatlou tu cho? Aniw tuang khouringc guay lev khou hei theic nchamclou khang nduanghpatlou tu cho?

⁵Tabui khang nangney rui aniw ta Izip khou rui mi ramhkhat na sini thau nuh makmei baiclat sihmei tazikramv khou hei nduanghpatlou tu cho? Nap-bi ni, tadutthai ni, drakhathai ni, puc-heithai ni maek khe. Zangv khang na sini dui maek ge!”

⁶Mousi lev Aron tei meic nunc khou rui tatpatna kalummei pheykai chaengmun khou guang ding the. Kaney zaw kandih khou sow nkhum key the, kumna RINGHPOUC bammei tuang karangmei riw kaney khou lyanlou the.

⁷RINGHPOUC rui Mousi khou sa the,

⁸“Latdyng Khuk hu khou naimei builwang tei laa tho, kumna Aron nangney rui Isaraelmei guay ta tei khuam kaduai tho. Kumna meic nunc hu khou tei nai bammei taudaic khou tei sa ti tho, kum ti thei mi khou tei rui dui luangcpat puni the. Kumna nang rui kaniw khatni kaniw tuang khouringc guay zangv khang mi taudaic khou rui dui tipat puni the.”

⁹RINGHPOUC rui samei theilayna Mousi tei tat lana builwang tei laa the.

¹⁰Aron kaney rui Isaraelmei kapwm ta taudaic hu khou tei tidinglou the. Khoutei Mousi rui sa the, “Nking o, nangniw latliammei nunc! Mi taudaic khou rui nangniw khang dui tipat ro twna cho?”

¹¹Hei khou tei Mousi rui builwang tei zaythauna taudaic ta tei kagit liang kanei the, kumna khou tei rui duibwang daihmei luangcpat the, kumna meic nunc tei ni kaniw tuang khouringh khounah guay ni zangv the.

¹²Khoutei RINGHPOUC rui Mousi lev Aron ta luh the. Kamei rui sa the, “Nangney rui atuang nthanmei ngamv ta Isaraelmei nunc hu khou lwm ngam makmei zaeng rui, ai rui kaniw khang tii ni twna nrianhloumei dic khou tei nangney rui kaniw ta nduangh guanglou tangc ni tuang hamh the.”

¹³Mi hei Isaraelmei nunc rui RINGHPOUC ta nut kanmei bamv khatni kamei hei nthanmei e twmei kamei rui kaniw khou lyanlou kanmei bamv Meriba khou tei pat kanmei tuang e.

¹⁴Mousi rui Kades khou rui latdiumei nunc Edommei guangc khou thouclou the. Kaniw rui sa the, “Mi chamv hei nangniw chana punav swmei, Isaraelmei khou rui e. Aniw ryanra ryanriu akhaengv kanmei tei nangniw thay the.

¹⁵Aniw pupouc nunc rui Izip kandic thangc keyna hei khou tei aniw tingkwm mpeyna lungclou khwan e twmei thay the. Izipmei nunc rui aniw pupouc nunc khatni aniw ta sw kasicna sw the,

¹⁶kumna nkhavlou khang aniw rui RINGHPOUC khou kaucna huay the. Aniw rui kapna huaymei kamei rui chulouna katuang baanchara thouclouna aniw ta Izip khou rui nduanghpatlou the. Kumna ntaw aniw nang kandic tuang ramvrei khou Kades kaidai khou bam e.

¹⁷Nang kandic tat kaanlou khang aniw ta nuhlou na ro. Aniw ni aniw tuang khouringc ni chaeng paengc tatpat lak ge. Nangniw tuang laupuk khou ni drakhalau khou ni tatlou lak ge. Nangniw tuang duikhunc khou rui nganv dui zangvlou lak ge. Nang kandic tatkaan mak saanv aniw chaengluangdai khou na luicna tat ni de.”

¹⁸Kum e tiki Edommei rui sadaw the, “Aniw kandic khou nangniw tat kaanpat khang aniw nuh mak ge! nangniw gut khang sw pw e thei aniw patna adow puni de.”

¹⁹Isaraelmei nunc tei rui sa the, “Aniw chaengluangdai khou na tat puni de, kumna aniw rui pwni aniw tuang khouringc rui pwni nangniw tuang dui zangvloumei tuang nai e thei, mi khang tei aniw kamanv tii puni de, aniw rui kage naimei thu tat kaanlou rap khang na de”

²⁰Edommei rui sa dat re, “Aniw nuh mak ge.” Kumna Isaraelmei nunc ta adow khang tanhmei rihmei kang akhat pat the.

²¹Edommei nunc rui Isaraelmei nunc ta kaniw kandic titat kaan khang nuhlou timakna, Isaraelmei nunc tei hanc datna chaeng baihmei akhat thangc tat dat the.

²²Kaniw rui Kades khou tei rui tat tatna Hor chyng khou guang the.

²³Edom tuang ramvrei Hor chyng khou RINGHPOUC rui Mousi khatni Aron khou sa the.

²⁴“Isaraelmei nunc khang nrianhloumei Kanaan kandic khou tei Aron thu gut ni tuang hamh the; kamei theic puni the, kalam thu nangney gaanv nei mei Meriba khou alatdanv twanlyam the.

²⁵Aron khatni kanac Eleazar ta Hor Chyng khou nduangh ku o,

²⁶khoutei Aron tuang amuh pwan tei luakpat lana Eleazar khou piulou tho. Hei bamv khou tei Aron theic puni the.”

²⁷RINGHPOUC tuang latdanv theilayna Mousi taanc the. Meic geihna hu khou tei rui kaniw Hor Chyngbut khou tei ku the,

²⁸kumna Mousi rui Aron tuang amuh pwan tei luakpatna Eleazar khou nulou the. Mi chingctwan khou tei Aron theiclou kan the, kumna Mousi lev Eleazar tei key dat the.

²⁹Aron theic the twmei meic guayna tei rui thay pwkhou, kaniw kaguayna zaeng 30 latlu the.